Read berom Filipi 3 Bible Online

Filipi 3 - berom bible

Filipi 3

¹E yɛnɛ mo, à begwa hom, vɔk in yey pyɛng, yaga yin a sé sangal e ji nesa na Darwey. A sé a me negbang wɛt, ka sede ma to jɛk pyɛ́ de ma ga kana jɛk, ko ya rɔda gyep in.

²Tē in naka na bemat de be ra pyɛ́ vyes, yɛn bevu, de be simo be yɛt babêk bemat.

³A sé e wot de wɔ́ e cwɛl mot ha sé hê mwin, yaga wot e re a Dagwi fongol yi na sɛlɛ̂ Gabik mɛ, ko wot e ra kaa, yaga wot a sé sangal e ji nesa na Kristi Yɛsu. Ko wot e ye yɛndɛng e ra pyɛ́ de be ra na rebek mot wɛt.

⁴Mwin, me yâng ye yɛndɛng e ra pyɛ́ de be ra na rebek arɔng. Ka sede mwat hwak e bare, a vɔk pyɛ de ye tɛ̀, a ye yɛndɛng e ra pyɛ́ de be ra na rebek, ko di, ma dal ɛ na yɛ̄ mwa:

⁵Bá wɔ́ a me e cwɛl e pɔlɔ hê rwit. Ma sé tɔ̂ BeIsrayɛl yi e yerê Bɛnyamin; ma to sé WoIbrani yi e yére hom. E rà rehâ gyeng Badu BeYuda kene — ma sè WoFarisi,

⁶ko ma tē ngyɛ́k na me tak a bemat-raa reyɔm. E rà rehâ sé cik e bayîs Dagwi yi na gyeng Badu BeYuda — ba sɛ̀ buru hak e ra me wɛt.

⁷Mwa ano de ma kana jut pyɛ́ yane sede ma rɔda sɛ̀ mɛ̀ pyɛ cak, ko a remo ma di, ya sé a me gaba zɔng yaga Kristi.

⁸Ko a sé pyɛ́ yane zɔng wɛt; ma jut kayɛ pyɛ mwa sede gaba, yaga, ka sede ma tɔk Kristi Yɛsu Darwey hom, ko hemo ha sé pyɛ de ya dal a me mwa na nerat. A sé yaga Kristi mo de ma ga hàla kayɛ pyɛ; ma ga jut pyɛ̂ mwa sede yapyi, yaga na me bin sɛ̀ pyɔlɔ, yɛ̄ à Kristi pyɛ mɛ,

⁹na be wuna me mwa na yɛ arɔng. A remo, Dagwi e bɛrɛng me, ma sé cik, yaga ma ga sey tsak o na Kristi. A sé yi na pyɛ cak ryat de ma ga ra kɛ yi e gyeng Badu wɛt de ma sé cik, ko a sé yi na Dagwi, yaga ma ga sey tsak o na Kristi.

¹⁰Pyɛ jining zɔng de me simo ya sé wɔgɔ, me tɔk Kristi, na me to tɔk reto de ra vey yi na sene mɛ yi e reku. Me simo na me wuna me na yɛ, na me sɔ reyɔm de yɛ a sɔ, na me tɛ́ me sede yɛ e gwong de yɛ a ku arɔng.

¹¹E gwong gwomo mo, ma tɛ̀ e yey hom, ma rɔda ba sene yi e reku.

¹²Ma sé ha wɛt wɔgɔ, ma ga sɛ̀ pyɛ́ yemo e ngyen, kɛ ma ga sila gyat. Ko ma sé tē ngyɛ́k na me kaba pyɛ́ mo, yēmo de ya tɛ̀ Kristi Yɛsu a kaba me na me tɛ́ me mwɛ.

¹³Mwin, à begwa, ma jut e yey hom wɛt wɔgɔ, ma ga sɛ̀ pyɛ́ mo e ngyen. Ko pyɛ jining de me ra a yet ngan: Ma ye bam a pyɛ́ de ya ga kwey, na me shusha bayis hom e ra yēmo de ya sé e nuyel hom.

¹⁴Ma sé tē ngyɛ́k na me re jɔgɔ mo, na me sɛ̀ pyɔlɔ. Pyɔlɔ mo yɛ a neken e lagwi de Dagwi a yila me mɛ̀ yi na Kristi Yɛsu.

¹⁵Tik na wot mwa de wot a ga vey bemat e ji pyɛ̂ Dagwi wot a vɔk báre yerê hane mo. Ko ka sede yin a vɔk báre hak detu e ra pyɛ cak, ko Dagwi a rɔda dura a yin pyɛ mo wɛshɛrɛk arɔng.

¹⁶Gbɔng pyɛ ma yet ngan: Tik na wot a re nuyel na raà pyɛ́ de wot á sè raa yɛ̄ vey e jeng yemo.

¹⁷À begwa, yin mwa yin dopse masa me, na yin a to bɛrɛng vemo de ba vɔk negwɔn nerat e gwong gwomo de wot a ga dura a yin.

¹⁸Ma ga kana ha a yin zang pyak, ko a remo ma sé to ha a yin na nemwishil wɔgɔ, behak ba sé pyak de negwɔn mɛn ne dura, yɛn e kyɛ́ ɛn rekû Kristi e ra cɔ́gɔt-kak.

¹⁹E yɛnɛ mo, Dagwi a rɔda ba wey na yɛn, yaga jim mɛn ya sé dagwi mɛn. Yɛn e to dak ragey na pyɛ́ de ya jam na yɛn a wok rekyên yɛ̄, ko mwa báre mɛn ha sé e ra pyɛ̂ jey.

²⁰Ko wot kwong wot a sé bemât repomô lagwi, ko wot a sé gyeng tyɔng wɛt vêy Darwey Yɛsu Kristi yi e lagwi na a vey sey ot.

²¹Yɛ a rɔda sege a wot babek vemo de ba sé gbɛrɛk, vemo de ba rɔda ku, na a tɛ̀ vɛ be tɛ́ ɛn sede rebek mɛ de ra vɔk gbɔng nerat. Ko a rɔda ra fwom o na reto mɛ de re tɛ̀sɛ pyɛ̂ mwa ye ra pyɛ́ de yɛ e simo.