Read berom Galatya 6 Bible Online

Galatya 6 - berom bible

Galatya 6

¹À begwa, ka sede be sɛ̀ mwat hwak e ji buru, tik na yin de yin e ragas pyɛ́ de Gabik Dagwi he dura a yin, yin sɛlɛ hɛ na a toyo e ji gwong de gwa sé tsak o; rá in ano na nehywɛ. Ko ma sé ha a kawɛ e ji min: Tē naka na tó mo pyɛ mo, hwo kwon simo na hwo buru tyɛng ano wɛt.

²Sɛlɛ hin bemat jeng de yɛn a sé di reyɔm na pyɛ cak. Ka sede yin e ra ano, ko yin a rɔda gyeng redu de Kristi a nɔng.

³Ka sede mwat hwak a jut tó mɛ sede a sé pyɛ cak, mwa ano de a ka sé pyɛ cak wɛt, yɛ a sé kwɛlɛng tó mɛ zɔng.

⁴Tik na kawɛ mwat a mara tomong mɛ. Ka sede ba sé rat, ko yɛ a rɔda tɔk ra kaa yaga pyɛ de yɛ pyɛ mɛ a ga ra; a kwon tyɛngrɛ pyɛ de a ga ra mo na yemo de mwat hwak a ga ra wɛt.

⁵Yaga a sé fwôm kawɛ mwat na a jut nedirîk pyɛ de Dagwi a nɔng ɛ.

⁶Tik na mwat de e masa rehâ Dagwi a gas kayɛ pyɛ ryat de a vɔk na mwat de e basa a yɛ mo.

⁷Yin kwɛlɛng bato min wɛt; vit a mwat de e tɔk tɛ̀ Dagwi a sè tɔn. Pyɛ de mwat e bere, e yɛ de ê ba yɛt bwal o.

⁸Ka sede a sé raa cwey pyɛ́ de rebek mɛ re simo, ko yɛnɛ mɛ — sede bwal — ha rɔda ba sè reku. Ka sede a sé ra pyɛ́ de Gabik Dagwi he simo, ko yɛnɛ mɛ ha rɔda ba sè neken gbak-gbak nemo de ne yi na Gabik hemo mo.

⁹Tik na wot a dopse ra pyɛ́ ryat, ko wot ruru wɛt. Yaga, ka sede wot a ye waa wɛt, jeng ye kyè vey de wot a rɔda ba yɛt bwâl pyɛ́ ryat de wot á kana bere.

¹⁰Yaga ano, kayɛ jeng de wot e sɛ̀ gwong, tik na wot a ra a bemât mwa pyɛ́ ryat, a kat mɛ̀ vemo de wot a sé bemat-raà Yɛsu Kristi tanga yɛn.

¹¹Ma sé jɛk a yin na vwɔ hom a remo; di in nerêy batîn jɛk de ma sé jɛk a yin mɛ̀!

¹²Bemat de be simo be tɛ̀ gbing-gbing be wɔ́ a yin e cwɛl, e vɛ de be simo be ra pyɛ́ de bemât jey ba rɔda simo hɛn mɛ̀. Ko yɛn e ra ano zɔng, yaga yɛn e simo bemat be tak a yɛn reyɔm wɛt. Yaga, ka sede be basa e ra rekû Yɛsu e ra cɔ́gɔt-kak, ko bê tak a yɛn reyɔm.

¹³Ko mwin, yɛn vane de be kyese e cwɛl o, yɛn e ka gyeng mwa Badu BeYuda wɛt. Ko yɛn e simo be wɔ́ a yin e cwɛl; yi ano, yɛn ê sɛ̀ pyɛ dâk kaa, yaga yin a ga simo a yɛn na yɛn a yɛt a yin bek min ano.

¹⁴Ko di me à, ma rɔda ra kaa e ra pyɛ jining zɔng, yɛ à Darwey mot Yɛsu Kristi de a ku e ra cɔ́gɔt-kak. Yaga yi na reku mɛ mo, pyɛ̂ jey yemo ya to vɔk nerat na me wɛt, a sé sede ba ga jut yɛ̄ na be kak yɛ̄ e ra cɔ́gɔt-kak yemo. Ko me arɔng ma sé sede mwat de a ga ku e ra cɔ́gɔt-kak o, ko ma ga hàla pyɛ̂ jey yemo e hwomo arɔng.

¹⁵Kɛ be wɔ́ a mwat e cwɛl kɛ be wɔ́ a yɛ wɛt, a sé pyɛ wɛt. Ko gbɔng pyɛ mo ya sé wɔgɔ, Dagwi a ga tɛ̀ na wot tɛ́ ot bemat bepas.

¹⁶Ko tik na Dagwi a tɛ̀ neyey vemo de be raa gwong gwomo ne dyɛng, na a to tosho reyɔm mɛn arɔng. Ma sé ra won ano yaga yɛn o mwa na bemât Dagwi vê mwin mwa.

¹⁷E ngamo nuyel, mwat hwak a to shɔk a me yey wɛt, yaga bavìt de ba sé e rebek hom be dura, ma sé ra a Yɛsu fwom.

¹⁸À begwa, tik na Darwey mot Yɛsu Kristi a tɛ̀ nerat mɛ e ji neyey min. Ano.