Read berom Ɛfɛsus 6 Bible Online

Ɛfɛsus 6 - berom bible

Ɛfɛsus 6

¹À yin de yin a sé nèy — sede remo de yin a sé raa Darwey Yɛsu, gyeng in hâ beda na beneng min. Ka sede yin e ra ano, ko yin e ra pyɛ de ya sé tyɛng a yane.

²Redu rê mɛsɛng de Dagwi a sira e ra rɛ na a nɔ̂ng vemo de be gyeng há mɛ pyɛ ryat a ret ngan: “Nɔ̂ng da mō na neng mō nerey.”

³Ko pyɛ ryat de ba ga sira e ra yɛ a yet ngan: “yaga na pyɛ̂ mwa ye sè a hwo naka, na hwo to ros e jey o.”

⁴À yin de yin a sé beda — yin wóros nèy min na ne wok shom wɛt. Ko basa hin a nèy min o, na yin a tabak nɛ arɔng; rá in ano e gwong de Darwey mot a basa a yin.

⁵À yin de yin a sé besam — gyeng in hâ bedanelɔ min vê jey yemo. Sap in vɛ, na yin a wok bengyip mɛn arɔng. Gyeng in há mɛn na yey rining, sede yin e gyeng hâ Kristi.

⁶Yin ra ano e bayis mɛn zɔng wɛt, sede vemo de be ra na be simo hɛn mɛ̀. Ko rá in pyɛ́ de Dagwi e simo na yey min mwa, yaga yin a sé besam Kristi.

⁷Rá in fwom min na yey pyɛng, sede yin e ra a Darwey gwɛ, ko sede yin e ra a bemat gwɛ zɔng wɛt.

⁸Yaga yin a tɔk, Darwey a rɔda tala kawɛ mwat yaga fwom rwat de a ra, kɛ mwat o a ka sé sam kɛ a sé washak, a sé gwining o mwa.

⁹À yin de yin a vɔk besam — dura hin negwɔn yerê nining o vɔk na besam min arɔng. Yin re nuyel na shisa hɛn wɛt, yaga yin a tɔk, yin mwa na besam min o yin a vɔk Dalɔ gwining o e lagwi, ko yɛ e kasa bemat behak wɛt.

¹⁰Há hê yɛnɛ ma het ngan: Jāma hin gap min yi e sangâl nesa na Darwey, ko yi na sêy gbɔng reto mɛ arɔng.

¹¹Dagwi a ga nɔng in mwa pyɛ̂ de yê sɛlɛ hin e como de yin a sé tó na gwɔ̀m cēng. Tɛ̀ in pyɛ́ yemo, yaga na yin a bin tɔk tumal gak e jeng de gwɔ̀m cēng o e kwɛlɛng hin na netsitsɛng neves mɛ.

¹²Yaga como de wot a sé tó ya sé na bemasi wɛt, ko ya sé na cēng vyes de ya vɔk reto e tê lagwi tanga jey, yɛ̄ à yemo de ye re negwɔm, na yēmo de ya vɔk reto, tanga yēmo de ya vɔk gap e jeng yemo de ya sé mwangalang.

¹³Yaga ano, jut in mwa pyɛ̂ como de Dagwi a ga nɔng in, na yin a tɛ̀ yɛ̄! Yi ano, jeng de tuk ves ha rɔda vey, yin a rɔda tɔk tumal gak. Ko jeng de yin ê wɔ̀ wul yɛnɛ̂ como mo, yin ê to tumal gak arɔng.

¹⁴Ano kwong, tumal hin e yong in! Yin dopse ra pyɛ́ de ya sé tsak o sede gyindi de yin a gyiri mɛ̀ rawit min gak. Rá in negwɔn de na sé cik sede dyam pama ye bâng ragey min.

¹⁵Yóng in, na yin a shara Yɛgɛt Yat de ye vɛ̀sɛ na yêy dyɛngɛ sede bekpatak de yin a tɛ̀.

¹⁶Séy in tsak o na Dagwi kayɛ jeng sede ruga de yin a vɔk, yaga na yin a tɔk dul mɛ̀ mwa ket de be lolo na kya, vemo de Shetan, wo neves, e tabas hin mɛ̀.

¹⁷Tik na tɔ́k hemo wɔgɔ, Dagwi a sey neken min, he sè a yin sede bong dyam de wo gyep rato min. Ko jut in rehâ Dagwi de ra sé sede wal de Gabik Dagwi ha nɔng in.

¹⁸Rá in won jeng de yin a sé ra pyɛ́ yemo mwa, ko lolo hin Dagwi na a sɛlɛ hin. Rá in won kayɛ jeng e gwong de Gabik Dagwi he dura a yin na yin a ra. Yaga ano, bɛrɛng hin nekanang, ko yin ye waa wɛt. Rá in won jojot yaga bemât Dagwi mwa.

¹⁹Ko rá in won yaga me arɔng, yaga na Dagwi a dura a me neha de mê ha e jeng de ma ga yong me na me ha. Rá in hɛ, yaga na me bin ha na yey ting, na me bin tɛ̀ bemat be tɔk pyɛ de yà kana sè e lɛrɛ e ra Yɛgɛt Yat.

²⁰Ma sé womo de Kristi a ga tomo na me shara Yɛgɛt Yat e to mɛ, mwa ano de ma sé re ngyang a remo. Rá in won, yaga na me vɔk yey ting jeng de me shara Yɛgɛt Yat o, sede remo de a jam na me ra.

²¹Gwà yey mot Tikikus de e ra a Darwey fwom na yey mɛ mwa a rɔda vey na a ha a yin pyɛ̂ mwa e ra me. Yi ano, yin a rɔda tɔk yerê sangal hom na pyɛ́ de ma sé ra.

²²Pyɛ ma yemo de ya tɛ̀, ma sé tomo hɛ vey na yin: Yaga na yin a bin tɔk yerê sangal mot, ko yaga na yɛ a gwɛ̌ a yin gap arɔng.

²³Tik na Dagwi Da mot tanga Darwey Yɛsu Kristi be tɛ̀ begwa mot bemat-raa be sangal tyang na bemɛn, na be tɛ̀ yey na bemɛn, na be tɛ̀ gap mɛn e ra Dagwi tanga Kristi arɔng.

²⁴Tik na Dagwi a dura a mwa vemo nerat, yɛn de be sang yɛnɛ tɛ̂ yey mɛn na Darwey mot Yɛsu Kristi wɛt.