Read berom Galatya 5 Bible Online

Galatya 5 - berom bible

Galatya 5

¹Kristi a ga viri hot yi e retô Badu, yaga na wot a bin sangal washak. Yaga ano, tumal hin gak, ko yin simo na be to tɛ̀ in e ji sesam wɛt.

²Wok in, e me Bulus de ma sé yang in ngan: Ka sede yin e simo na be wɔ́ a yin e cwɛl, ko hane he dura, pyɛ de Kristi a ga ra yaga yin ya rɔda vɔk a yin nerat nehak wɛt.

³Tik na me to gwɛ̌ ha a yin gak: Mwat de e simo be wɔ́ a yɛ e cwɛl, a rɔda sè gbing-gbing na a gyeng Badu mo mwa vɛ.

⁴Mwa yin de yin e jāma na yin a tɛ́ in cik e bayîs Dagwi yi na gyeng Badu, yin a ga gas bato min na Kristi a wane. Ko yin a tɛ̀ bato min e kwɔn de Dagwi e tɔk dura a yin nerat mɛ wɛt.

⁵Ko wot à, wot a sɛt yey mot, Dagwi a rɔda tɛ̀ na wot a sè cik e bayis mɛ. Ko e pyɛ ma yemo de wot a sé gyeng vêy yɛ ding-ding yi na retô Gabik Dagwi de ha sé ra fwom yi na sêy tsak o mot.

⁶Ka sede wot a sé sangal e ji nesa tanga Kristi Yɛsu, kɛ be wɔ́ a wot e cwɛl kɛ be wɔ́ a wot wɛt, a sé mwa gwining o zɔng. Ko gbɔng pyɛ mo ya sé wɔgɔ, wot a sey tsak o na yɛ, na wot a tɛ̀ yey mot na bemat arɔng, ko a sé ano de wot a rɔda dura mɛ̀ sêy tsak o mot o.

⁷E mɛsɛng o, yin á re nuyel naka! E wà de a dul in nà gyeng tsak há mo arɛt?

⁸A sé e Dagwi wɛt de a tɛ̀ in na yin a ra ano; yaga a sé e yɛ de a yila hin na yin a sè bemɛ.

⁹Bemat be ye ngan: “A sé kegéy-sing tyɔng zɔng de ke pere wɔ̀ tɛ̀ nemuk kpam-tuk de ba ga bɔrɔk ne pu mwa.”

¹⁰Yaga wot mwa na yin wot a sé sangal e ji nesa na Darwey, ma tó yey e ra yin wɛt; ma tɔk tsɛng-tsɛng, báre min ha rɔda sè detu na nang wɛt. Ko ma tɔk arɔng, Dagwi a rɔda tabak yɛ wane de a sé bɔrɔk hin, ka a ka sé wà ayi.

¹¹À begwa, ka ma yâng sé rɔngɔl shara a bemat wɔgɔ, a sé gbing-gbing na be wɔ́ a yɛn e cwɛl, ko yaga sɛ́ de be rɔngɔl tak a me reyɔm arɛt? Ka há hane ha sé ano, ka bása de me basa e ra rekû Yɛsu e ra cɔ́gɔt-kak hê yâng tɛ́ ɛ a yɛn pyɛ repugu wɛt.

¹²Me yâng simo ka bemat de be bɔrɔk hin o yɛn a wɔ̀ yɛ́t ɛn na be tɛ́ ɛn berɛmɛt mwa ow!

¹³À begwa, Dagwi a ga yila hin na yin a bin sangal washak yi e gyeng Badu vane mo. Ko yin kwon tik na sangâl washak o he tɛ̀ na yin a tɛ̀ yey min e de ragâs pyɛ́ de babek min be simo. Ko sɛlɛ hin bemin, na yin a bin dura mɛ̀ tɛ̂ yey min vɔk na yɛn.

¹⁴Yaga ba ga sila Badu mwa e ji redu remo wɔgɔ, “Tɛ̀ yey na mwât vwara mō sede hwà tɛ̀ yey na tó mo.”

¹⁵Ko ka sede yin a vɔk negwɔn sede ngyāma de ye roros bemɛn, na ye reres bemɛn arɔng, ko tē in naka, yin weres na bemin mwa hywiri wɛt.

¹⁶Pyɛ de me ha a yin ya sé ngan: Tik na Gabik Dagwi he dúsa a yin gwong de yin ê kweres ɛ̀, ko yi ano, yin a rɔda raa cwey pyɛ́ wɛt de babek min be simo.

¹⁷Yaga cwey pyɛ́ de babek mot be simo ya sé detu na yēmo de Gabik Dagwi he simo, ko cwey pyɛ́ de Gabik Dagwi he simo ya sé detu arɔng na yēmo de babek mot be simo. Pyɛ́ bya yane ye tɔk man wɛt; yaga ano, yin e ra pyɛ́ de yin e simo na yin a ra wɛt.

¹⁸Ko ka sede yin a sé ra pyɛ́ de Gabik Dagwi he dura a yin na yin a ra, yin a sé e nɛ̂n retô Badu wɛt.

¹⁹Ko pyɛ́ de ye yi na cwey pyɛ́ de babêk bemat be simo ya sé dɛdɛrɛng; yɛ̄ a yemo ngan: Bemat be ra nejwang, be ra pyɛ́ de ye tɛ̀ ɛn ligis, ko be vɔk gwōt;

²⁰be sap cī, ko be ra vyoshon ye bɔs arɔng; be vɔk repugu na bemat, ko be ra yol; be bɛrɛng bemat ves, be vɔk shom, ko be simo bato mɛn; be gas ɛn na bwang bemat, na be gas ɛn e yere mɛn arɔng;

²¹be kyɛ́ ɛn nà simo na mwat hwak a sɛ̀ pyɛ cak, be feng siring, be ra nzem neves, na bwang pyɛ́ cak yére yane. Ma sé tusa hin a remo, sede remo de ma kana tusa hin a raane wɔgɔ: Mwa bemat de be ra pyɛ́ yére yemo yɛn a rɔda sɛ̀ kwɔn e Segwɔm Dagwi wɛt.

²²Ko pyɛ́ de Gabik Dagwi he tɛ̀ bemat be ra ya sé ngan: Be tɛ̀ yey na bemɛn, be vɔk yey pyɛng, ko be sangal tyang na bemɛn; be niri, be vɔk nerat, ko be dura a bemat nerat; bemat be tó yey na yɛn wɛt,

²³be vɔk nehywɛ, ko be gyeng bato mɛn arɔng. Vit a redu rehak de ra sé e ra mwat de a sé ra pyɛ́ yemo.

²⁴Ko vemo de ba sé vê Kristi Yɛsu yɛn a ga hàla cwey pyɛ́ de babek mɛn be simo mwa na netâ simo yɛ̄ arɔng. A sé sede ba ga jut pyɛ́ mo na be kak yɛ̄ e ra cɔ́gɔt-kâk Yɛsu Kristi.

²⁵Sede remo de a sé e Gabik Dagwi de ha nɔng ot neken, tik na wot a simo na he dura a wot gwong de wot a rɔda kyè ɛ̀ arɔng.

²⁶Wot kwon dak ragey wɛt, wot woros bemot kɛ wot kwon kyɛ́ ot nà simo bemot be sɛ̀ pyɛ cak.