Read berom 2 Kɔrintɔs 4 Bible Online

2 Kɔrintɔs 4 - berom bible

2 Kɔrintɔs 4

¹Dagwi a tosho reyɔm mot, ko a nɔng ot fwom gwomo. Yaga ano, wot e ye waa wɛt.

²Wot a ga gas ot na ragâs pyɛ̂ neyaang na yê rekyen. Wot e kwɛlsɛng bemat wɛt, ko wot e vɛ́sɛ bɔs e ra hâ Dagwi wɛt. Wot e dura tsak o tɛ́ɛlɛl; yi ano, wot e tɛ̀ kawɛ mwat a di e yey mɛ wɔgɔ, negwɔn mot na sé nerat e bayîs Dagwi.

³Ka ba ka lɛrɛ Yɛgɛt Yat de wot e shara yɛ̄, ko ya sé e lɛrɛ a bemat de be kyè wɔ̀ wey zɔng.

⁴Yɛn a sé bemat-raa wɛt, yaga dagwi vwes wo jey yemo a ga bang neyey mɛn na yɛn a sè sede bebók. Dagwi vwes o mo a dul ɛn nà tɔk di negbêy Yɛgɛt Yat. Yɛgɛt Yat o ya sé e ra gbɔng nerât Kristi, yɛ̀ de a sé tyɛng sede Dagwi.

⁵Yaga wot e shara rehâ tó mot pyɛ mot wɛt, ko wot e shara rehâ Kristi Yɛsu de a sé Darwey. Ko wot, wot a sé bemat de wot e ra a yin fwom yaga rezâ Yɛsu.

⁶Yaga Dagwi à kana ye, “Tik na negbey ne nusu yi e lwīl, na ne lolo.” A sé e yɛ arɔng de a tɛ̀ negbey mɛ ne lolo e neyey mot. A ra ano, yaga na wot a bin tɔk gbɔng nerât Dagwi de ne lolo sede negbey e bwang bayîs Kristi.

⁷Ko wot de wot a vɔk yas yemo e neyey mot wot a sé sede betsûng secwem. Ano kwong, bemat be tɔk di wɔgɔ, reto remo de ra dal mwa ra yi na Dagwi, ko ra yi na wot wɛt.

⁸Mwa ano de be nɔngɔs hot negbang yi e kagwɛ gwong, ko be bunut hot wɛt. Mwa ano de be bɔrɔk a wot yey, ko wot e ye waa wɛt.

⁹Mwa ano de be zǒt hot, ko be kyɛ́ ɛn hot wɛt. Mwa ano de be dakas hot, be bomos e vwel, ko be weres na wot wɛt.

¹⁰Wot e kyě kyè e nû reku jojot, yerê reku de ba wey mɛ̀ na Yɛsu. Pyɛ́ mo ye té ano, yaga na be dura nekên Yɛsu e babek mot wɛshɛrɛk arɔng.

¹¹Yaga wot de wot a sé beken wot a sé sangal e nû reku kayɛ jeng yaga rezâ Yɛsu. A sé ano, yaga na be dura wɛshɛrɛk neken mɛ e babek mot de be kushu.

¹²Hemo he dura, reku ra sé ra fwom e ji mot, ko neken na sé ra fwom e ji min.

¹³Bà jɛk e Bwok-basa Dagwi wɔgɔ, “Ma kana sey tsak o, ko yaga ano, ma ga kana ha.” Sede remo de wot a sey tsak o e gwong gwane mo, ko wot e ha ano arɔng.

¹⁴Wot a tɔk, yɛ de á sene Darwey Yɛsu yi e reku a rɔda sene hot sede Yɛsu, na a vey na wot tanga yin e nuyel mɛ.

¹⁵Pyɛ́ yemo mwa ya sé yaga sɛlɛ min. Sede remo de Dagwi e gwɛ̌ dura a bemat nerat mɛ, nepyak bemat o ne gwɛ̌ hɛn jojot, ko nepyak bemat de be feng a Dagwi ne gwɛ̌ hɛn arɔng. Yi na ra ano, be nɔ̂ng Dagwi o gbɔng nerey.

¹⁶Yaga ano, wot e ye waa wɛt. Mwa ano de bemat be bɛrɛng babek mot be sɔ́ ɛn, ko be turu hot bepas e yey mot kahɛ tuk.

¹⁷Reyɔm de wot e sɔ a remo ra sé sɛl, ko ra to sé yaga jeng tyɔng zɔng. Ré tɛ̀ ot na wot a sɛ̀ gbɔng nerat de na vɔk yɛnɛ wɛt, ko na dal reyɔm rane mo mwa.

¹⁸Yaga ano, wot e tik nà shusha bayis mot e ra pyɛ́ de be di, ko wot e shusha vɛ e ra pyɛ́ de be di yɛ̄ wɛt. Yaga pyɛ́ de be tɔk di ya sé yaga jeng tyɔng zɔng, ko pyɛ́ de be tɔk di yɛ̄ wɛt ya sé yemo de ya vɔk yɛnɛ wɛt.