Read berom 2 Kɔrintɔs 12 Bible Online

2 Kɔrintɔs 12 - berom bible

2 Kɔrintɔs 12

¹A sé gbing-gbing na me re nuyel na dâk kaa, mwa ano de ma rɔda sɛ̀ pyɛ cak yi e hɛ wɛt. Ma rɔda re nuyel na me ha a yin e ra pyɛ́ de Darwey a dura a me wɛshɛrɛk, ko ma di yɛ̄ e ji negwi-ywey.

²Ma tɔk mwat-raà Kristi hwak; neshey kuru na nɛ nenaas (14) de na kwey, ba jut ɛ vɔk e lagwi wo netat. Kɛ mwat o á sè e hwomo e rebek kɛ á sè e gabik mɛ zɔng, ma tɔk wɛt, ko Dagwi a tɔk.

³Ko ma tɔk, ba jut mwat o vɔk e Kwɔ̂n Pɔngɔ. Ma to ye, kɛ á sè e ji rebek mɛ kɛ á sè e ji gabik mɛ zɔng, ma tɔk wɛt, ko Dagwi a tɔk. E hwomo, a wok pyɛ́ cak de be tɔk ha yɛ̄ wɛt, yemo de be simo a mwat hwak a ha yɛ̄ arɔng wɛt.

⁵Ma rɔda dak kaa e ra mwat o, ko ma rɔda dak kaa e ra to hom wɛt, sɛ̌ me dak kaa e ra nevît gap hom detidetu.

⁶Ka ma ka simo na me dak kaa mwa, ko ma rɔda sè tɔn wɛt, yaga ma rɔda ha pyɛ́ de ya sé tsak o. Ko ma tik nà ra ano, yaga na mwat hwak a kwon bare na me e gwong de gwa dal pyɛ de a ga di me ra kɛ pyɛ de a ga wok me ha.

⁷Yaga na be bin dul me nà tos rato hom e ra gbɔng pyɛ̂ langat de ba dura a me mo, Dagwi a nɔng me serɔ sehak de sa sé a me sede serɔgɔ de se bosot mwat e rebek. Serɔ mo sa sé tom Shetan de wo tak a me rezot, yaga na me tos rato hom wɛt.

⁸Zang tat ma kana ra won na Darwey, na a pat pyɛ mo yi na me.

⁹Ko á yang me, “A sé e nerat hom zɔng de hwó simo na me dura a hwo; yaga jeng de hwà tɛ́ o sana gap, reto hom re sila gyat e de râ fwom e ji mō.” Yaga ano, ma rɔda dak kaa na yey pyɛng yaga nevît gap hom detidetu. A sé yi na nevît gap o de retô Kristi re vey na re sè e ji hom.

¹⁰Pyɛ ma yemo de ya tɛ̀, ma vɔk yey pyɛng e ji nevît gap detidetu, tanga e jeng de be ha há ves e ra me, e jeng de pyɛ́ ya sé a me gbang, na e jeng de be tak a me reyɔm, tanga e jeng de ma vɔk negbang detidetu. Ko ma vɔk yey pyɛng, yaga ma sé sɔ reyɔm remo mwa yaga rezâ Kristi. Yaga jeng de ma sé gbɛrɛk, e jeng a yane de ma to vɔk gap.

¹¹Ma ga tɛ̀ to hom sede tɔn, ko e yin de yin a tɛ̀ me tɛ́ me ano. A yâng sé naka, ka e yin vɛ de yin e ha há rat e ra me. Yaga, mwa ano de ma sé pyɛ cak wɛt, ko ma radɛ me vemo de yin e tâng vɛ, à begbɔng betom e gwong hwak wɛt.

¹²Ma niri sizɔng e de râ pyɛ́ e tē min yēmo de ye dura, mwat a sé tom Yɛsu. Pyɛ́ mo, yɛ̄ à râ pyɛ̂ dura, na râ pyɛ̂ langat, tanga râ pyɛ̂ bes.

¹³Yi e gwɛ̌ gwong de ma nɔng in negbang de na dal ne be-ekilisiya mo behak arɛt? A sé yaga ma tik nà rangal hin na yin a sɛlɛ me arɛt? Hàla a me hin buru mo!

¹⁴A remo, ma ga yong me na me vey na yin, vey hê tat a hemo, ko ma rɔda tɛ̀ a yin nedirik nehak wɛt. Pyɛ de me simo na yin ya sé e yin pyɛ min, ko ya sé e pyɛ́ min wɛt. Ko di, a sé e nèy de ne jāma pyɛ́ yaga beda mɛn wɛt, ko e beda de be jāma yaga nèy o.

¹⁵Ko me kene — a sé na yey pyɛng de ma rɔda wey na kayɛ pyɛ de ma vɔk mwa na tó hom, na me sɛlɛ hin mɛ̀. Ka sede tɛ̂ yey hom na yin ha dal hê bwang o, ko yin a rɔda tɛ̀ yey min na me he radɛ nang arɛt?

¹⁶Yin e simo kwong wɔgɔ, ma ga tɛ́ me pyɛ nedirik e ra yin wɛt. Ko bemat behak bê tē, ma sé mwat de a vɔk netsitsɛng neves, ko ma ga vo in na netsitsɛng hom o.

¹⁷Kɛ gyeng ma tɛ̀ hwak e ji bemat de ma tomo vey na yin, a sey ɛ̀ pyɛ́ min cak na a vɔk a me arɛt?

¹⁸Ma kana shonong e ra Titus na a vey na yin, ko ma tomo gwa mot mwat-raa hwak tanga yɛ. Titus á sey ɛ̀ pyɛ́ min cak wɛt, kɛ á sey ɛ̀ yɛ̄ bɛ? Wot na yɛ wot e ra pyɛ̂ mwa yi na gabik hining de wot a vɔk wɛt arɛt? Ko wot e raa gwong gwining wɛt arɛt?

¹⁹Kɛ gyeng, yimo e mɛsɛng o yin e bare, wot a sé kyě jāma begwong de wot ê dul bato mot e nuyel min arɛt? A sé ano wɛt; wot a sé kyě ha e nuyêl Dagwi sede bemat de ba sé sangal e ji nesa na Kristi. Ko à besâ yey mot, kayɛ pyɛ de wot e ra ya sé, na wot a sɛlɛ hin, na yin a re nuyel e gwông raa.

²⁰Ko me tele me wɔgɔ, jeng de ma rɔda ba vey, gyeng rɔ̌ ma rɔda sɛ̀ in sede remo de me simo yin a sè wɛt. Ko yin arɔng, gyeng rɔ̌ yin a rɔda sɛ̀ me sede remo de yin e simo me sè wɛt. Me tele me, gyeng rɔ̌ yin a rɔda jāma bemín na há, na yin a bɛrɛng bemín fus, na yin a vɔk shom, na yin a kat simô bato min, na yin a ha há ves e ra bemín, na yin a ra ryɔgɔt, na yin a toros bato min, na yin a tɛ̀ sogô nehywɛ arɔng.

²¹Ko me tele me wɔgɔ, jeng de ma rɔda ba vey, Dagwi hom a rɔda tɛ̀ me na me dyɛng to hom e nuyel min yaga rekyen. Ma rɔda vɔk lashê yey na vemo pyak de bá kana ra banɛn raane, ko yɛn a ga tik nà doyo na be hàla pyɛ de ya tɛ̀ ɛn ligis, tanga nejwang, tanga negwɔn neves de yɛn á kana ragas.