Read berom Galatya 4 Bible Online

Galatya 4 - berom bible

Galatya 4

¹Tik na me misang a yin pyɛ́ yemo ngan: Jeng de hwey de ha rɔda re nedanelɔ pyɛ̂ dâ hɛ ha rɔngɔl sɛl o, ha sé detu na sam wɛt, mwa ano de e ji hâ mwin a sé e hɛ de ha sé dâ pyɛ́ mo mwa.

²Ko e bemat behak de be ka bɛrɛng hɛ, na be to gyeng a hɛ pyɛ̂ hɛ mo sɛ̌ jeng de dâ hɛ á kana tɛ̀ na be de tik a hɛ vɔ̂k pyɛ́ mo pyɛ hɛ.

³A sé ano na wot arɔng. Jeng de wot a rɔngɔl sede nèy e ra tɔ̂k pyɛ̂ Dagwi, begabik de ba vɔk reto e jey yemo ba tɛ̀ ot na wot a sè besam mɛn.

⁴Ko sede jeng de Dagwi à kana tɛ̀ ya sila, yɛ á tomo Hwey mɛ vey e jey yemo. E hwā de á tɔ hɛ, ko há gyenges Badu BeYuda,

⁵yaga na he bin viri mwa vemo de ba sé e nɛ̂n retô Badu mo arɔng. Há ra ano, yaga na Dagwi a tɛ̀ na wot mwa wot a tɛ́ ot nèy mɛ.

⁶Sede remo de yin a sé nèy mɛ, ko Dagwi á tomo Gabîk Hwey mɛ mo na he sangal e neyey mot. Gabik o he tɛ̀ na wot a yila Dagwi, “À Dara, à Da hom!”

⁷Yaga ano, hwà rɔngɔl sam wɛt, ko hwà sé hwêy lɔ Dagwi. Ko sede remo de hwà sé hwêy lɔ, Dagwi a rɔda nɔng o numo mō e ji pyɛ̂ nedanelɔ de ya sé yaga nèy mɛ mwa arɔng.

⁸A raane, jeng de yin á sè rɔngɔl sana tɔ̂k Dagwi, yin á sè besam pyɛ́ de ya vɔk reto, yēmo de ya sé bedagwi wɛt.

⁹Ko a remo de yin a tɔk Dagwi — a yâng dal naka na me ye, Dagwi a tɔk in — yi e rɛ̌ de yin e simo na yin a to in e de raà begabik jey yemo gbak arɛt? Ba vɔk gap wɛt, ko ba to vɔk reto wɛt. Yaga sɛ́ de yin e simo yin a to tɛ́ in besam begabik o arɛt?

¹⁰Yin e tɛ̀sɛ nehywɛ min e ra gyengês negasi nehak, na pɛl hak, na jeng nzem nehak, na neshey nehak arɔng.

¹¹Yin e tɛ̀, me sap a yin! Tik na fwom de ma ga pɛngɛ me e de râ gwɛ yaga nerat min gwo wey kpɛɛ zɔng wɛt!

¹²À begwa, ma sé ra won na yin, tik na yin a tɛ́ in sede me, yaga me ma tɛ́ me sede yin arɔng. Yin a ga ra a me pyɛ cak vyes wɛt.

¹³Yin a tɔk pyɛ de ya tɛ̀ me vey shara a yin Yɛgɛt Yat e jeng ye mɛsɛng o: Á sè yaga ma ro me.

¹⁴Ko mwa ano de á sè a yin negbang yaga serɔ mo, yin a byɛnɛng me wɛt, yin a to kyɛ́ in me arɔng wɛt. Ko yin a sey me na yey pyɛng, sede yin a sey tom-lagwi hwak, kɛ sede yin a yâng sey Kristi Yɛsu pyɛ mɛ.

¹⁵E sɛ́ de ya té na yey pyɛng de yin á kana vɔk na me arɛt? Ma tɔk tsɛng-tsɛng, e jeng o, ka yin a ka tɔk paa bayis min na yin a nɔng me vɛ, ka yin a yâng ra ano.

¹⁶Ko sɛ̌ ma ga tɛ́ me mwât repugu min, yaga a remo de ma ha a yin tsak o arɛt?

¹⁷Bemat vane mo de be simo be sege a yin Yɛgɛt Yat yɛn e ye ngyɛ́k na be hwɔtɔ nehywɛ min, ko báre mɛn ha sé rat wɛt. Yɛn e simo be gas in na me, yaga na yin a bin to nɔng ɛn nehywɛ min mwa zɔng.

¹⁸A sé pyɛ ryat na bemat be tɛ̀ nehywɛ mɛn mwa e ra bemɛn, ka sede pyɛ de yɛn e simo na yɛn a ra ya sé ryat. Ko tik na a sè ano kayɛ jeng; a sè ano e jeng de ma sé tanga yin zɔng wɛt.

¹⁹À yin nèy yey hom, ma to sé sɔ reyɔm yaga yin sede hwā de a sé rus na nepep e jeng tɔ. Ma sé re nuyel na sɔ̂ reyɔm o sɛ̌ jeng de bê di negwɔn Kristi e ji min e ngyen!

²⁰Ka ma ka sé e hane na yin, ka ma yâng tɔk sege gwong de mê ha na yin, yaga a remo a sé a me kpɛɛ zɔng na yin!

²¹À yin bemat de yin e simo Badu be vɔk reto e ra yin, há a me hin: Yin a wok pyɛ de bà jɛk e ji Badu mo wɛt arɛt?

²²Yaga bà jɛk, Abraham à kana vɔk nèy neba bewen o. Hwey he mɛsɛng o bà tɔ hɛ yi na hwā de à sè sam, ko he neba mo bà tɔ hɛ yi na hwā de à sè hwêy lɔ.

²³Ko hwey de bà tɔ na sam, bà sey jîm hɛ, ko bà tɔ̀ hɛ sede bwang nèy jey yemo. Ko hwey o hê hwā de à sè hwêy lɔ, bà tɔ hɛ yaga Dagwi pyɛ mɛ à kana sira na a nɔ̂ng Abraham hwey o.

²⁴Há hemo ha vɔk cap-hâ neyaang cak de ya sé ngan: Beha beba vane be dura a wot yerê wuna-na-sira ba de Dagwi à ra. Hê mɛsɛng, hɛ à hê Hagar de he dura wuna-na-sira de Dagwi à ra na BeYuda e Raku Sinai. Ko nèy de bà tɔ nɛ yi na yɛ nà sè besam.

²⁵Jeng de be ha e ra Hagar, be ha e ra Raku Sinai e sevwêl Arabya. Ko wot e to tɔk tyɛngrɛ Hagar na repomô Yɛrusalɛm rê remo, yaga Yɛrusalɛm o wa sé e ji sesam arɔng tanga bemât wɛ mwa.

²⁶Ko repomô Dagwi rê tsak o, rɛ à Yɛrusalɛm de ra sé e lagwi, ra sé e ji sesam wɛt, ko e rɛ̄ de ra sé a wot sede neng mot.

²⁷Yaga bà jɛk e Bwok-basa Dagwi wɔgɔ, “Hwo de hwà sé sang-gwon, de hwà ga wok nepêp tɔs wɛt, tik na hwo vɔk yey pyɛng, na hwo to gbɔ na lwɛ̄lɛ yey pyɛng ding-ding! Yaga hwā de ba kyini hɛ a rɔda vɔk nèy pyak a dal mɛ̀ womo de a vɔk rwas mɛ.”

²⁸À yin begwa, yin a sé nèy Dagwi, yaga yɛ à kana sira hɛ ano. Yi e gwong gwomo arɔng, Yishak a tɛ́ ɛ hwêy Abraham, yaga Dagwi à kana sira hɛ ano.

²⁹E jeng o, hwey hane de bà kana tɔ hɛ sede bwang nèy jey yemo ha tak a hwey de bà tɔ yi na retô Gabik Dagwi reyɔm. Ko a remo, a to sé ano arɔng.

³⁰Ko bà jɛk ala e Bwok-basa Dagwi arɛt? Bà jɛk, “Ró hwā de a sé sam mwa na hwey mɛ, yaga hwêy sam ha rɔda gas pyɛ̂ nedanelɔ na hwêy hwā de a sé hwêy lɔ ko tyɔng wɛt.”

³¹Ano kwong, à begwa, wot a sé nèy hwā de a sé sam wɛt, ko wot a sé nèy hwā de a sé hwêy lɔ.