Read berom 1 Kɔrintɔs 9 Bible Online

1 Kɔrintɔs 9 - berom bible

1 Kɔrintɔs 9

¹Ma sé mwat de a sé washak wɛt arɛt? Ma sé tom Yɛsu Kristi wɛt a? Ma ga di Yɛsu, Darwey mot wɛt arɛt? Yin a sé pyɛ de ma sɛ̀ e fwôm Darwey de me ra wɛt a?

²Mwa ano de bemat behak be jut me sede tom Yɛsu wɛt, ko mwin ma tɔk, yin e jut me sede tom mɛ mo! Yaga, yi na sangâl nesa min na Darwey, yin pyɛ min yin e dura, ma sé tom Yɛsu.

³Há ma hemo de me ha a bemat de be tɛ̀sɛ sekun hom na me bin pat mɛ̀ to hom wɔgɔ:

⁴Wot a vɔk reto na be nɔng ot pyɛ̂ re na pyɛ̂ sɔ yaga fwom mot wɛt arɛt?

⁵Wot a vɔk reto na wot a jut hwā de a sé mwat-raa vɔk e de kwɛngɛl mot, tyɛng sede remo de Kefas, na bwang betom Yɛsu, tanga begwa Darwey mot yɛn e ra wɛt arɛt?

⁶Kɛ a sé me tanga Barnabas zɔng de a sé gbing-gbing na wot a ra fwom, na wot a sɛ̀ mɛ̀ pyɛ́ de wot ê sangal mɛ̀ arɛt?

⁷E wɛ̌ mwât como de e ra fwom, ko a to jāma pyɛ́ de ê sangal mɛ̀ pyɛ mɛ arɛt? E wɛ̌ mwât cap de e tus bwî lɛmu, ko a de re nèy o wɛt arɛt? E wɛ̌ lwêk yas de ê sɔ nevasâl yas o wɛt arɛt?

⁸Me ha e ra pyɛ́ de wot a ga tɔ́k ot mɛ̀ zɔng wɛt, yaga wot e basa tyɛng ano arɔng e Bwok-basa Badu.

⁹Bà jɛk e Badu Mose wɔgɔ, “Jeng de hywàrak wa sé ra a hwo fwom, hwo bang nû wɛ wɛt.” Hâ Dagwi hemo ha sé e rà behywarak zɔng arɛt?

¹⁰Ko ha sé e ra wot arɔng, kɛ ano wɛt ɛ? Ey, bà jɛk pyɛ́ yemo yaga wot. A jam na mwât hôw cap a how cap o, ko mwât dâk pyɛ́ a dak yɛ̄ arɔng, yaga yɛn e sɛt yey mɛn e ra numo mɛn hê bwal o.

¹¹Tyɛng sede mwat e bere yére, wot a ga bere rehâ Dagwi e neyey min. A remo, a sé tyɛng na wot a sey numo mot hê pyɛ́ de wot ê sangal mɛ̀ yi na yin wɛt arɛt?

¹²Ka sede behak ba vɔk reto na be sɛ̀ pyɛ́ de yɛn ê sangal mɛ̀ yi na yin, ko wot a rɔda vɔk reto de ra dal rane mo, na wot a sɛ̀ pyɛ́ mo yi na yin wɛt arɛt? Ko mwa ano, wot a ga ra fwom na reto de wot a vɔk o mo wɛt. Wot a niri na kanɛ negbang e negya, yaga na wot a ra pyɛ de yê dul Yɛgɛt Yat e ra Kristi wɛt.

¹³Mwin, yin a tɔk, vemo de be ra fwom e Gbɔng Duk Re Fongol be sɛ̀ pyɛ̂ re mɛn yi e hwomo. Ko vemo de be ra mwɛn à fwom o e kwɔn de be rangas ɛ̀ nenɔrɔ vɔk na Dagwi be sɛ̀ numo mɛn hê pyɛ́ de be nása e kwɔn o arɔng.

¹⁴A to sé ano na bemat de be shara Yɛgɛt Yat: Darwey a nɔng nu, yɛn a sɛ̀ pyɛ́ de yɛn ê sangal mɛ̀ yi e râ fwôm Yɛgɛt Yat o mo.

¹⁵Mwa ano de ma vɔk reto na me rangal pyɛ́ yemo, ko ma ga ra fwom na rɛ wɛt. Ko ma sé jɛk ano wɛt, yaga na yin a ra pyɛ́ yerê yemo yaga me. A rɔda dal a me na me ku, de bê sɛ̀ mwat hwak na a ba sey ɛ̀ pyɛ de me ra kaa na yɛ.

¹⁶Mwa ano de ma sé shara Yɛgɛt Yat, ko ma vɔk pyɛ de me ra kaa na yɛ wɛt, yaga ba tɛ̀ me gbing-gbing na me shara a bemat Yɛgɛt Yat. Yaa kukuuk! Gawey e ra me, ka sede me shara Yɛgɛt Yat wɛt!

¹⁷Ka sede me ra fwom hom, yaga me pyɛ hom me simo na me ra gwɛ, ko a jam na be nɔng me pyɔlɔ. Ko mwin, me ra fwom o sede pyɛ de ba tɛ̀ me gbing-gbing na me ra, yaga Dagwi a tik gwɛ e vwɔ hom.

¹⁸Ko pyɔlɔ hom o yɛ à sɛ́ arɛt? Ya sé ngan: Kayɛ jeng de me shara a bemat Yɛgɛt Yat, me shara yɛ̄ sana byɛ cak. Ano kwong, me ra fwom o sana rangâl bemat pyɛ de me simo, tyɛng sede remo de ma vɔk reto na me ra e ji fwôm sharâ Yɛgɛt Yat.

¹⁹Ma sé washak, ko ma sé sam mwat hwak wɛt. Ko mwa ano, ma tɛ̀ to hom na me sè sam wo kawɛ mwat, yaga na me bin vey na pyak e ji mɛn e gwông raà Kristi.

²⁰Jeng de ma sé na BeYuda, me sangal sede yɛn, yaga na me bin vey na yɛn e gwông raà Kristi. Badu Mose ba to vɔk reto e ra me wɛt. Ko mwa ano, jeng de ma sé na vemo de ba rɔngɔl e nɛ̂n retô Badu mo, me sangal sede Badu ba vɔk reto e ra me. Me ra ano, na me bin vey na vemo de Badu ba vɔk reto e ra yɛn e gwông raà Kristi.

²¹Jeng de ma sé na bemât yére dyuk de ba vɔk Badu Mose wɛt, me sangal sede hwak e ji mɛn, na me bin vey na vemo de ba vɔk Badu Mose wɛt e gwông raà Kristi. Ma ye wɛt wɔgɔ, ma sé e nɛ̂n retô badu Dagwi wɛt; a sé e badu Kristi de ba vɔk reto e ra me.

²²Jeng de ma sé na vemo de ba vɔk gap e ra rehâ pyɛ̂ Dagwi wɛt, me tɛ́ me tyɛng na yɛn arɔng, yaga na me bin vey na yɛn e gwông raà Kristi. Ano kwong, me sangal e begwông kayɛ yerê bemat. Me masa mwa begwong de mwat e tɔk ra, yaga na me bin vey na behak e ji mɛn e gwông raà Kristi.

²³Me ra pyɛ́ yemo mwa yaga rê nuyêl Yɛgɛt Yat, ko yaga na me sɛ̀ numo nang hê nerat de na yi na Yɛgɛt Yat o mo arɔng.

²⁴Mwin, yin a tɔk, e ji setele, kawɛ e ji bemat o e tele, ko a sé e gwining e ji mɛn zɔng de e sɛ̀ nɔrɔ̂ rê setele mo. Yaga ano, tele hin e yerê gwong de yin ê sɛ̀ nɔrɔ̂ setele mo arɔng.

²⁵Kawɛ mwat de e yel e de jɔgɔ e masa na a tabak to mɛ na a bin ra yɛ naka. Yɛn e ra ano, yaga na yɛn a bin sɛ̀ pyɔlɔ de ye ros wɛt. Ko wot e ra ano, na wot a bin sɛ̀ pyɔlɔ de ye nàra gbak-gbak.

²⁶Pyɛ ma yemo de ya tɛ̀, me tele sede mwat de e tele kpɛɛ wɛt, ko me ra yol sede mwat de e dak gul wɛt.

²⁷Me nɔ̂ng rebek hom reyɔm na me vɔk reto e ra rɛ mwa. Me ra ano, yaga na be ba kyɛ́ ɛn wɛt nà nɔng me pyɔlɔ mo, yaga ma kana ra pyɛ cak de ya jam wɛt e bama de ma shara a behak Yɛgɛt Yat.