Read berom 2 Kɔrintɔs 6 Bible Online

2 Kɔrintɔs 6 - berom bible

2 Kɔrintɔs 6

¹Sede remo de wot a sé besâ fwôm Dagwi, wot e shonong e ra yin wɔgɔ, yin kwon jut nerat de Dagwi a dura a wot sede pyɛ cak kpɛɛ wɛt.

²Wok in há de Dagwi à ha: “Ma wok o e jeng de ma dura, me simo hwo; ko ma sɛlɛ hwo e tuk de ma sey neken mō.” Di in, jeng a yemo de Dagwi e dura a yin simo mɛ! Tuk a hemo de be sey neken min!

³Wot e simo na mwat hwak a sɛ̀ buru hak e ji fwom mot wɛt. Yaga ano, wot e ra pyɛ cak de ye tɛ̀ mwat hwak a ye bugurɛk wɛt.

⁴Ko wot e dura e kagwɛ gwong, wot a sé bemât fwôm Dagwi: Wot e niri sizɔng e ji reyɔm detidetu, e ji negbang, na e ji pyɛ́ de ye bɔrɔk hot.

⁵Bemat bá dakas hot, bá tɛ̀sɛ hot e ngyang, ko bá tɛ̀sɛ bemat be hwosom e ra wot. Wot á pɛngsɛl hot e de râ fwom, wot á pɔlɔs ywey, ko wot á wokos vyong arɔng.

⁶Wot e dura, wot a sé bemât fwôm Dagwi e gwông sangal mot de gwa sé jɛrɛ; wot e to dura ano yi na tɔ́k de wot a vɔk, yi na gwong de wot e niri, yi na nerat de wot e ra a bemat, yi na fwom de Gabik Jɛrɛ he ra yi na wot, tanga yi na gwong de gwa sé mwin de wot e tɛ̀ yey na bemat.

⁷Wot e dura ano yi na hâ rehâ tsak o tanga yi na retô Dagwi. Pyɛ̂ como mot ya sé ngan: Wot a sé cik e bayîs Dagwi; wot e ra fwom na pyɛ́ mo na vwɔ yege e de ragâs yol ko na vwɔ mwɛlɛng e de gyepes bato mot.

⁸Bé nɔng ot nerey, ko be byɛs hot; be ha há rat e ra wot, ko be ha há ves arɔng. Wot e ha tsak o, ko mwa ano, be bɛrɛng hot sede wot a sé bemât bɔs.

⁹Bemat ba tɔk ot, ko mwa ano, be ra sede ba tɔk ot wɛt; wot a sé sede wot ê ku, ko di, wot e re nuyel na neken. Be tabak hot, ko mwa ano, be mɔbɔs hot wɛt;

¹⁰wot a vɔk lashê yey, ko mwa ano, wot a vɔk yey pyɛng kayɛ jeng; wot a sé bepɛng, ko mwa ano, wot e tɛ̀sɛ bemat pyak be sè bedaberey; wot a vɔk pyɛ wɛt, ko mwa ano, wot a vɔk kayɛ pyɛ.

¹¹À yin bemât Kɔrintɔs, wot a ga ha na yin washak, ko wot a ga wunta a yin yey mot pyot.

¹²Wot a vɔk pyɛ cak e ra yin e yey mot wɛt, ko e yin de yin a vɔk pyɛ cak e ra wot.

¹³Ma sé ha na yin, yin de yin a sé sede nèy hom, ma sé ra won wɔgɔ, wunta hin yey min vey na wot arɔng!

¹⁴Yin kwon man bato min na vemo de ba sé bemat-raa wɛt. Yaga e sɛ́ de ya wuna pyɛ de ya sé cik na yemo de ya sé cik wɛt arɛt? Kɛ e yerê nɛ̌ nesa de na rɔda sè e tê negbey na lwīl arɛt?

¹⁵E sɛ́ de yê tɛ̀ Kristi tanga gwɔ̀m cēng be sangal tyang na bemɛn arɛt? E sɛ́ de ya sé e tê mwat de a sé mwat-raa tanga mwat de a sé mwat-raa wɛt arɛt?

¹⁶E sɛ́ de ya wuna duk de Dagwi e sangsal ɛ̀ tanga cī arɛt? Yaga e wot vɛ de wot a sé duk de Dagwi wo neken e sangsal ɛ̀ mo. Sede remo de Dagwi pyɛ mɛ à ye, “Ma rɔda sangal tanga yɛn, na me kyě kyè e tē mɛn; ma rɔda sè Dagwi mɛn, ko yɛn a rɔda sè bemat hom.”

¹⁷Yaga ano, Darwey e tē, “Nusu hin yi e tē mɛn, na yin a sè detu na yɛn. Ra pyɛ cak de ya sé ligis wɛt, ko ma rɔda sey in na vɔ ba.

¹⁸Ma rɔda sè Da min, ko yin a rɔda sè nèy bewen na nèy behwong hom. Darwey Wo Retô Mwa e tē ano.”