Read berom Ɛfɛsus 1 Bible Online

Ɛfɛsus 1 - berom bible

Ɛfɛsus 1

¹Bwok-rwang gwomo yi e vwɔ hom Bulus, tom Kristi Yɛsu yi na simô Dagwi, Vɔk na bemât Dagwi e Ɛfɛsus, vemo de ba sé tumal ting e ji sangâl nesa mɛn na Kristi Yɛsu:

²Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

³Tik na wot a somo Dagwi, yɛ Dâ Darwey mot Yɛsu Kristi, yaga yɛ a tɛ̀ nerat e ra wot e ji sangâl nesa mot na Kristi mo! A nɔng ot kanɛ nerat ne pyɛ̂ Dagwi de na sé ne yɛnɛ̂ lagwi.

⁴Gyam na a yong jey, à kana kasa hot na wot a sè bemɛ yi na sangâl nesa mot na Kristi. À to kasa hot na wot a sè jɛrɛ, vit a pyɛ cak vyes e ra wot e bayis mɛ. Yaga a tɛ̀ yey mɛ na wot,

⁵Dagwi à kana yong ɛ̀ yimo gyam wɔgɔ, ê tɛ̀ ot na wot a sè nèy mɛ yi na Yɛsu Kristi. Pyɛ ma yemo de à kana simo, ko yà sè e yey mɛ arɔng.

⁶À kana ra ano, na wot a somo hɛ yaga gwong rwat sizɔng de à kana dura a wot mɛ̀ nerat mɛ, nemo de a nɔng ot e nɔrɔ yi na pyɛ de Hwêy yey mɛ ha ga ra.

⁷Hwey mɛ mo há shushu nemî hɛ e jeng reku, yaga na he viri hot, yaga na Dagwi a hàla a wot banɛn mot. A sé yi ano de Dagwi a dura a wot nerat mɛ de na sé nerey o tyɔng wɛt,

⁸nemo de a ga nɔng ot nɛ shɛrɛk. A to nɔng ot mwa netsitsɛng na tɔ́k, yaga na pyɛ́ mɛ ye sè a wot dɛdɛɛt.

⁹A ra pyɛ de yà kana sè e yey mɛ yimo; ko a tɛ̀ na wot a tɔk pyɛ mo de yà kana sè e lɛrɛ, yemo de yɛ a simo a ra yi na Kristi.

¹⁰Pyɛ de Dagwi o a yong e yey mɛ, yemo de a rɔda sila e jeng de ya jam, a yet ngan: A rɔda tɛ̀ pyɛ̂ mwa de à kana yong, yēmo de ya sé e lagwi tanga yēmo de ya sé e ngamo e jey, na ye wuna hɛ, yaga na Kristi a vɔk reto e ra yɛ̄.

¹¹Kayɛ pyɛ ye té, sede remo de Dagwi a yong e yey mɛ, ko e simo a ra yɛ. Yaga wot a sé sangal e ji nesa na Kristi, Dagwi o a kasa hot na wot a sè bemat mɛ. A ra ano, yaga a yong e yey mɛ na wot a sè tyɛng na pyɛ de a yong ɛ̀ gyam.

¹²Ano kwong, tik na wot a somo gbɔng nerêy Dagwi, wot vemo de wot á kana sè vê mɛsɛng de wot a sɛt yey mot e ra Kristi.

¹³Ko yin arɔng, yi na Kristi, yin a wok reha e ra tsak há, e hɛ à Yɛgɛt Yat de Dagwi a ra mɛ̀ fwom na a sey neken min, ko yin a sey tsak o na yɛ̀. Ko Dagwi a tɛ̀ jɔt mɛ e ra yin na a dura, yin a sé bemɛ. Jɔt o, yɛ à Gabik Jɛrɛ de à kana sira na a nɔ̂ng bemat mɛ.

¹⁴Yaga wot a vɔk Gabik Jɛrɛ mó, wot ê kyɛm wot a tɔk tsɛng-tsɛng, tuhak wot a rɔda sɛ̀ pyɛ̂ mwa de Dagwi a ga sira na a nɔ̂ng bemat mɛ. Yaga ano, wot ê to kyɛm wot a tɔk tsɛng-tsɛng, Dagwi a rɔda viri vemo de ba sé bemɛ, yaga na be somo gbɔng nerey mɛ.

¹⁵Yaga ano, yimo jeng de ma kana wok, yin a sey tsak o na Darwey Yɛsu, na yin a tɛ̀ yey min na bemât Dagwi mwa,

¹⁶ko ma ga tik nà feng a Dagwi yaga yin wɛt. Me bare na yin jeng de me ra won,

¹⁷ko me ra won na Dagwi wo Darwey Yɛsu Kristi, yɛ Da mot de a vɔk gbɔng nerey, na a nɔng in Gabik mɛ de hê nɔng in netsitsɛng, ko he to dura a yin Dagwi wɛshɛrɛk, yaga na yin a bin gwɛ̌ tɔk ɛ.

¹⁸Ko me to ra won, yaga na a wunta neyey min, na yin a bin di negbey mɛ. Yi ano, yin a rɔda tɔk pyɛ de á kana ha a yin na yin a sɛt yey min e ra yɛ; yin a rɔda to tɔk pyɛ́ ye gbɔng nerat de ya sé shɛrɛk, yēmo de yɛ̀ a sira na a nɔ̂ng bemat mɛ.

¹⁹Ko yin a rɔda tɔk yerê gbɔng reto de ra dal mwa de yɛ a sé ra mɛ̀ fwom e neyey mot, wot de wot a sey tsak o. Reto remo mo ra sé rining na gbɔng reto

²⁰de à ra mɛ̀ fwom e jeng de à sene Kristi yi e reku, ko à tɛ̀ ɛ na a sangal e ra gwofwa negwɔm mɛ e vwɔ yege mɛ e yɛnɛ̂ lagwi.

²¹Kwɔn a hane de Kristi a sé re negwɔm na reto de ra dal rê yerê begabîk mwa, vɛ à vemo de ba vɔk reto, na vemo de be re negwɔm, tanga vemo de ba vɔk gap. Ko reza de Kristi a vɔk yaga fwom mɛ mo ra to dal karɛ reza rê yere yemo, e jeng yemo zɔng wɛt ko e jeng de ye kyè vey arɔng.

²²Ko Dagwi a ga tɛ̀ pyɛ̂ mwa e nɛ̂n bol mɛ, a tɛ̀ yɛ womo de e re negwɔm e ra pyɛ̂ mwa, a sè tô ekilisiya.

²³Ekilisiya mo wa sé rebêk Kristi; ko jeng de rebek ra wuna hɛ tanga rato, rato wa rɔda sila hɛ, sede remo de rato mo pyɛ wɛ wo sila kayɛ pyɛ mwa e kagwɛ gwong.