Read berom Filipi 2 Bible Online

Filipi 2 - berom bible

Filipi 2

¹Sángal nesa min na Kristi he nɔngɔs hin gap, ko tɛ̂ yey mɛ he wɔrɔk hin. Yin e wuna nesa na Gabik Jɛrɛ, ko yin e wok nemwishish na toshô reyɔ̂m bemin.

²Ka sede a sé ano, ko tik na báre min he sè hining, na yin a tɛ̀ yey na bemin e gwong gwining, na yin a wuna hin mwa, na yin a simo pyɛ jining arɔng. Hemo ha rɔda tɛ̀ me sila na yey pyɛng.

³Yin vɔk simô to kɛ tos to wɛt, ko dyɛ́ng in bato min, na yin a jut bemat behak ba dal in.

⁴Tik na kawɛ mwat e ji min a ra pyɛ́ de ye sɛlɛ mumwɛ, ko a ra pyɛ́ de ye sɛlɛ to mɛ zɔng wɛt.

⁵Tik na negwɔn min ne sè sede nemo de ná sè ne Kristi Yɛsu:

⁶Yɛ de á sè tyɛng sede Dagwi kayɛ jeng, ko mwa ano, á jut sángal mɛ mo sede Dagwi ha sé pyɛ wɛt de ê kyɛm a hàla wɛt.

⁷Ko á simo a hàla sángal hê nerey mɛ mo, á tɛ́ ɛ tyɛng sede sam. Á jut rebek tyɛng na mwasi, ko á sangal e jey sede mwasi.

⁸Á dyɛng to mɛ, á simo a raa gwông reku, reku re kak e ra cɔ́gɔt.

⁹Yaga ano, Dagwi á nɔng ɛ nerey de na dal mwa, ko á to vo a yɛ reza de ra dal bwang bazâ mwa,

¹⁰yaga na mwa vemo de ba sé e lagwi, tanga e ngamo e jey, na e nɛ̂n vwel arɔng ba rɔda ba ye guduruk e jeng de bê wok rezâ Yɛsu, na be re a yɛ fongol.

¹¹Ko yɛn mwa ba rɔda ba ha wɛshɛrɛk: Yɛsu Kristi a sé Darwey; yi ano, yɛn a rɔda to ba nɔ̂ng Dagwi Da gbɔng nerey.

¹²Yaga ano, à besâ yey hom, sede remo de yin á kana gyeng há hom gyam de ma sè rɔngɔl na yin, ko a to sé gbɔng pyɛ na yin a gwɛ̌ gyeng hɛ a remo de ma sé tanga yin wɛt. Yē in ngyɛ́k e ji bengyip Dagwi na rebêk vow, na yin a sila mɛ̀ fwôm sêy neken min.

¹³Yaga Dagwi a sé ra fwom e neyey min, ko a sé e yɛ de e tɛ̀ in na yin a simo ra pyɛ́ de yɛ̀ e simo, ko e nɔng in gâp râ yɛ̄ arɔng.

¹⁴E ji kagwɛ fwom de yin e ra, rá in gwɛ sana neha gwɔrɔng kɛ tô cuna,

¹⁵yaga na be sɛ̀ buru hak e ji min wɛt, na yin a sè jɛrɛ arɔng. Ano kwong, yin ê sè nèy Dagwi de vit a shɔt e ra nɛ, mwa ano de yin a sé sangal e jey e ji bemât banɛn de begwong mɛn ba sé cik wɛt. Ko tik na yin a sè sede negbêy netangacɛn de ne lolo e jey,

¹⁶sede remo de yin e nɔ̂ng bemat reha remo de re nɔngɔs neken. Ka sede yin e ra ano, ko ma rɔda sɛ̀ pyɛ râ kaa na yin tuk de Kristi e ba vɛ̄ hɛ, yaga hane hê dura, ma mɔrɔ rebek hom na me tē ngyɛ́k e nɔrɔ wɛt.

¹⁷Sêy tsak o min ha sé sede nɔrɔ̂ yas de yin a yɛt vɔk na Dagwi. Ka ba ka jut neken hom na be gwɛ̌ nemi hom e ra nɔrɔ min o, mê vɔk yey pyɛng, ko mê wuna yey pyɛng hom tanga myin mwa arɔng.

¹⁸Ano kwong, tik na yin arɔng yin a vɔk yey pyɛng, na yin a to wuna yey pyɛng min tanga nyang!

¹⁹Ka sede Darwey Yɛsu a simo, ma sé sɛt yey hom, ma vey bagât tomo Timotawus vey na yin. Ko jeng de e ba toyo, a rɔda ha a me neha min, ko hane ha rɔda yong a me yey.

²⁰Ma to vɔk mwat hwak de báre mɛ ha sé sede nang wɛt sɛ̌ yɛ Timotawus zɔng. E yɛ de e tē ngyɛ́k mwin na a sɛlɛ hin.

²¹Bwang o mwa ba sé bare e ra pyɛ́ de ye sɛlɛ mɛ̀ bato mɛn, ko yɛn a ye bam na pyɛ̂ Yɛsu Kristi.

²²Yin pyɛ min yin a tɔk, yɛ a sé mwat rwat; wot tanga yɛ, wot a ga ra fwôm Yɛgɛt Yat sede da na hwey mɛ.

²³Yaga ano, ma sɛt yey hom na me tomo hɛ vey na yin e jeng de ma tɔk pyɛ de yê té na me.

²⁴Ko ma tɔk tsɛng-tsɛng, ka sede Darwey a simo, me pyɛ hom ma vey bagat vey na yin.

²⁵Ma di a sé gbing-gbing na me toyo a yin na gwa mot Ɛpafarɔditus, de a sé sâ fwom hom wo Yɛgɛt Yat tanga sâ tô como hom. Jeng de ma kana simo mwât sɛlɛ, á to sè e yɛ wɛ de yin á tomo hɛ vey na me.

²⁶A sé a yɛ ka a ga ba di in mwa hin, ko a sé a yɛ kpɛɛ ding-ding, yaga yin á wok, á ro ɛ.

²⁷Mwin, á kana ro ɛ, ko á ye e dal wɛt. Ko Dagwi a ga tosho reyɔm mɛ; a tosho reyɔm mɛ zɔng wɛt ko mwa na nang arɔng. A simo na pyɛ cak ye to gwɛ̌ a me reyɔm e ra reyɔm wɛt.

²⁸Yaga ano, me dal na simo ka ma ga tomo hɛ vey na yin. Yi ano, jeng de yin ê ba to di ɛ, yin a rɔda vɔk yey pyɛng; ko me arɔng ma rɔda to lashe yey wɛt.

²⁹Jeng de e ba pom na yin, séy in hɛ na yey pyɛng sizɔng, yaga mwa hin yin a sé vê Darwey. Ko a jam na yin a nɔ̂ng bemat sede yere mɛ nerey.

³⁰Yaga bwang o tyɔng na a ku e ji fwom de a ra a Kristi, ko a ye waa a neken mɛ, yaga na a sɛlɛ me e gwong de yin pyɛ min yin a tɔk ra a me wɛt.