Read berom 2 Kɔrintɔs 13 Bible Online

2 Kɔrintɔs 13 - berom bible

2 Kɔrintɔs 13

¹Hemo ha rɔda sè véy hom hê netat na yin. “A sé gbing-gbing sɛ̌ ba sɛ̀ bemât nuha beba kɛ betat, na be de sey há de mwat hwak a tɛ̀ kûn hɛ.” A sé ano de bà jɛk e Bwok-basa Dagwi.

²Jeng de ma sè na yin e vey hê neba, ma kana tusa bemat de bá kana ra banɛn raane tanga bwang bemât mwa. A remo de ma ka sé na yin wɛt, ko ma sé to tusa hin gbak, me ye: Jeng de ma rɔda toyo, ma rɔda tik hwak e ji min wɛt.

³Hemo hê dura a yin, a sé e Kristi de a sé ha na yin yi na me. Yɛ a sé gbɛrɛk wɛt jeng de e ra pyɛ cak na yin, ko e dura reto mɛ e tē min.

⁴Mwa ano de á sè gbɛrɛk e jeng de bá kak ɛ e ra cɔ́gɔt, ko a sé yi na retô Dagwi de a to vɔk neken. Ano arɔng, wot a sé gbɛrɛk e ji sangâl nesa mot na yɛ. Ko yi na retô Dagwi, wot e sangal na neken tanga yɛ, yaga na wot a ra a yin fwom.

⁵Ngyɛgɛt hin bato min, na yin a di kɛ yin a sé rɔɔ tumal gak e ji gwông raa arɛt; kyě masa hin bato min. Yin a tɔk, Kristi Yɛsu a sé e ji min wɛt arɛt? Ka yin a tɔk wɛt, ko hemo he dura, yin a re mara mo wɛt.

⁶Ko ma sɛt yey, yin a rɔda di, wot a ga gaba e mara mo wɛt.

⁷Wot e ra a Dagwi won, yaga na yin a ra pyɛ vyes cak wɛt. Wot e ra ano wɛt, yaga na bemat be di, wot a tumal gak sana gaba e mara mo. Ko wot e ra ano, yaga na yin a bin ra pyɛ de ya sé ryat, mwa ano de a rɔda sè a yɛn sede wot a gaba e mara mo.

⁸Yaga wot e tɔk ra pyɛ cak de yê dul tsak hâ Dagwi wɛt, ko wot e ra pyɛ de yê sɛlɛ hɛ.

⁹Wot e vɔk yey pyɛng kayɛ jeng de wot a sé gbɛrɛk, ko yin a vɔk gap. Ko wot e ra won, yaga na yin a bin sila gyat e ji kayɛ pyɛ.

¹⁰Pyɛ ma yemo de ya tɛ̀, ma jɛk pyɛ́ yemo e jeng de ma sé e hane na yin wɛt. Yaga e jeng de mê vey, mê simo na a sè a me gbing-gbing, na me ra a yin yol yi na râ fwom na reto de Darwey a nɔng me wɛt. Darwey o a nɔng me reto remo, yaga na me sɛlɛ hin, na yin a re nuyel e gwông raa, ko ra sé yaga na me gangas hin mɛ̀ e vwel wɛt.

¹¹E yɛnɛ mo, à begwa, ma sé tang in kala. Yē in ngyɛ́k na yin a sila gyat e ji kayɛ pyɛ; wok in pyɛ́ de ma sé shonong hin e ra yɛ̄; vɔk in bemín na yey rining; sangal hin tyang na bemín. Ko Dagwi de e tɛ̀ yey na bemat de e to tɛ̀sɛ neyey ne dyɛng a rɔda sangal tanga yin.

¹²Tang în bemin show e gwong de gwo dura tɛ̂ yey min. Bemât Dagwi mwa be tang in show.

¹³Nɔrɔ-rat Darwey Yɛsu Kristi, na tɛ̂ yey Dagwi, na nesa Gabik Jɛrɛ, be sè tanga yin mwa.