Read berom 2 Kɔrintɔs 11 Bible Online

2 Kɔrintɔs 11 - berom bible

2 Kɔrintɔs 11

¹Me simo ka yin a ka niri na netɔn hom tyɔng. Ko ma tɔk, yin a sé niri na me ano.

²Yin a sé sede gwel de a sé jɛrɛ, ko ma ha wɔgɔ, ma rɔda nɔng ɛ e weneng na rwas gwining zɔng, yɛ à Kristi. Ka sede yin e simo yin a raa mwat hwak, ko ma rɔda pugu hin na pugu de he yi na Dagwi.

³Gwɔ̄m wà kana kwɛlɛng Hawa yi na netsitsɛ̂ng wɛ̀. Ko me tele me, báre min hê sila ano arɔng na neves, ko yin ê tik na yin a raa Kristi na yey min mwa e gwong de gwa sé mwin, ko gwa to sé jɛrɛ arɔng.

⁴Yaga, ka sede mwat hwak a vey na yin, na a shara a yin rehâ Yɛsu hwak detu na Yɛsu de wot a ga shara a yin há mɛ, ko yin a pere sey há mo kpɛgɛrɛk zɔng. Ano arɔng, yin e sey gabik hak detu na hemo de yin a ga kana sey yi na Dagwi, ko yin e sey yɛgɛt yat cak detu na yemo de yin a ga kana sey yi na wot.

⁵Ko me bare, ma radɛ me bemat vane mo ko tyɔng wɛt, vemo de yin e tâng vɛ, à begbɔng betom Yɛsu.

⁶Gyeng rɔ̌ ma sé mwat de ba ga masa a yɛ begwông há na bemat wɛt, ko ma vɔk tɔ́k. Wot a ga dura a yin pyɛ yemo mo yɛɛlɛl e kagwɛ gwong.

⁷Ma dyɛng to hom, yaga na be nɔng in nerey, ko jeng de ma shara a yin Yɛgɛt Yât Dagwi, ma rangal hin byɛ cak e ra yɛ̄ wɛt. Ma ra renɛn a wane arɛt?

⁸E jeng de ma ra fwom e tē min, be-ekilisiya behak ba nɔng me pyɛ́ de mê sangal mɛ̀. Á sè sede ma seres ɛ̀ pyɛ́ mɛn o na retek na me sɛlɛ hin mɛ̀.

⁹Ko jeng de ma sè na yin, ka ma ka simo pyɛ cak, ma simo na me tɛ́ me pyɛ nedirik na mwat hwak wɛt. Yaga begwa mot bemat-raa de ba yi e Makedonya ba nɔng me pyɛ́ de me simo. Ma ga dul to hom nà sè a yin pyɛ nedirik e kagwɛ gwong, ko ma rɔda re nuyel e de ra ano.

¹⁰Sede remo de tsak hâ Kristi ha sé e yey hom, ko me ye, vit a mwat hwak e yɛnɛ̂ sevwêl Akaya de a rɔda tɔk dul râ kaa de me ra.

¹¹Mê ha ano yaga sɛ́ arɛt? A sé yaga ma tɛ̀ yey hom na yin wɛt arɛt? Mwin, Dagwi a tɔk, ma tɛ̀ yey hom na yin!

¹²Ko ma rɔda re nuyel e de râ pyɛ de me ra mo, yaga na me jut bol vemo de be jāma gwong na be dak kaa be ye, yɛn a sé ra fwom tyɛng sede wot.

¹³Yaga bemat yerê vane be tâng bato mɛn, à betom Yɛsu, ko yɛn a sé vê bɔs zɔng. Yɛn a sé bemât fwom de be kwɛlɛng bemat, ko yɛn e bangas negwɔn neves mɛn, na yɛn a tâng bemat, yɛn a sé betom Yɛsu Kristi.

¹⁴A sé pyɛ langat wɛt! Shetan pyɛ mɛ e bang negwɔn neves mɛ na a yâng tó mɛ, a sé tom-lagwi wo negbey.

¹⁵Yaga ano, a sé pyɛ langat wɛt, ka sede bemât fwom mɛ be bangas negwɔn neves mɛn, na be tâng bato mɛn, yɛn a sé besam de be ra tomong de ba sé cik. E yɛnɛ mo, ba rɔda tala hɛn tyɛng na tomong mɛn.

¹⁶Ma sé to me ye ngan: Mwat hwak a jut me ma sé tɔn wɛt. Ko ka sede yin a jut me ano, ko tik na yin a sey me, sede remo de yin e sey tɔn, yaga na me sɛ̀ kwɔn na me dak kaa tyɔng.

¹⁷Neha de ma sé ha a remo na sé yi na Darwey wɛt, ko na sé yi na tɔn zɔng. Dâk kaa mo ha sé yi na tó hom, ko me ra hɛ na yey ting.

¹⁸Sede remo de bemat pyak be dak kaa e ra pyɛ̂ jey yemo, ko me arɔng ma rɔda ra ano.

¹⁹Yin a vɔk netsitsɛng sizɔng; yaga ano, yin e niri na betɔn na yey pyɛng!

²⁰Mwin, yin e niri na kawɛ mwat de e jut in a tɛ́ mɛ̀ besam, kɛ a sey ɛ̀ pyɛ́ min cak, kɛ a vo in na yin a ra a yɛ pyɛ de e simo, kɛ e byɛs in, kɛ e dak in na vɔ e bayis gbak.

²¹Ma rɔda tono wɛt, mwa ano de a sé pyɛ rekyen na me ye ano: Wot á kana vɔk yey ting na wot a ra a yin pyɛ́ yemo wɛt! Ko ka sede mwat hwak ê kyɛm a dak kaa e ra pyɛ cak, me ma rɔda kyɛm me dak kaa arɔng. Ma sé ha há hemo sede tɔn zɔng.

²²Yɛn vane mo ba sé BeIbrani arɛt? Ma sé tyɛng ano arɔng. Yɛn a sé BeIsrayɛl arɛt? Ma sé tyɛng ano arɔng. Yɛn a sé yére Abraham arɛt? Ma sé tyɛng ano arɔng.

²³Yɛn a sé bemât fwôm Kristi arɛt? Me ma sé mwât fwom de a dal ɛn. Ma sé ha sede mwat de ba dɔnɔ hɛ. Ma ga ra fwom de gwa dal mwɛn na negbang; ba ga tɛ̀sɛ me e ngyang me dal ɛn mɛ̀; ba ga dak me be dal ɛn mɛ̀; ko ma ga sè e nû reku zang pyak me dal ɛn mɛ̀.

²⁴Zang tungun BeYuda ba ga dak me na zining zang kuru batat na vɛ shabetat (39) e jeng jining.

²⁵Zang tat ba ga dak me na gwele; ko zang hining ba ga tó me na beta na be mɔrɔ me. Dwa-nshi wa ga ye gup na me zang tat, ko e jeng o cak ma pɔl e ji nshi e gworep, ma to wosho ɛ̀ arɔng.

²⁶E ji kɛngɛl hom pyak ma di reyɔm na tɛmɛ-nshi e nerɔt, ko begbik ba ga tɛ̀ a me nepòt; bemât yere mot na vê yére dyuk ba ga tak a me tyɔng wɛt. Ma ga di reyɔm e repomo tanga e hey arɔng; ma ga to di reyɔm e gworep na e vɔ begwa mot bemat-raa vê bɔs.

²⁷Ma ga ra fwom de gwa sé gbang tyɔng wɛt, ko ma ga di negbang detidetu. Zang pyak ma pɔlɔs ywey. Ma ga re yɔ́m, na vyong, tanga yey hwɔshɔ tyɔng wɛt. Zang pyak ma ga sangsal sana pyɛ̂ re, ma ga wok gul tyɔng wɛt, ko ma ga to bidɛ pyɛ banga.

²⁸Ko ka ba ka tik pyɛ́ yemo e hagat e ngyen, kahɛ tuk báre de ma vɔk hɛ e ra be-ekilisiya mwa he yɛklɛ me ding-ding.

²⁹Ka sede mwat hwak e ji mɛn a sé gbɛrɛk, ko e sè a me gbɛrɛk arɔng. Ka sede mwat hwak a ye bugurɛk e gwông raa, ko yey hom ye beseng e ra pyɛ mo.

³⁰Ka sede a sé gbing-gbing na me dak kaa, ko ma rɔda ra hɛ e ra pyɛ́ de ye dura nevît gap hom.

³¹Ko Dagwi, yɛ Dâ Darwey Yɛsu Kristi, de be somo hɛ gbak-gbak a tɔk, ma sé vɛ́ bɔs wɛt.

³²Jeng de ma sè e repomô Damaskus, gwɔmna de a sé e nɛ̂n Gbɔng Gwɔ̀m Arɛtas a tɛ̀ bemât gyeng ri duk repomo mo na be vo me.

³³Ko ba tɛ̀ me e ji gwoshap, ba gyira me e jey yi e repɔk jwâ-pomo mo, ko ma hywit me e vɔ mɛ.