Read berom Ɛfɛsus 5 Bible Online

Ɛfɛsus 5 - berom bible

Ɛfɛsus 5

¹Sede remo de yin a sé nèy yêy Dagwi, jāma hin na yin a masa negwɔn mɛ.

²E ji kayɛ pyɛ de yin e ra, rá in yɛ, yaga yin a tɛ̀ yey na bemat, sede remo de Kristi a tɛ̀ yey na wot, ko a nɔng neken mɛ, yaga na a sɛlɛ hot mɛ̀. A sé e gwong o de neken mɛ ná tɛ́ ɛn sede nɔrɔ̂ pyɛ nesang hyɔɔlɔl, ná to tɛ́ ɛn sede nɔrɔ̂ yas de be yɛt vɔk na Dagwi, nemo de ne yong a yɛ yey.

³Yin a sé bemât Dagwi. Yaga ano, be wok hâ nejwang, kɛ hâ pyɛ́ vyes cak de ye tɛ̀ mwat ligis, kɛ hâ gananâng pyɛ́ e ji min ko tyɔng wɛt.

⁴Ko a jam a yin na yin a ha há de ha sé pyɛ rekyen wɛt, kɛ hâ netɔn, kɛ hâ neshɔngɔlɔng e ra pyɛ́ vyes. Ko tik na yin a dopse feng a Dagwi yaga pyɛ́ de a ra a yin e negya.

⁵Ko tik na yin a tɔk ngan: Vit a mwat de e ra nejwang, ko vit a mwat de e vɔk cwey pyɛ́ vyes de ye tɛ̀ ɛ ligis de a rɔda sè e ji bemat de Kristi tanga Dagwi ba rɔda re negwɔm e ra vɛ. Ko vit a mwat de a vɔk gananâng pyɛ́ de a rɔda sɛ̀ kwɔn e ji segwɔm o arɔng, yaga pyɛ́ yane ya tɛ́ ɛ dagwi mɛ.

⁶Yin kwon tik mwat hwak a kwɛlɛng hin wɛt na neha de na sé ne bɔs. A sé yére pyɛ́ yane mo de yê tɛ̀ shom Dagwi ya rɔda hwo e ra vemo de be gyeng há mɛ wɛt.

⁷Yaga ano, pyɛ cak ye wuna hin na yerê bemat vane wɛt!

⁸A raane, yin á kana sè kyè e ji lwīl, ko a remo de yin a sé sangal e ji nesa na Darwey yin a sé e ji negbey. Yaga ano, tik na kwɛngɛl min gwo sè yerê gwô bemat de be dopse kyè e ji negbey.

⁹A sé negbey o de ne tɛ̀sɛ bemat be ra kayɛ pyɛ de ya sé ryat, na yemo de ya sé cik, tanga yemo de ya sé mwin arɔng.

¹⁰Jāma hin na yin a masa pyɛ́ de ye pɛngɛ a Darwey mot yey.

¹¹Pyɛ min cak ye sè na bemat de tomong mɛn ba vɔk pyɔlɔ wɛt; tomong mɛn o ba sé ve lwīl. Ko tɛ̀ in bemat be di tomong o dɛdɛrɛng e negya.

¹²Ko mwin, a sé a mwat pyɛ rekyen na a ha e ra pyɛ́ de yɛn e ragas e lɛrɛ.

¹³Ko jeng de negbey ne dura kayɛ pyɛ dɛdɛrɛng, bemat bê tɔk yerê pyɛ de pyɛ́ mo ya sé,

¹⁴ko kayɛ pyɛ de be dura dɛdɛrɛng ye tɛ́ ɛ gbey. Pyɛ ma yane de ya tɛ̀, bemat be ye, “Sene, à hwo de hwà sê nevwa, na hwo sogo yi e reku; ko Kristi ê tɛ̀ negbey ne ta e ra hwo.”

¹⁵Ano kwong, tē in naka na yerê sangal min. Yin kwon raa negwɔn betɔn wɛt, ko raa hin negwɔn vemo de ba vɔk netsitsɛng.

¹⁶E jeng yemo, bemat be ragas neves. Yaga ano, kayɛ jeng de yin e sɛ̀ gwông râ pyɛ ryat, rá in yɛ!

¹⁷Yin ra pyɛ́ sede betɔn wɛt, ko jāma hin na yin a tɔk pyɛ de Darwey e simo yin a ra.

¹⁸Yin feng siring wɛt, yaga gwong de gwô tɛ̀ na yin a ra pyɛ kpɛɛ a gwane. Ko tik na Gabik Dagwi he vɔk retô mwa e ra yin.

¹⁹Há in na bemin na neha lɛlɛ-somo na nè lɛlɛ detidetu de ba yi na Gabik Dagwi. Rá in a Darwey lɛlɛ, na yin a somo hɛ na yey min mwa arɔng.

²⁰Yin dopse feng a Dagwi Da mot yaga kayɛ pyɛ e ji rezâ Darwey mot Yɛsu Kristi.

²¹Dyɛ́ng in bato min na bemin, yaga na yin a bin dura mɛ̀, yin e sap Kristi.

²²À yin de yin a sé behâ weneng — dyɛ́ng in bato min na beras min, tyɛng sede yin e ra a Darwey Yɛsu.

²³Yaga rwas a sé tô hwā, tyɛng sede Kristi a sé tô ekilisiya; e yɛ wɛ de a sey nekên bemât ekilisiya de wa sé rebek mɛ.

²⁴Ano kwong, tik na beha be dyɛng bato mɛn na beras mɛn e ji kayɛ pyɛ, tyɛng sede ekilisiya wo dyɛng tô wɛ na Kristi.

²⁵À yin de yin a sé beras — tɛ̀ in yey na beha min, tyɛng sede Kristi a tɛ̀ yey na ekilisiya arɔng, ko a nɔng neken mɛ, yaga na a sɛlɛ mɛ̀ wɛ.

²⁶A ra ano, yaga na a bin tik ekilisiya mo jaram yaga Dagwi bama de a ga tɛ̀ wɛ jɛrɛ yi na kus wɛ na nshi tanga yi na reha mɛ.

²⁷A to ra ano, yaga na a nɔ̂ng tó mɛ pyɛ mɛ ekilisiya mo. Wa sé rwat sizɔng, vit a revis, kɛ bashung, kɛ pyɛ cak vyes e ra wɛ, ko wa sé jɛrɛ, wa to sé naka gyat.

²⁸E gwong gwomo arɔng, tik na beras be tɛ̀ yey na beha mɛn, tyɛng sede yɛn e simo babek mɛn. Mwat de a tɛ̀ yey na hwā mɛ a tɛ̀ yey na tó mɛ a wane.

²⁹Vit a mwat de e tɔk kyɛ́ ɛ rebek mɛ. Ko e nɔ̂ng tó mɛ pyɛ̂ re, e to gyeng hɛ naka arɔng, tyɛng sede Kristi e gyeng ekilisiya de wa sé rebek mɛ,

³⁰ko wot a tɔk ano, yaga wot a sé nedem rebek mɛ mo.

³¹Sede remo de bà jɛk e Bwok-basa Dagwi wɔgɔ, “Pyɛ ma yemo de ya tɛ̀, rwas a rɔda tik da mɛ na neng mɛ, na a wuna hɛ na hwā mɛ, ko yɛn beba ba rɔda tɛ́ ɛn rebek rining.”

³²E ji bak o womo wo Bwok-basa Dagwi, yin e tɔk di gbɔng pyɛ cak ye mwin de yà kana sè e lɛrɛ. Ma di, pyɛ yane mo ya sé e ra Kristi tanga ekilisiya.

³³Ko ya sé e ra yin arɔng: Tik na kawɛ rwas a tɛ̀ yey na hwā mɛ sede a tɛ̀ yey na yɛ pyɛ mɛ, ko tik na kawɛ hwā a nɔ̂ng rwas mɛ nerey arɔng.