Read berom 2 Kɔrintɔs 9 Bible Online

2 Kɔrintɔs 9 - berom bible

2 Kɔrintɔs 9

¹A ka sé gbing-gbing mwa wɛt na me jɛk a yin e ra rehâ sɛlɛ de wot a rɔda nɔ̂ng bemât Dagwi e sevwêl Yudiya.

²Yaga ma tɔk, yin e simo tyɔng wɛt na yin a sɛlɛ, ko ma ga kana kyě ra a bemât Makedonya kaa e ra há mo. Ma tang ɛn, yin de yin a sé e sevwêl Akaya yin á yong in yimô nák na yin a nɔng sɛlɛ mo. Ko yé ngyɛ́k min o ha tɛ̀ bwarwêy bemat e ji mɛn ba hwo ra fwom o.

³A remo, ma sé tomo begwa mot bemat-raa vey na yin, yaga na râ kaa de wot a ra na yin e ra pyɛ́ yemo he tɛ́ ɛ yapyi zɔng wɛt. Ko tik na yin a bin yong in, tyɛng sede remo de ma ga ye, yin a rɔda sè e yong in.

⁴Yaga, ka sede bemât Makedonya behak ba vey tanga me, ko ba sɛ̀, yin a ga yong in wɛt, a rɔda sè a wot pyɛ rekyen, yaga wot a ga kana tó yey e ra yin wɛt. Ko e yin de yin a rɔda dal na vô rekyen o.

⁵Yaga ano, ma di a sé tyɛng na me shonong a begwa mot bemat-raa mo, na be tānga vey na yin e ngyen. Yɛn a rɔda tɔk yɛnɛ yông kayɛ pyɛ e ra nɔrɔ de yin a ga kana ha wɔgɔ, yin a rɔda nɔng hɛ purak gyam na me vey. Yi ano, nɔrɔ mo ha rɔda sè e yong; ko ha rɔda dura, yin a nɔng hɛ na vɔ min e viri, ko a sé yaga ba tɛ̀ in na retek wɛt.

⁶Bàre hin na pyɛ yemo ngan: Mwat de e tus pyɛ́ tyɔng a rɔda yɛt bwal de gwa sé tyɔng arɔng. Ko mwat de e tus pyɛ́ purak a rɔda yɛt bwal de gwa sé purak arɔng.

⁷Tik na kawɛ mwat a nɔng pyɛ de a ga kana yong e yey mɛ, a rɔda nɔng. A kwon nɔng sede e simo a nɔng wɛt, kɛ sede ba tɛ̀ ɛ gbing-gbing arɔng wɛt. Yaga Dagwi e tɛ̀ yey mɛ na mwat de e nɔngɔs nɔrɔ mɛ na yey pyɛng.

⁸Ko Dagwi a vɔk reto na a nɔng ot kayɛ pyɛ de ya sé ryat, yaga na kayɛ jeng yin a bin vɔk kayɛ pyɛ de yin e simo. Ko a rɔda nɔng in na yin a vɔk pyɛ de ya pɔl arɔng, na yin a ra mɛ̀ tomong rat detidetu.

⁹Sede remo de bà jɛk e Bwok-basa Dagwi wɔgɔ, “A ga nɔ̂ng bepɛng nɔrɔ mɛ shɛrɛk, ko nerat mɛ ne nàra gbak-gbak.”

¹⁰Ko di, Dagwi de e nɔngɔ̂s mwât hôw cap yére de a rɔda tus, yɛ̀ de e nɔngɔ̂s bemat pyɛ de yɛn ê re, yɛ a rɔda nɔng in yére de yin ê tus na a tɛ̀ yɛ̄ ye ras. Ko a rɔda tɛ̀ bwal min gwo sè pyak yi na tomong rat min de ba sé shɛrɛk.

¹¹A rɔda tɛ̀ in na yin a sè bedaberey e kagwɛ gwong, yaga na yin a bin nɔng nɔrɔ purak e kayɛ jeng. Ko yi ano, bemat pyak ba rɔda feng a Dagwi yaga nɔrɔ min de ba sey yi na wot.

¹²Sɛ́lɛ hemo de yin e ra mo he nɔngɔ̂s bemât Dagwi pyɛ́ de yɛn e simo zɔng wɛt, ko he tɛ̀ bemat pyak be dura feng mɛn de vit a yerê hɛ vɔk na Dagwi.

¹³Sɛ́lɛ min o ha rɔda dura yerê bemat de yin a sé. Hemo hê tɛ̀ bemat pyak be nɔ̂ng Dagwi nerey, yaga yɛn a di gwong de yin e gyeng Yɛgɛt Yât Kristi de yin e tē, yin a sey tsak o na yɛ̄. Yɛn e to nɔ̂ng Dagwi nerey, yaga yin e gas pyɛ́ min na yɛn tanga na bwang bemât mwa na vɔ min e viri.

¹⁴Yɛn a rɔda ra won yaga yin, ko yɛn a rɔda vɔk cwey di in yaga nerat de vit a yerê nɛ nemo de Dagwi a dura a yin.

¹⁵Tik na wot a feng a Dagwi yaga nɔrɔ mɛ de ha dal gâp há mot!