Read berom 2 Kɔrintɔs 10 Bible Online

2 Kɔrintɔs 10 - berom bible

2 Kɔrintɔs 10

¹Me Bulus, ma sé ha na yin yi na dyɛ̂ng to na nehywɛ yerê ne Kristi. Ma sé womo de be tang me, ma vɔk yey ting wɛt jeng de ma sé tanga yin, ko me ha na gap jeng de ma sé yikyik na yin.

²Ma sé ra won na yin, yin kwon tɛ̀ me na me ha na yin na gap jeng de ma vey na yin. Yaga ma tɔk, ma rɔda tɔk ha na gap na bemat de be tē, wot e dura báre yerê hê bemât jey zɔng e negwɔn sangal mot.

³Yaga, mwa ano de wot a sé sangal e jey, ko wot e ra como yerê ye jey wɛt.

⁴Pyɛ̂ como de wot e ra fwom na yɛ̄ ya sé yê jey wɛt; ya sé pyɛ̂ como yê Dagwi de a vɔk reto. Ko wot e ra fwom na yɛ̄, na wot a gangas nekwɔn jey de ba yong nɛ na gap. Wot e gangas mɛ̀ tô cuna bɔs na pyɛ́ mo,

⁵mwa na kayɛ pyɛ de ba yong, na ye dul bemat nà tɔk Dagwi. Ko wot ê vos kahɛ báre de bemat ba vɔk, na wot a tɛ̀ hɛ he gyeng hâ Kristi.

⁶Ko e bama de yin a dyɛng bato min mwa, wot a rɔda sè e yong ot na wot a tabak kawɛ mwat de a ra retek.

⁷Yin e jut pyɛ́ e gwong de be bɛrɛng yɛ̄ zɔng. Mwat hwak a sɛ́ de e tē, a sé wo Kristi arɛt? Tik na yɛ a to gwɛ̌ bare naka, wot a sé vê Kristi tyɛng sede yɛ arɔng.

⁸Kɛ gyeng me ra kaa e ra reto de Darwey a nɔng me, ko me vo rekyen wɛt. Darwey a nɔng me reto mo na me sɛlɛ hin na yin a re nuyel e gwông raa, ko na me gangas hin mɛ̀ e vwel wɛt.

⁹Me simo na yin a bɛrɛng sede me simo na me tɛ̀sɛ a yin bengyip na bebok-berang hom wɛt.

¹⁰Yaga bemat behak be tē, “Bebok-berang Bulus be kwɔrɔs a bemat rebek, ko hâ vɛ he vɔk gap tyɔng wɛt. Ko ka sede mwat a di ɛ e bayis, a sé pyɛ di wɛt, ko há mɛ arɔng ha sé pyɛ cak wɛt.”

¹¹Tik na bemat o be tɔk, pyɛ́ de wot e jɛk e bebok-berang mot e jeng de wot a sé tanga yin wɛt ya sé tyɛng na pyɛ́ de wot a rɔda ra jeng de wot a rɔda sè tanga yin.

¹²Wot ê yi e rɛ̌ na wot a wuna bato mot kɛ wot a tyɛngrɛ hot na bemat o behak de be ha há rat e ra bato mɛn arɛt? Jeng de yɛn e mara bato mɛn na bemɛn, na yɛn a to tyɛngrɛ bato mɛn na bemɛn, yɛn a sé betɔn.

¹³Ko di wot kene — wot e ra kaa de ha dal yɛnɛ̂ pyɛ de ya sé tyɛng wɛt, ko wot ê ra kaa mot e ra kwɔ̂n fwom de Dagwi a ga yɛnɛ a wot zɔng. Yin mwa e hane yin a sé e ji yɛnɛ̂ kwɔ̂n fwom hane mo.

¹⁴Ko sede remo de yin a sé e ji yɛnɛ̂ kwɔ̂n fwom o, wot e ra kaa de ha dal yɛnɛ hane mo wɛt. Yaga a sé e wot de wot á tānga vey a yin na Yɛgɛt Yat e ra Kristi.

¹⁵Ano kwong, wot e kwey yɛnɛ mot e de râ kaa na fwom de bemat behak ba ra wɛt. Ko wot e sɛt yey mot wɔgɔ, tɔ́k min hê pyɛ̂ Dagwi hê gwɛ̌ hɛ naka. Yi ano, wot ê tɔk ra fwom e tē min de gwa dal gwane de wot á kana ra sizɔng, ko wot ê ra gwɛ e ji yɛnɛ̂ kwɔ̂n fwom de Dagwi a ga yɛnɛ a wot.

¹⁶Ano arɔng, wot a rɔda tɔk shara Yɛgɛt Yat e bavwel de ba sé e nuyel min. Yaga wot e simo wot a ra kaa na fwom de ba ga kana ra e yɛnɛ̂ kwɔ̂n fwôm bemat behak wɛt.

¹⁷Ko sede remo de bà jɛk e Bwok-basa Dagwi wɔgɔ, “Tik na yɛ de e simo a ra kaa, a ra kaa mo e ra pyɛ́ de Darwey a ra.”

¹⁸Ka sede mwat e ha há rat e ra to mɛ pyɛ mɛ, ko hane ha sé yapyi zɔng; ko ka sede Dagwi e ha há rat e ra yɛ, hane ha sé pyɛ ryat.