Read berom 2 Kɔrintɔs 2 Bible Online

2 Kɔrintɔs 2 - berom bible

2 Kɔrintɔs 2

¹Yaga ano, ma ga yong ɛ̀ e yey hom, ma rɔda to me vey na yin, na me tɛ̀ in yin a lashe yey wɛt.

²Yaga, ka sede ma tɛ̀ yey min ye lashe hɛ, ko e wà de a pɔl ɛ̀ de ê tɛ̀ na me vɔk yey pyɛng arɛt? A sé e yin de ma ga lashe a yin yey zɔng.

³Ma kana jɛk e gwong yerê gwane mo, yaga na jeng de ma pom, bemat de ba sé naka na be pɛngɛ a me yey bê de tɛ́ ɛn vemo de bê lashe a me yey wɛt. Yaga ma tɔk tsɛng-tsɛng, ka sede ma vɔk yey pyɛng, ko yin mwa yin a vɔk yey pyɛng arɔng.

⁴Yaga jeng de ma kana jɛk a yin, yey hom yá lashe hɛ ding-ding, yá to lɔ́l, ko ma tosho pyak arɔng. Ma jɛk ano, yaga na me lashe a yin yey wɛt, ko ma simo na yin a tɔk, ma tɛ̀ yey hom na yin sizɔng.

⁵Ka sede mwat hwak a ra pyɛ de ya lashe a mwat hwak yey, ko a ga lashe a me yey wɛt, ko e di hom, e bak o hwak a ga lashe a yin yey min mwa — me simo me kat ha e ra há hemo wɛt.

⁶Tábak de bwarwey min gwa ra a mwat wane mo ha ga vey a yɛ.

⁷Ko a dal naka na yin a hàla a yɛ pyɛ de a ra. Gwɛ̌ hin a yɛ gap arɔng, yaga na lashê yey ves he kwon dal gap mɛ wɛt.

⁸Yaga ano, ma sé ra won na yin, na yin a dura a yɛ, yin a tɛ̀ yey na yɛ.

⁹Pyɛ de ya tɛ̀, ma kana jɛk a yin ano ya sé, na me mara hin na me di, yin e gyeng há hom e kagwɛ gwong arɛt.

¹⁰Ka sede yin e hàla a mwat hwak pyɛ de a ra, ko me arɔng mê hàla a yɛ. Ko pyɛ de ma ga kana hàla — ka sede pyɛ cak ya sɛ́ yè hála — ma ga hàla yɛ e nuyêl Kristi yaga yin.

¹¹Me ra ano, yaga na Shetan a kwon ra pyɛ de ê dal ot mɛ̀ wɛt. Yaga wot a tɔk yerê begwong de e ra mɛ̀ fwom.

¹²Ko di, jeng de ma wɔ́ e Torowas, na me wɔ̀ shara Yɛgɛt Yat e ra Kristi, ma sɛ̀, Darwey a ga wunta a me gwong na me ra fwom e hwomo.

¹³Ko yey hom yá ka dyɛng wɛt, yaga ma sɛ̀ gwa mot Titus e hwomo wɛt. Yaga ano, ma yâng bemat o kala, ko ma re nuyel vɔk e Makedonya.

¹⁴Tik na wot a feng a Dagwi, yaga yɛ e dopse hwɔlɔ a wot gwong na wot a di wɛng, yaga wot a sé sangal e ji nesa na Kristi. Yi na wot kwong, yɛ e shara reha mɛ e kahɛ kwɔn. Reha mɛ mo re dura a wot mwat de Kristi a sé, ko wot e shara rɛ sede nesang hyɔɔlɔl.

¹⁵Yaga wot a sé sede nesang hyɔɔlɔl de Kristi e nára a Dagwi. Nesang o ne wɔ̀ wul vemo de be seres neken mɛn mwa na vemo de be kyè wɔ̀ wey.

¹⁶Nesang o na sé a vemo de be kyè wɔ̀ wey fwirting, nemo de ne vɛ̀sɛ a yɛn na reku; ko na sé a vemo de be seres neken mɛn hyɔɔlɔl, nemo de ne vɛ̀sɛ a yɛn na neken. Ko e wà de ê kyɛm a jut nedirîk fwom yerê gwomo arɛt?

¹⁷Wot a sé sede gèy bemat o wɛt; wot e kyě rɛsɛl hâ Dagwi, yaga na wot a sɛ̀ mɛ̀ pyɔlɔ̂ byɛ mot wɛt. Wey gyà! Yaga a sé e Dagwi de a tomo hot, wot e ha tsak o e nuyel mɛ, sede remo de wot a sé sangal e ji nesa na Kristi.