Read berom 2 Kɔrintɔs 7 Bible Online

2 Kɔrintɔs 7 - berom bible

2 Kɔrintɔs 7

¹À besâ yey hom, a sé yaga wot de ba ga sira e ra pyɛ́ yemo mwa. Yaga ano, tik na wot a paa bato mot yi e kayɛ pyɛ de ye tɛ̀ rebek na yey mot ye sè ligis. Ko tik na wot a tē ngyɛ́k na wot a sè jɛrɛ e ji pyɛ̂ mwa, yaga wot e sap Dagwi.

²Tik na yey min ye sè pyot vey na wot. Wot a ga buru a mwat hwak pyɛ cak wɛt, wot a ga lashe mwat hwak wɛt, ko wot a ga mɔt mwat hwak wɛt.

³Ma sé ha pyɛ́ yemo na me gang in na há wɛt. Ma ga kana ha gyam wɔgɔ, wot a tɛ̀ yey mot mwa na yin, ko wot e simo na wot a sè tanga yin, kɛ wot a sé beken kɛ wot ê ku ayi.

⁴Yey hom ye tó na yin ko tyɔng wɛt, ko me ra gbɔng kaa na yin! E ji reyɔ̂m mwa de wot e sɔ, a sé a me kàgarak sizɔng; ko yey hom ya pɛngɛ vit a yere mo.

⁵Jeng de wot á kana pom e sevwêl Makedonya, wot á sɛ̀ pɔngɔ wɛt. Bá teshe na wot e kagwɛ gwong, bá ragas repugu na wot e jey, ko e ji yey mot wot á vɔk bengyip.

⁶Ko Dagwi de e gwɛ̌ a vemo de a sé a yɛn yɔɔm gap, á gwɛ̌ a wot hɛ yi na vêy Titus.

⁷Á sè e véy mɛ mo zɔng wɛt de ha tɛ̀ wot a sè wɛng-wɛng, ko á sè e há de a vey mɛ̀, de ha dura gwong de yin a gwɛ̌ a yɛ gap. Yɛ a ha a wot, yin a vɔk cwey di me, yey min ya lashe hɛ ding-ding, ko yin e simo na yin a tumal bagat na me e ji reyɔm hom. Yaga ano, yey pyɛng hom ya gwɛ̌ sila hɛ tyɔng wɛt.

⁸Ka bwok-rwang hom gwa ka lashe a yin yey, ko a sé a me pyɛ vyes de ma jɛk ano mo wɛt. Ma yâng ye tɔgɔ jeng de ma di bwok-rwang hom o gwa mǎ hin yaga jeng tyɔng zɔng.

⁹Ko a remo, ma vɔk yey pyɛng; a sé yaga ma tɛ̀ in na yin a lashe yey wɛt, ko a sé yaga lashê yey min o há tɛ̀ in na yin a sege negwɔn min. Dagwi a ra fwom na lashê yey min o, ko yaga ano, wot a mǎ hin e gwong hwak wɛt.

¹⁰Yaga lashê yey de Dagwi e ra fwom na hɛ he tɛ̀ mwat a doyo yi e banɛn mɛ, ko he tɛ̀ Dagwi a sey nekên mwat o. Yerê lashê yey hemo he tɛ̀ mwat a ye tɔgɔ e ra hɛ wɛt; ko lashê yey yerê hê jey he vey na reku.

¹¹Di in, pyɛ́ de lashê yey de Dagwi a ra fwom na hɛ ha ga vey a yin mɛ̀ a yet: Ha ga tɛ̀ in na yin a tsiba hin e begwong min; ha ga to tɛ̀ in na yin a simo sizɔng na yin a dura a bemat, yin e ra pyɛ vyes cak wɛt. Yerê shom de yin e ra, yerê bengyip de yin e vo, yerê cwey di me de yin a vɔk, yerê yé ngyɛ́k min, yerê simo min na yin tabak bemat de ba buru — pyɛ́ yemo mwa ya vey yi na lashê yey min o. Yin a ga dura bato min e kagwɛ gwong, yin a ga ra pyɛ vyes cak e ji há hemo wɛt.

¹²Ko mwa ano de ma kana jɛk a yin, ma jɛk yaga mwat de a buru mo wɛt kɛ yaga mwat de ba buru a yɛ arɔng wɛt. Ko ma jɛk, yaga na yin pyɛ min yin a bin di e nuyêl Dagwi, yin a tɛ̀ nehywɛ min e ra wot naka.

¹³Pyɛ́ yemo mwa ya gwɛ̌ a wot gap. Ko gap mot ha gwɛ̌ hɛ zɔng wɛt, ko wot á vɔk yey pyɛng vit a yere mo jeng de wot á di yerê yey pyɛng de Titus á vɔk. Yaga mwa hin yin á sɛlɛ na yin a tɛ̀ ɛ a sè wɛng-wɛng.

¹⁴Ma ga kana ra a yɛ kaa min, ko yin a ga nɔng me rekyen wɛt. Tyɛng sede remo de kayɛ pyɛ de wot á ha a yin yá sè tsak o, ko ano arɔng ba sɛ̀, râ kaa min de wot a ra a Titus ha sé tsak o arɔng.

¹⁵Ko tɛ̂ yey mɛ yaga yin ha dal hê raane jeng de e bare, mwa hin yin a gyeng há mɛ, ko yin a sey ɛ́ na bengyip na vôw rebek.

¹⁶Ma vɔk yey pyɛng, yaga yin a sé bemat de me tɔk tó yey na yin e pyɛ cak ko tyɔng wɛt.