Read berom Galatya 2 Bible Online

Galatya 2 - berom bible

Galatya 2

¹E bamâ neshey kuru na nɛ nenaas (14), ma toyo vɔk e Yɛrusalɛm tanga Barnabas, ko ma vɔk ɛ̀ Titus arɔng.

²Ma wɔ́ e hwomo, yaga Dagwi a dura a me wɛshɛrɛk, me wɔ. E jeng o, ma man na bemât nuyêl ekilisiya mo e bak gwining, ko ma misang a yɛn Yɛgɛt Yat de me shara a vemo de ba sé vê yére dyuk. Ma ra ano, yaga ma simo na fwom de ma sé ra a remo tanga gwomo de ma kana ra a raane gwo kwon sè yapyi wɛt.

³Ko mwa ano de Titus, de á sè tanga me, a sé WoGirik, ko yɛn a ka tɛ̀ gbing-gbing be wɔ́ a yɛ e cwɛl wɛt.

⁴Hâ wɔ́ e cwɛl o ha sogo, yaga bemat behak de ba tē sede yɛn a sé bemat-raa ba yel yaang. Yɛn a yel sede bemât wɛrɛm, na be bɛrɛng yerê sángal mot hê washak de wot a sɛ̀ yi na sangâl nesa mot na Kristi Yɛsu, yaga yɛn a simo be tɛ̀ ot wot a tɛ́ ot sede besam Badu BeYuda.

⁵Ko wot a nɔng ɛn gwong ko tyɔng wɛt, yaga na wot a bin gyeng a yin tsak hâ Yɛgɛt Yat sana sege wɛ.

⁶Ko bemat de ba jut ɛn, yɛn a sé bemât nuyel yɛn a vo a me redu rehak repas o wɛt. (Ma sé ye ngan, mwa ano de bemat o bá sè bemât nuyel, ko ma jut nerey mɛn nane sede pyɛ cak wɛt, yaga Dagwi e dúsa simô bemat behak wɛt.)

⁷Ko yɛn a di, Dagwi a nɔng me fwôm sharâ Yɛgɛt Yat vɔk na vemo de ba sé vê yére dyuk, tyɛng sede remo de á kana nɔ̂ng Bitrus fwôm sharâ Yɛgɛt Yat vɔk na BeYuda.

⁸Yɛn a to di, yɛ Dagwi de a nɔ̂ng Bitrus reto na a sè tom mɛ vɔk na BeYuda, e yɛ de a nɔng me reto na me sè tom mɛ vɔk na bemât yére dyuk.

⁹Ano kwong, Yakɔp, na Kefas, tanga Yohana, yɛn de ba jut ɛn sede bahwot e ji bemat-raa, yɛn a di, Dagwi a nɔng me fwom o yi na nerat mɛ. Yaga ano, yɛn a sey vwɔ na me tanga Barnabas, na be dura, wot a ga tɛ́ ot besâ gafiri mɛn. Wot a yong ɛ̀ na wot a kyè wɔ̀ ra fwom e ji bemât yére dyuk, ko yɛn arɔng, na yɛn a kyè wɔ̀ ra fwom e ji BeYuda.

¹⁰Ko pyɛ jining de yɛn a simo na wot a bare na yɛ a yet ngan: Wot re nuyel na sɛlɛ̂ bepɛng e ji bemat-raa e Yɛrusalɛm; ko a sé e pyɛ ma yane de ma kana simo na me ra sizɔng arɔng.

¹¹Ko jeng de Bitrus a wul repomô Antyokya, ma hwo ɛ e ji bemat-raa, yaga á sè dɛdɛrɛng, a ga buru.

¹²E mɛsɛng o, yɛ á kana reres pyɛ́ na bemat-raa de ba sé vê yére dyuk. Ko jeng de bemat behak de Yakɔp a tomo hɛn ba vey, Bitrus o a hwo kyɛgɛs hɛ nà reres pyɛ́ na bemât yére dyuk o. A gas ɛ na yɛn, yaga a tɛ̀ bengyip bemat de be tē, gbing-gbing sɛ̌ be wɔ́ a kawɛ mwat-raa e cwɛl.

¹³Ano arɔng, bwang bemat-raa de bá sè BeYuda ba hwo raa negwɔn mɛ de na dura, a vɔk nenu-neba. Mwa na Barnabas arɔng a pere wɔ̀ dopɛ e negwɔn o de vit a tsak o e ji nɛ.

¹⁴Ko jeng de ma di, yɛn a sé kyè cik e gwông tsak hâ Yɛgɛt Yat wɛt, ko ma yâng Bitrus e nuyel mɛn mwa, “Mwa ano de hwà sé WoYuda, hwà sé raa negwɔn bemât yére dyuk ko ne BeYuda wɛt. Yaga sɛ́ de hwó simo hwo tɛ̀ vemo de ba sé vê yére dyuk gbing-gbing be raa negwɔn BeYuda arɛt?”

¹⁵Ko di, wot bato mot wot a sé tɔ̂ BeYuda, ko wot a sé vemo wɛt de be tang ɛn, à bemât banɛn vê yére dyuk.

¹⁶Ko mwa ano, wot a tɔk, vit a gwong de mwat ê tɛ́ ɛ cik e bayîs Dagwi yi na gyeng Badu BeYuda. A sé yi na sêy tsak o na Yɛsu Kristi zɔng de Dagwi ê jut ɛ a sé cik. Wot pyɛ mot arɔng wot a ga sey tsak o na Kristi Yɛsu, yaga na Dagwi a bin jut ot wot a sé cik e bayis mɛ yi na sêy tsak o mo ko yi na gyeng Badu wɛt. Yaga vit a mwat de ê sè cik e bayîs Dagwi yi na gyeng Badu.

¹⁷Wot e ye ngyɛ́k na wot a bin sè cik e bayîs Dagwi yi na sangâl nesa mot na Kristi. Ka sede, yi na ra ano, bê di, wot a sé bemât banɛn arɔng tyɛng sede bemât yére dyuk, ka hane hê yâng dura, Kristi e tɛ̀sɛ hot na wot a ra banɛn arɛt? Tyɔng tyɔng wɛt!

¹⁸Ka sede ma to me hwo jut Badu mo de ma kana kyɛ́ me vɛ sede gbɔng pyɛ, ko me dura, ma sé mwat de e gyili Badu mo.

¹⁹E rà rehâ gyeng Badu mo kene — ma sé sede ma ga ku à me. Badu mo pyɛ vɛ ba ga mɔrɔ me. Pyɛ́ yemo ya té, yaga na me bin sè kwen na me ra a Dagwi fwom.

²⁰Jeng de ba kak Kristi e ra cɔ́gɔt, ba kak me tanga yɛ arɔng. Yaga ano, a to sé e me pyɛ hom de ma sé kwen wɛt, ko a sé e Kristi de a sé kwen e ji hom. Ko neken de ma vɔk e jey yemo a remo na yi na sêy tsak o de ma sey na Hwey Dagwi. E hɛ de ha tɛ̀ yêy hɛ na me, ko ha nɔng nekên hɛ yaga nerat hom arɔng.

²¹Ma rɔda kyɛ́ me nerat de Dagwi e dura a me ko tyɔng wɛt. Ka sede bemat be tɛ́ ɛn cik e bayîs Dagwi yi na gyeng Badu, ka hane hê yâng dura, rekû Kristi ra sé yapyi zɔng!