Read berom Filipi 1 Bible Online

Filipi 1 - berom bible

Filipi 1

¹Bwok-rwang gwomo yi e vɔ Bulus tanga Timotawus, besam Kristi Yɛsu, Vɔk na mwa bemât Dagwi e Filipi, vemo de ba sé sangal e ji nesa na Kristi Yɛsu, mwa na bemât nuyel tanga bemât sɛlɛ̂ ekilisiya arɔng:

²Tik na Dagwi, yɛ Da mot, tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

³Kayɛ jeng de me bare na yin, me feng a Dagwi hom.

⁴Ko kayɛ jeng de me ra won yaga yin mwa, me ra hɛ na yey pyɛng arɔng

⁵yaga gwong de yin a ga sɛlɛ me e ji fwôm Yɛgɛt Yat, yimo yi e tuk hê mɛsɛng de yin a sey yɛ̄ pere vey e remo.

⁶Ko ma tɔk tsɛng-tsɛng, yɛ Dagwi de a susu fwom rwat gwomo e ji neyey min a rɔda re mɛ̀ nuyel na a tala gwɛ tuk de Kristi Yɛsu e ba vɛ̄ hɛ.

⁷A sé tyɛng na me bare na mwa hin ano, yaga yin a sé bemât yey hom. Yaga me tanga yin mwa, wot a ga sey nerat de Dagwi a ga nɔng ot, mwa a remo de ma sé re ngyang tanga jeng de ma kana tumal e duk shɔt arɔng, na me ha há na me dul mɛ̀ Yɛgɛt Yat, na me to dura, ya sé tsak o.

⁸Dagwi a tɔk, ma sé ha tsak o jeng de ma ye, me tɛ̀ yey hom na yin mwa e gwong de Kristi Yɛsu pyɛ mɛ e tɛ̀ yey mɛ na yin.

⁹Won hom a hemo yaga yin: Me ra won na yin a gwɛ̌ tɛ̀ yey na bemin ding-ding, na yin a vɔk tɔ́k hê tsak o arɔng, na yin a kyɛm yin a gas pyɛ́ de ya sé ryat na pyɛ́ de ya sé vyes.

¹⁰Yi ano, yin a rɔda tɔk kasa yēmo de ya dal mwa na nerat, ko yin a rɔda ba sè jɛrɛ, vit a buru sɛ̌ tuk de Kristi e ba vɛ̄ hɛ.

¹¹Ko yin a rɔda vɔk negwɔn nerat nemo de ne yi na Yɛsu Kristi, na yin a to ra tomong rat pyak. Bemat de bê ba di tomong o bê nɔ̂ng Dagwi gbɔng nerey, na be somo hɛ arɔng.

¹²À begwa, me simo na yin a tɔk, pyɛ́ yemo de yá té na me, mwin, ya ga sɛlɛ e ji rê nuyêl sharâ Yɛgɛt Yat.

¹³Yi ano, mwa bemât gyeng lɔ gwɔ̀m tanga bwang bemât mwa e ngamo ba tɔk, ma sé re ngyang, yaga me ra a Kristi fwom.

¹⁴Ko sángal hom e lɔ̂ ngyang ha tɛ̀ bwarwêy bemat-raa be gwɛ̌ ye yɛndɛng e ra Darwey. Yaga ano, yɛn e re nuyel na yey ting e de ha a bemat rehâ Dagwi, vit a bengyip.

¹⁵Mwin, behak mɛn be shara reha e ra Kristi yaga repugu na jāma yol, ko behak kwong be shara rɛ, yaga pyɛ́ de yɛn e simo be ra ya sé ryat.

¹⁶Vemo mo be shara rɛ, yaga yɛn a tɛ̀ yey na me; ko be ra ano, yaga yɛn a tɔk, Dagwi a ga tik me e ngamo, na me ha há na me dul mɛ̀ Yɛgɛt Yat.

¹⁷Ko vane kwong, be shara reha e ra Kristi e gwong de gwa sé tsak o wɛt, ko yɛn e ra rɛ na negwɔn simô rato; yɛn e tē kɛ gyeng yɛn e gwɛ̌ nɔng me reyɔm a remo de ma sé re ngyang.

¹⁸Bwang sɛ́ kwong ɛ? Kɛ yɛn e shara a bemat há mo na tsak o kɛ na negaren ayi, ma vɔk yey pyɛng à me, yaga gbɔng pyɛ ya sé wɔgɔ, bē shara reha e ra Kristi e kagwɛ gwong. Ko ma rɔda re nuyel na vɔk yey pyɛng arɔng,

¹⁹yaga ma tɔk, ba rɔda ba pat me e ngyang yaga newon min tanga sɛlɛ de he yís yi na Gabîk Yɛsu Kristi.

²⁰Ma tɛ̀ e yey hom sizɔng, ko ma sɛt yey hom e ra pyɛ yemo ngan: Me vo rekyen pyɛ hom e kagwɛ gwong wɛt, ko ma rɔda vɔk yey ting ding-ding a remo tanga kayɛ jeng, yaga na be nɔ̂ng Kristi nerey yi e gwông sangal hom, kɛ jeng de ma rɔngɔl na neken kɛ jeng de mê ku ow.

²¹E di hom, vit a pyɛ de ya dal Kristi na nerat e ji sangal hom e jey, ko ka sede mê ku, a rɔda dal a me na nerat.

²²Ko ka sede neken hom na sɛ́ e ngamo nuyel, mê tɔk gwɛ̌ ra fwom rwat. Yaga ano, ma sé dasap pyɛ de mê kasa.

²³A sé a me kpɛɛ e kawɛ bak: Me dal na simo ka ma ga tik jey yemo na me wɔ̀ sangal tanga Kristi; hemo he dal a me sizɔng.

²⁴Ko e bak o hwak, ê sè gbɔng pyɛ sede ma gwɛ̌ pɔl ba e jey, yaga na me sɛlɛ hin.

²⁵Sede remo de ma tɔk tsɛng-tsɛng, hemo ha sé ano, ko ma tɔk arɔng, pɔlɔ hom ha rɔngɔl. Ma rɔda sangal tanga yin mwa, na me sɛlɛ hin na yin a re nuyel, na yin a vɔk yey pyɛng yemo de ya yi na sêy tsak o.

²⁶Ano kwong, jeng de ma rɔda to vey na yin, yin a rɔda gwɛ̌ ra kaa na me e ji sangâl nesa min na Kristi Yɛsu.

²⁷Gbɔng pyɛ de ya dal a yet: Tik na negwɔn sangal min ne sè yerê ne Yɛgɛt Yât Kristi. Kɛ ma sɛ̀ gwông vey di in kɛ ma sɛ̀ wɛt, ko me simo me wok, yin a ga tɛ́ in pyɛ jining, ko yin a sé tumal gak, yin a sé tó como mwa hin na yey rining, yaga yerê sêy tsak o de he yi na Yɛgɛt Yat.

²⁸Yin wok bengyip bemât repugu min ko tyɔng wɛt. Hane hê dura a yɛn wɛshɛrɛk, Dagwi a rɔda wey na yɛn, ko a rɔda sey neken min, ko e yɛ wɛ de a rɔda dura, pyɛ mo ya sé ano.

²⁹Dagwi a dura a yin nerat mɛ, na yin a sey tsak o na Kristi zɔng wɛt, ko na yin a sɔ reyɔm yaga yɛ arɔng.

³⁰A remo, yin a sé e ji tô como tanga me. A sé e como mo de yin á kana bɛrɛng, ma sè tó mo yimo, ko e yɛ a yemo de me rɔɔ tó, sede remo de yin e wokos.