Read berom 2 Kɔrintɔs 5 Bible Online

2 Kɔrintɔs 5 - berom bible

2 Kɔrintɔs 5

¹Yaga wot a tɔk, ka sede ba wey na buk de wot a sangal e ji gwɛ wɔgɔ, rebek mot rê jey yemo, ko Dagwi a rɔda nɔng ot duk hwak e lagwi. Duk o wa sé lɔ de ba lɔk na vɔ bemasi wɛt, ko wa rɔda nàra gbak-gbak.

²Ko a remo, wot e vos yey, yaga wot a vɔk cwey duk mot o wo lagwi, na wot a tɛ̀ wɛ sede rugu.

³Yaga, ka sede wot a bang ot na wɛ sede mwat a tɛ̀ rugu, ko ba rɔda sɛ̀ ot warap wɛt.

⁴Jeng de wot a rɔngɔl e buk gwomo gwô jey, wot e vos yey, ko a sé sede pyɛ́ ye yɛklɛ hot. A sé yaga wot e simo be gas ot na rebek mot rê jey yemo wɛt, ko a sé yaga wot e simo be bang ot e rak o na rebêk lagwi, yaga na pyɛ de ya sé cen ye fugut pyɛ de ye wey.

⁵A sé e Dagwi de a yong ot yaga sege hane mo, ko a ga nɔng ot Gabik mɛ, na he sè pyɛ de yê tɛ̀, wot a tɔk tsɛng-tsɛng, ê nɔng ot pyɛ̂ mwa de a ga sira na a nɔng ot yɛ̄.

⁶Yaga ano, wot a vɔk yey ting jojot. Wot a tɔk, jeng de wot a sé sangal e ji rebek remo, wot a sé yikyik yi na Darwey.

⁷Yaga wot e tɔk di Darwey o na bayis e ngyen wɛt, ko a sé yi na sêy tsak o zɔng de wot e wuna hot na yɛ.

⁸Ko mwin, wot a vɔk yey ting wɔgɔ, a dal a wot na wot a hàla sángal e ji rebek remo, na wot a sangal na Darwey.

⁹Yaga ano, gbɔng pyɛ de wot a tɛ̀ e yey mot ya sé na wot a pɛngɛ a yɛ yey, kɛ wot a sé sangal e ji rebek remo kɛ wot a hàla rɛ ayi.

¹⁰Yaga a sé gbing-gbing na mwa hot wot a ba tumal tuhak e nuyêl Kristi na a ra a wot shɔt. E tuk o, kawɛ e ji mot e ba sey pyɛ de ya jam a yɛ yaga pyɛ́ de á ra jeng de á sè sangal e ji rebek remo, kɛ pyɛ́ mo yá sè ryat kɛ yá sè vyes ow.

¹¹Sede remo de wot a tɔk bengyip Darwey, wot e tē ngyɛ́k na wot a tɛ̀ bemat be sey há mot. Dagwi a tɔk kayɛ pyɛ e ra wot, ko me sɛt yey, yin a tɔk pyɛ́ mo e yey min arɔng.

¹²Wot a to sé ha há rat e ra bato mot vey na yin wɛt, ko wot a sé nɔng in gwong na yin a ra kaa na wot. Yi ano, yin ê tɔk toyo a vemo de be dak kaa e ra pyɛ́ de be bɛrɛng na bayis e tô negwɔn mwat o.

¹³Ka wot e ra sede ba dɔnɔ hot, ko a sé yaga rezâ Dagwi. Ko ka sede báre mot ha sé tyɛng, ha sé ano, yaga na yin a sɛ̀ nerat o arɔng.

¹⁴Tɛ̂ yey de Kristi a tɛ̀ na wot, e hɛ de ha vɔk reto e ra wot. Ko wot a tɔk, mwat gwining a ku yaga bemât mwa, ko yaga ano, mwa bemat ba ga kushu a wane.

¹⁵Yɛ a ku yaga bemât mwa, yaga na mwa vemo de be sangal na neken be to re nuyel na sangal o yaga bato mɛn pyɛ mɛn wɛt, ko yaga na yɛn a sangal yaga yɛ de a ku, ko ba to sene hɛ yi e reku yaga yɛn arɔng.

¹⁶Yaga ano, e ngamo nuyel wot ê to jut báre bemât jey yemo na wot a mara mɛ̀ mwat hwak wɛt. Mwa ano de wot á kana mara Kristi e gwong gwane mo, ko wot e to ra ano a remo wɛt.

¹⁷Ka sede mwat hwak a wuna hɛ na Kristi, ko a ga tɛ́ ɛ mwat pwas. Pyɛ ryoso ya ga kwey, ko pyɛ pyas ya ga vey!

¹⁸Pyɛ́ yemo mwa ya yi na Dagwi, yɛ de a ga gang-nshi na wot yi na Kristi. Ko a ga nɔng ot fwôm ha a bemat wɔgɔ, Dagwi e simo a gang-nshi na yɛn.

¹⁹Reha mot o ra sé ngan: Dagwi á sè gang-nshi na bemât jêy mwa yi na Kristi. A to vɔk e yey mɛ buru de bemat o ba ga kana ra wɛt; ko yɛ a ga tik e vɔ mot reha de re dura gwong de a gang-nshi na bemat.

²⁰Yaga ano, wot a sé betom-vwel vê Kristi. Ko Dagwi a sé yishi bemat vey na yɛ, ko a sé ra ano yi na wot. Wot e ra won na yin e tô Kristi wɔgɔ: Tík in, na Dagwi a gang-nshi na yin.

²¹Kristi á sè sana banɛn, ko Dagwi a tɛ̀ ɛ a tɛ́ ɛ banɛn yaga wot. A ra ano, yaga na wot a tɛ́ ot cik e bayîs Dagwi, yaga wot a sé sangal e ji nesa na Kristi.