Read berom Galatya 3 Bible Online

Galatya 3 - berom bible

Galatya 3

¹À yin bemât Galatya, yin a sé betɔn! E wà de a dɔnɔ hin arɛt? Yin e bare na jeng de ba misang a yin kyɛrɛng gwong de Yɛsu Kristi a ku e ra cɔ́gɔt-kak wɛt arɛt?

²Tik na me rangal hin pyɛ jining yemo ngan zɔng: Gabik Dagwi ha vey sangal e ji min, yaga yin a gyeng Badu kɛ yaga yin a sey tsak o na Yɛgɛt Yat de ba basa a yin arɛt?

³Netɔn min o na wɔ̀ wul ano arɛt? Yin á kana mɛsɛng sángal min pas yi na retô Gabik Dagwi; yaga sɛ́ de yin e simo yin a yɛnɛ hɛ yi na gâp tó min arɛt?

⁴Yin a di gbɔng pyɛ́ pyak de ya té na yin; ko sɛ̌ yin a jut yɛ̄ sede pyɛ cak wɛt arɛt? Ko me bare, ya sé a yin pyɛ cak.

⁵Ko di, Dagwi e nɔngɔs hin Gabik mɛ, ko e to ragas pyɛ̂ bes e tē min. Yin e bare, e ragas ano, yaga yin e gyeng Badu kɛ yaga yin a wok Yɛgɛt Yat na yin a sey tsak o na yɛ̄ arɛt?

⁶Bàre hin na Abraham. Bà jɛk e Bwok-basa Dagwi wɔgɔ, “Abraham à sey tsak o na Dagwi, ko yi na sêy tsak o mɛ mo, Dagwi à jut ɛ, à sè cik e bayis mɛ.”

⁷Hemo he dura, a sé e vemo de ba sey tsak o na Dagwi de ba sé nèy Abraham ne mwin.

⁸Bà kana jɛk e Bwok-basa Dagwi gyam na pyɛ mo ye té wɔgɔ, jeng ye kyè vey de Dagwi a rɔda tɛ̀ vemo de ba sé vê yére dyuk be sè cik e bayis mɛ. Ko bà to jɛk e ra gwong de Dagwi à kana ha a Abraham Yɛgɛt Yat yemo wɔgɔ, “Yi na hwo, Dagwi a rɔda tɛ̀ nerat e ra mwa yére bemât jey.”

⁹Ko di, tyɛng sede remo de Dagwi à kana tɛ̀ nerat e ra Abraham, de à sey tsak o na yɛ, ano kwong, a rɔda to tɛ̀ nerat e ra vemo de ba sey tsak o na yɛ arɔng.

¹⁰Ko mwa bemat de ba tɛ̀ gap mɛn e ra gyeng Badu BeYuda, yɛn a tɔk kayɛ jeng, Dagwi a rɔda gang ɛn na shɔt. Yaga bà jɛk e Bwok-basa Dagwi wɔgɔ, “Dagwi a ga gang kawɛ mwat de e nàra e de gyeng kayɛ pyɛ de bà jɛk e Bwok-basa Badu mo wɛt na shɔt.”

¹¹Ko wot a tɔk, vit a mwat de e tɔk sè cik e bayîs Dagwi yi na gyeng Badu mo, yaga bà jɛk, “A sé e mwat de Dagwi a tɛ̀ a sé cik e bayis mɛ, yaga a sey tsak o na yɛ de a rɔda vɔk neken.”

¹²Vit a pyɛ de ye wuna gyeng Badu na sêy tsak o. Ko sede remo de bà jɛk wɔgɔ, “Mwat de e gyeng kayɛ pyɛ de Badu ba simo e yɛ de a rɔda vɔk neken yi na vɛ.”

¹³Dagwi a ga gang ot na shɔt, yaga wot a tɔk gyeng Badu mo wɛt. Ko Kristi a ga viri hot, yɛ a ga jut nevês gang na shɔt o e rato mɛ e to mot. Yaga bà jɛk e Bwok-basa Dagwi wɔgɔ, “Kawɛ mwat de ba ta a yɛ ngyɔt e ra cɔgɔt, a sé womo de Dagwi a gang ɛ na shɔt.”

¹⁴A ra ano, yaga na bemât yére dyuk be bin sey yi na Kristi Yɛsu nerat de Dagwi à kana sira na a tɛ̀ e ra Abraham. Ko a ra ano arɔng, yaga na wot mwa, yi na sêy tsak o na yɛ, wot a bin sey Gabik de Dagwi à kana sira na a nɔng ot arɔng.

¹⁵À begwa, tik na me dura a yin há hemo na gwɔrɔ-há: Ka sede bemat beba ba wuna hɛn na sira e ra pyɛ cak, ko vit a mwat hwak de a rɔda tɔk lashe wuna-na-sira hane kɛ a to gwɛ̌ pyɛ cak e ra hɛ.

¹⁶Ko di, Dagwi à kana sisa hɛ na a tɛ̀ nerat e ra Abraham tanga e ra yere mɛ. Bà jɛk e Bwok-basa Dagwi e ra bemat pyak wɛt wɔgɔ, “tanga yére mō.” Wey, bà jɛk e ra yere jining zɔng wɔgɔ, “tanga yere mō.” Ko yere yane mo, yɛ à Kristi.

¹⁷Pyɛ de me simo na me dura a yin ya sé ngan: A raane, Dagwi à kana wuna hɛ na sira tanga Abraham, ko à sira hɛ na a gyeng wuna-na-sira mo. E bama de neshey naga benaas na kuru batat (430) na ga kwey, Dagwi à nɔ̂ng BeYuda Badu mɛ. Ko Badu mo be tɔk gang wuna-na-sira hane mo wɛt, na be tɛ̀ pyɛ de Dagwi à kana sira e ra yɛ ya sè pyɛ wɛt.

¹⁸Yaga, ka sede Dagwi e nɔng bemat nɔrɔ, yaga yɛn e gyeng Badu, ko hemo he dura, be sey nɔrɔ hane mo wɛt, yaga yɛ a sira na a nɔng ɛn hɛ. Ko e ji hâ mwin, a sé yaga Dagwi à kana sira na a nɔ̂ng Abraham nɔrɔ hane mo de a nɔng ɛ hɛ.

¹⁹Ka sede a sé ano, yaga sɛ́ de Dagwi a nɔng Badu mo arɛt? A nɔng vɛ, yaga na bemat be bin tɔk mɛ̀ pyɛ́ de ya sé vyes e nuyêl Dagwi; a to nɔng vɛ na be bin dura a bemat gwong sɛ̌ jeng de yere Abraham yê vey. E yɛ wɛ de Dagwi à kana sira na a nɔng ɛ nɔrɔ̂ pyɛ́ mo. Ko Dagwi a nɔng Badu mɛ mo e vɔ betom-lagwi, na yɛn a vey nɔ̂ng mwat de à sè e tê Dagwi na bemat o.

²⁰A sé e jeng de bemat be gas ɛn zang ba de be ra fwom na mwât tē, ko a sé e jeng de mwat a sé gwining zɔng wɛt. Ko Dagwi a ra fwom yɛ nju mɛ zɔng.

²¹Pyɛ yemo mo ye dura wɔgɔ, pyɛ́ de Badu ba ye ya sé detu na pyɛ́ de Dagwi a sira e ra yɛ̄ arɛt? Kée wey! Ka badu bahak ba sɛ́ de be tɔk nɔng bemat neken, ka badu mo ba yâng tɔk tɛ̀ ɛn be tɛ́ ɛn cik e bayîs Dagwi arɔng.

²²Ko bà jɛk e Bwok-basa Dagwi wɔgɔ, banɛn ba vɔk reto e ra kayɛ pyɛ de ya sé e jey yemo, yaga Dagwi e tɔk nɔ̂ng vemo de ba sey tsak o na Yɛsu Kristi pyɛ de à kana sira e ra yɛ. Ko yɛn a rɔda sey pyɛ mo, ka sede yɛn a sey tsak o.

²³Gyam na jeng ye vey de bemat ba hwo tɔk gwông sêy tsak o na Kristi, wot á kana sè e nɛ̂n retô Badu sede bemât ngyang, sɛ̌ Dagwi a dura a wot gwông sêy tsak o mo wɛshɛrɛk e ngyen.

²⁴Yaga ano, wot á kana sè e nɛ̂n retô Badu na be gyeng ot sɛ̌ jeng de Kristi a pom, yaga na wot a bin tɛ́ ot cik e bayîs Dagwi yi na sêy tsak o mot.

²⁵Ko a remo de gwong gwa ga wunta hɛ na wot a tɔk sey tsak o na Kristi, wot a to sé e nɛ̂n retô Badu na be gyeng ot wɛt.

²⁶Yin mwa de yin a sé sangal e ji nesa na Kristi Yɛsu yin a tɛ́ in nèy Dagwi, yaga yin a sey tsak o na yɛ.

²⁷Ba ga tɛ̀ a yin mwa batisma, ko yi ano, yin a tɛ́ in vining na Kristi. Ko a remo, yin a tɛ̀ Kristi sede be tɛ̀ rugu.

²⁸Yaga ano, pyɛ cak ye to gas in wɛt: Kɛ mwat a sé WoYuda kɛ mwat duk, kɛ a sé sam kɛ hwêy lɔ, kɛ a sé rwas kɛ hwā — yin a sé vining mwa, yaga yin a sé sangal e ji nesa na Kristi Yɛsu.

²⁹Ka sede yin a sé vê Kristi, ko yin a sé yére Abraham a wane; ano kwong, yin a rɔda sey pyɛ́ de Dagwi a sira na a nɔ̂ng Abraham tanga yére mɛ.