Read berom 2 Kɔrintɔs 3 Bible Online

2 Kɔrintɔs 3 - berom bible

2 Kɔrintɔs 3

¹Hemo ha dura, wot a ga to hwo ha há rat e ra bato mot arɛt? Kɛ yin e simo na wot a nɔng in bebok-berang de be ha há rat e ra wot, kɛ na wot a rangal vɛ yi na yin, sede remo de bemat behak be ra arɛt?

²A sé e yin de yin a sé bwok-rwang mot yerê vàne mo. Ba ga jɛk gwɛ e ra yey mot, yaga na bemât mwa be basa gwɛ, na be tɔk gwɛ arɔng.

³A sé wɛshɛrɛk, yin a sé bwok-rwang yi e vwɔ̂ Kristi, ko e wot de wot a tomo gwɛ. Ba jɛk bwok-rwang o na nshi de be jɛkɛs mɛ̀ wɛt ko na Gabik Dagwi wo neken. Ba jɛk gwɛ e ra pyɛ̂ jɛk de ba yong na beta wɛt ko e neyey bemasi.

⁴Wot e ye ano, yaga wot a tɔk tsɛng-tsɛng, Dagwi e nɔng ot reto yi na Kristi, na wot a tɔk ra pyɛ́ yemo.

⁵Vit a pyɛ de yê tɛ̀, wot a ye, wot ê kyɛm wot a ra fwom gwomo yi na tɔ́k mot pyɛ hɛ. Tɔ́k mot o ha yi na Dagwi.

⁶E yɛ de a ga tɛ̀ ot na wot a kyɛm wot a sè bemât fwôm wuna-na-sira pas mɛ. Wuna-na-sira mo ha sé badu de ba jɛk wɛt, ko ha yi na Gabik Dagwi. Badu de ba jɛk o be vey na reku, ko Gabik Dagwi he vey na neken.

⁷Badu de bà kana jɛk e ra beta be vɛ̀sɛ na reku. Jeng de Dagwi à nɔ̂ng Mose Badu mo, gbɔng nerey mɛ na nerat nà tɛ̀ bwang bayîs Mose gwà nɛp sizɔng. Mwa ano de nɛp o hà kyè wɔ̀ tala hɛ, ko BeIsrayɛl bà tɔk bɛrɛng bwang bayis mɛ cik wɛt.

⁸Ka sede Badu de be vɛ̀sɛ na reku bà vey na gbɔng nerey, ko gbɔng nerey de ne ba sè e tuk de Gabik Dagwi he ba vey ne ba dal nane mo na nerey.

⁹Fwôm Badu gwa vɔk gbɔng nerey, mwa ano de Badu mo be gang bemat na shɔt; ko fwôm Gabik gwa dal gwane mo na gbɔng nerey mwa, yaga gwo tɛ̀sɛ bemat be sè cik e bayîs Dagwi.

¹⁰Mwin, pyɛ de yà vɔk gbɔng nerey a raane yà vɔk gbɔng nerey a remo wɛt, ka sede wot a tyɛngrɛ nerey o nè raane na nè remo de na dal mwa.

¹¹Ko ka sede pyɛ de yà sè kyè wɔ̀ kwey yà vey na gbɔng nerey, ko nerêy pyɛ de ya rɔda nàra gbak-gbak na rɔda dal nere mo ding-ding!

¹²Sede remo de wot e tɔk sɛt yey mot e ra pyɛ́ yane, ko wot e tɔk ha na yey ting.

¹³Wot a sé sede Mose wɛt, yɛ de à bang bayis mɛ na kerugu, na a dul BeIsrayɛl sana shusha bayis mɛn e ra vɛ e jeng de nɛ̂p vɛ mo hà sè kyè wɔ̀ tala hɛ.

¹⁴Ko bà tɛ̀ neyey mɛn ne tɛ́ ɛn kashalang. A sé ano pere vey e tuk hemo: Kerugu mo ka rɔngɔl bang a yɛn neyey mɛn e jeng de be basa a yɛn bebok-basa wuna-na-sira roso. Ko be pat kerugu mo e jeng o zɔng de mwat a hwo sangal e ji nesa na Kristi.

¹⁵Pere vey e tuk hemo, jeng de be basa Badu Mose, kerugu mo ke rɔngɔl bang a yɛn neyey mɛn.

¹⁶Ko kayɛ jeng de mwat hwak e doyo vey na Darwey, be pat kerugu kane mo e yey mɛ.

¹⁷Ko di, e Darwey o de a sé Gabik, ko kayɛ pyɛ ya sé washak e kwɔn de Gabik Darwey o ha sé ɛ̀.

¹⁸Ko wot vemo de ba ga paa a wot kerugu mo e bayis mot, wot e dura gbɔng nerât Darwey sede wot a sé bemadobi. Gbɔng nerat o ne sege hot na wot a sè sede yɛ, ko ne kyě gwɛsɛ hɛn e ji mot. Ko gbɔng nerat o ne yís yi na Darwey, yɛ de a sé Gabik hane mo.