Read berom 2 Kɔrintɔs 8 Bible Online

2 Kɔrintɔs 8 - berom bible

2 Kɔrintɔs 8

¹À begwa, wot e simo na yin a tɔk pyɛ de Dagwi a ra yi na nerat mɛ de a dura a bemât be-ekilisiyâ Makedonya.

²Ba mara hɛn ding-ding na reyɔm detidetu. Ko yɛn a sila na yey pyɛng e ji negbang nane mo, ko ya tɛ̀ ɛn yɛn a nɔng nɔrɔ de ha sé pyak arɔng, mwa ano de yɛn a sé bepɛng tyɔng wɛt.

³Me nɔng nuha, yɛn a nɔng nɔrɔ̂ kayɛ pyɛ de yɛn a tɔk nɔng, ko yɛn a pere nɔng pyɛ de ya dal gap mɛn arɔng. Ko yi na simo mɛn pyɛ mɛn,

⁴yɛn a ra won na wot tyɔng wɛt, na wot a simo a yɛn na yɛn a sɛ̀ nerât tula nɔrɔ, na be sɛlɛ mɛ̀ bemât Dagwi e sevwêl Yudiya.

⁵Pyɛ de yɛn a ra ya dal yemo de wot a bare yɛn a rɔda ra. Yɛn a tānga nɔ̂ng Darwey bato mɛn e ngyen, ko e bama mo, yɛn a nɔng ot bato mɛn tyɛng na pyɛ de Dagwi e simo.

⁶Pyɛ ma yemo de ya tɛ̀, wot a shonong e ra Titus, na a sɛlɛ hin, na yin a yɛnɛ fwôm tulâ nɔrɔ̂ tɛ̂ yey gwane mo, yaga e yɛ wɛ de a tānga susu gwɛ.

⁷Yin a shǎl e ji kayɛ pyɛ: E ji sêy tsak o, e ji há, na e ji tɔ́k, e ji té ngyɛ́k e kayɛ pyɛ, na e ji tɛ̂ yey min vey na wot. Yaga ano, wot e simo na yin a shǎl e ji nɔrɔ̂ tɛ̂ yey o arɔng.

⁸Ma sé nɔng in redu wɛt, ko me ha a yin e ra gwong de bemat behak be tē ngyɛ́k e de sɛlɛ̂ behak, yaga na me bin di kɛ tɛ̂ yey min ha sé mwin kɛ mwin wɛt.

⁹Yaga yin a tɔk nerat de Darwey mot Yɛsu Kristi a dura a wot: Mwa ano de a vɔk yas pyak, ko a hàla yɛ, a tɛ́ ɛ pwɛng, yaga na yin a sɛ̀ nerat o, yaga na, yi na nepɛng mɛ mo, yin a bin tɛ́ in bedaberey.

¹⁰Ko ma sé vo a yin redu ret ngan e ra pyɛ de ya dal a yin e ji pyɛ́ yemo: Nák, e yin de yin á sè vê yel de yin á simo na yin a nɔng nɔrɔ mo, ko yin á to sè vê yel e nɔngɔ̂s nɔrɔ mo arɔng.

¹¹Yaga ano, yɛnɛ hin fwom o! Yin á kana ye ngyɛ́k e jeng de yin á kana susu fwom o. A remo, ré in nuyel na ye ngyɛ́k ano, na yin a yɛnɛ gwɛ. Nɔng in tyɛng na nepyak pyɛ de yin a vɔk.

¹²Ka sede mwat a vɔk yêy nɔ̂ng nɔrɔ, ko Dagwi a rɔda sey nɔrɔ mɛ mo yi na pyɛ de a vɔk, ko a rɔda rangal hɛ yi na pyɛ de a bidɛ wɛt.

¹³Me ye wɛt wɔgɔ, bē tɛt a behak nedirik o na be gwɛ̌ yɛklɛ hin na nɛ. Wot e simo kawɛ mwat a sè tyɛng na gwɛ̀ mɛ.

¹⁴E jeng yemo, a sé e yin de yin a vɔk pyɛ́ pyak, ko yin e tɔk sɛlɛ vemo de ba vɔk pyɛ cak wɛt. Tuhak, jeng de e ba sè e yɛn de be ba vɔk pyɛ́ pyak, yɛn e ba tɔk sɛlɛ hin arɔng. Yi ano, kawɛ mwat a rɔda sè tyɛng na gwɛ̀ mɛ.

¹⁵Sede remo de bà jɛk e Bwok-basa Dagwi wɔgɔ, “Mwat de á tula pyak á vɔk pyɛ de ya kat a yɛ wɛt; ko yɛ de á tula tyɔng á vɔk pyɛ de ya radɛ a yɛ wɛt.”

¹⁶Wot a feng a Dagwi de a tɛ̀ Titus a ye ngyɛ́k na a sɛlɛ hin, tyɛng sede remo de wot e ye ngyɛ́k arɔng.

¹⁷Titus o a sey yíla mot na yey pyɛng zɔng wɛt, ko a ye ngyɛ́k sizɔng, a tɛ̀ e yey mɛ na a vey e hamo na yin.

¹⁸Ko wot a sé tomo a yin na gwa mot mwat-raa hwak tanga yɛ. Bemât be-ekilisiya mwa be somo gwa wane mo yaga fwôm sharâ Yɛgɛt Yat de e ra.

¹⁹A sé ano zɔng wɛt, ko be-ekilisiya mo ba kasa hɛ na a raa hot arɔng jeng de wot e kyè wɔ na nɔrɔ̂ tɛ̂ yey o. Wot e ra ano, yaga na fwom o gwo tɛ̀ be nɔ̂ng Darwey gbɔng nerey, na wot a to dura, wot a vɔk cwey sɛlɛ mɛn.

²⁰E rà nɔrɔ mo de bemat ba viri vɔ mɛn na be nɔng — wot e simo na wot a vɔk hɛ e gwong de mwat hwak ê tɔk ha há ves e ra gwɛ wɛt.

²¹Yaga ano, wot e tɛ̀ e yey mot, na wot a ra pyɛ de ya sé tyɛng e bayîs Darwey zɔng wɛt ko e bayîs bemât mwa arɔng.

²²Ko wot a to sé tomo yɛn vane mo tanga gwa mot o hwak mwat-raa, de wot a ga mara hɛ zang pyak, ko a ga dura a wot e gwòng detidetu, e tɛ̀ yey mɛ mwa e pyɛ́ de e ra. Ko a remo, sede remo de a di, yin a sé bemat de be tó yey na yɛn ko tyɔng wɛt, ko a gwɛ̌ tɛ̀ yey mɛ na a vey sɛlɛ hin.

²³Ko di, yɛ Titus, yɛ a sé sâ gafiri hom, ko a sé sâ fwom hom e de sɛlɛ min. Ko begwa mot bemat-raa vemo mo yɛn a sé betom be-ekilisiya, ko yɛn e tɛ̀ bemat be nɔ̂ng Kristi gbɔng nerey.

²⁴Yaga ano, dura hin a bemat, yin a tɛ̀ yey na yɛn sizɔng. Yi na ra ano, bemât be-ekilisiyâ mwa be tɔk di, jeng de wot á ra kaa e ra yin, wot á ha bɔs wɛt.