Read berom Galatya 1 Bible Online

Galatya 1 - berom bible

Galatya 1

¹Bwok-rwang gwomo yi e vwɔ hom Bulus, tom Yɛsu. A sé e bemasi de ba nɔng me fwom gwomo wɛt, a to sé e mwasi hwak de a kasa me yaga fwom o wɛt, ko a sé e Yɛsu Kristi pyɛ mɛ de a kasa me, tanga Dagwi Da de a sene hɛ yi e reku.

²Me na mwa begwa, bemat-raa, de ba sé tanga me, wot e tang in show, à yin bemât be-ekilisiya de yin a sé e yɛnɛ̂ sevwêl Galatya:

³Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

⁴A sé e Yɛsu Kristi mo de a nɔng neken mɛ, yaga na a viri hot yi e banɛn mot, yaga na a to viri hot yi e pyɛ́ vyes yê jeng yemo. Jeng de a ra ano, a ra pyɛ́ de Dagwi Da mot a simo.

⁵Tik na gbɔng nerey ne sè ne Dagwi nesheneshey! Ano.

⁶A sé a me pyɛ langat na yin sizɔng! Dagwi á kana yila hin yi na nerât Kristi na yin a sè bemɛ. Ko mwa ano, yin a sé hàlsa hɛ dey-dey, na yin a hwo sey reha rehak detu de be tâng rɛ, à yɛgɛt yat.

⁷Ko e ji hâ mwin, vit a reha rehak de ra sé yɛgɛt yat sɛ̌ remo de ma kana ha a yin. Ko a sé e bemat behak de ba sé bɔrɔk hin, na be jāma be sege Yɛgɛt Yat e ra Kristi zɔng.

⁸Ko ka a ka sé wot kɛ tom-lagwi hwak de a vey na a ba shara a yin yɛgɛt yat cak de ya sé detu na yemo de wot á kana shara a yin, tik na gawey de ha rɔda gas ɛ na Dagwi nesheneshey he hwo e ra yɛ!

⁹Wot á kana ha a yin a raane, ko ma to sé ha a yin a remo: Ka sede mwat hwak a sé shara a yin yɛgɛt yat cak detu na yemo de yin á kana sey, tik na gawey de ha rɔda gas ɛ na Dagwi nesheneshey he hwo e ra yɛ!

¹⁰Yin a sé bare, ma sé ra ano na bemat kɛ Dagwi be somo me arɛt? Kɛ ma sé tē ngyɛ́k na me pɛngɛ a bemat yey arɛt? Kée wey! Ka ma yâng sé rɔngɔl jāma na me pɛngɛ a bemat yey, ka ma yâng sé sam Kristi wɛt.

¹¹À begwa, me simo na yin a tɔk, Yɛgɛt Yat de ma kana shara a yin ya yi na mwasi wɛt.

¹²Ma sey yɛ̄ na mwasi wɛt, ko a sé e mwasi de a to basa a me yɛ̄ arɔng wɛt. Á sè e Kristi pyɛ mɛ de á dura a me yɛ̄ wɛshɛrɛk.

¹³Yin á kana wok rehâ sángal hom hê raane jeng de ma rɔɔ raa negwɔn BeYuda. E jeng o, ma sè kat tak a bemat-raà Dagwi reyɔm, ko ma ye ngyɛ́k na me wey na yɛn mwa.

¹⁴Ma dal bezamang hom pyak na raà negwɔn BeYuda, ko ma nɔng gap hom mwa e ji raà neha bedabeda hom.

¹⁵Ko Dagwi a kasa me yimo be rɔɔ nà tɔ me. Yi na nerat mɛ a to yila me na me ra a yɛ fwom. Ko jeng de a di a sé naka,

¹⁶a dura a me wɛshɛrɛk mwat de Hwey mɛ mo ha sé. A ra ano, yaga na me bin shara Yɛgɛt Yat e ra hɛ vɔk e tê bemât yére dyuk. E jeng o, ma wɔ̀ vo redu na mwasi hwak wɛt,

¹⁷ko ma ka kwey vɔk e Yɛrusalɛm arɔng wɛt, na me wɔ̀ di vemo de bá tānga sè betom Yɛsu e nuyel hom. Ko ma kyè cik vɔk e sevwêl Arabya, e bama mo, ma toyo vɔk e repomô Damaskus.

¹⁸E bamâ neshey netat, ma de wɔ́ e Yɛrusalɛm, na me bin wɔ̀ tɔ́k me na Bitrus, ko ma sangal e hwomo na yɛ nepɔlɔ kuru na nɛ netungun (15).

¹⁹Ko ma di hwak e ji betom Yɛsu mo wɛt sɛ̌ Yakɔp zɔng, yɛ gwa Darwey mot.

²⁰Ma sé ha há hemo e nuyêl Dagwi wɔgɔ, pyɛ de ma sé jɛk a yin ya sé mwin, ma sé vɛ́ bɔs wɛt!

²¹E bama mo, ma kyè vɔk e bavwêl Sirya na Silisiya.

²²E jeng o, bemat-raa de bá sè e ji be-ekilisiyâ Kristi vê sevwêl Yudiya bá kana di me wɛt,

²³ko yɛn á wokos há de bemat ba tē zɔng wɔgɔ, “Yɛ womo de á kana tak a wot reyɔm a raane a ga doyo, a to sé basa a bemat gwong de yɛn ê sey tsak o na Kristi; ko a raane, yɛ á kana jāma na a wey na vemo de ba sey tsak o mo!”

²⁴Ko yɛn a nɔ̂ng Dagwi nerey yaga pyɛ de a ra yi na me.