Read berom Filipi 4 Bible Online

Filipi 4 - berom bible

Filipi 4

¹Yaga ano, à begwa hom de ma tɛ̀ yey na yin, tumal hin gak e sangâl nesa min na Darwey. À besâ yey hom, a sé a me ka ma ga di in; yin e pɛngɛ a me yey, ko yin a to sé pyɔlɔ̂ fwom hom.

²Ma sé ra won na Eyudiya tanga Sintiki wɔgɔ, yɛn a tik na nu mɛn he sè hining, yaga yɛn a sé vê Darwey.

³Ko hwo kwong, à sâ gafiri hom wo tsak o, ma sé ra won na hwo, na hwo sɛlɛ beha vemo, yaga me tanga yɛn, wot á sè bûm fwôm sharâ Yɛgɛt Yat, tanga Kelemen na bwang besâ fwom hom arɔng. Ko Dagwi a ga jɛk baza mɛn e bwok-basa de be jɛkɛs ɛ̀ bazâ vemo de ba vɔk neken.

⁴Vɔk in yey pyɛng jojot, yaga yin a sé sangal e ji nesa na Darwey; ma sé to yang in, vɔk in yey pyɛng!

⁵Tik na negwɔn min ne dura a bemât mwa nehywɛ min. Darwey ê kwɔk vey.

⁶Yin sap pyɛ cak wɛt, ko e ji kayɛ pyɛ, rá in won, na yin a ha a Dagwi pyɛ̂ mwa de yin e simo, rá in won na yɛ, yaga na yɛ a sɛlɛ hin, ko feng in a yɛ kayɛ jeng de yin e ra ano.

⁷Ko Dagwi a rɔda tɛ̀ yey min ye dyɛng e gwong de gwa dal tɔ̂k mwasi; yêy dyɛngɛ mo ye gyep neyey min na báre min, yaga yin a sé sangal e ji nesa na Kristi Yɛsu.

⁸E yɛnɛ mo, à begwa, tɛ̀ in báre min e ra pyɛ́ de ya sé tsak o na yēmo de ya sé naka na be nɔ̂ng yɛ̄ nerey, e ra yēmo de ya sé tyɛng na yēmo de ya sé jɛrɛ, e ra yēmo de ya sé ye tɛ̂ yey na yēmo de be ha há rat e ra yɛ̄, e ra yēmo de ya sé gyat tanga yēmo de be somo yɛ̄.

⁹Wɔ̀ rá in pyɛ́ de yin a ga masa ko yin a ga sey yi na me, yēmo de yin a ga wok e nu hom, mwa na yēmo de yin a ga di me ra. Ko Dagwi, de e tɛ̀sɛ neyey mot ne dyɛng, a rɔda sangal tanga yin.

¹⁰E ji sangâl nesa hom na Darwey, ma vɔk yey pyɛng sizɔng, yaga e bamâ jeng pyak yin a to hwo dura a me, yin e simo na yin a sɛlɛ me. Mwin, yin á kana simo na yin a sɛlɛ me sɛ̌ nevît gwông durâ hɛ zɔng.

¹¹Ma sé ha ano wɛt, yaga ma bidɛ pyɛ cak. Ma ga masa niri na pyɛ́ de ma vɔk e kagwɛ gwông sangal hom.

¹²Ma tɔk jeng nevit, ko ma to tɔk jeng sɛ́. E kahɛ kwɔn na kayɛ jeng, ma ga masa niri na pyɛ́ de ma vɔk, kɛ ma sé e ji vyong kɛ e ji sesirik, kɛ ma vɔk kepyɛ hyet kɛ pyɛ́ pyak, ma ga masa neyɛnɛ̂ pyɛ̂ mwa.

¹³Me tɔk ra pyɛ̂ mwa yi na Kristi de e nɔng me gap.

¹⁴Ko yin a ra naka de yin a sɛlɛ me e jeng reyɔm hom.

¹⁵À yin bemât Filipi, yin a tɔk, jeng de ma tik Makedonya, e jeng de ma susu sharâ Yɛgɛt Yat, á sè e yin nju min de yin á sɛlɛ me. Ko á to sè ekilisiya min zɔng de a wuna vɔ na me e ji tomsal na pyɛ́ tanga seres yɛ̄ arɔng.

¹⁶Jeng de má sè e Tesalonika arɔng, ma simo sɛlɛ, ko yin á tomo a me na hɛ zang hining zɔng wɛt.

¹⁷Me ye ano wɛt, yaga me simo seres nɔrɔ min zɔng, ko yaga me simo na pyɔlɔ min ye ba gwɛ̌ hɛ arɔng.

¹⁸A remo kwong, yin a ga tala a me pyɛ̂ mwa naka, ko ya pere wɔ̀ kat mwa arɔng. Ma ga sɛ̀ kayɛ pyɛ de me simo, sede remo de ma ga sey nenɔrɔ min yi na Ɛpafarɔditus. Nenɔrɔ mo na sé sede pyɛ nesang hyɔɔlɔl, na to sé sede nɔrɔ̂ yas de be yɛt vɔk na Dagwi hemo de a sey, de he yong a yɛ yey arɔng.

¹⁹Dagwi hom kwong a rɔda vɛ́ a yin mwa pyɛ́ de yin e simo. Ê nɔng ot yɛ̄ yi e nepyak pyɛ̂ nedanerey mɛ yi na Kristi Yɛsu.

²⁰Tik na gbɔng nerey ne sè ne Dagwi, yɛ Da mot, nesheneshey! Ano.

²¹Tang în bemât Dagwi mwa show, yɛn vemo de ba sé sangal e ji nesa na Kristi Yɛsu. Begwa mot e ngamo na me ba sé tang in show.

²²Bemât Dagwi mwa e ngamo arɔng be to tang in show, a kat mɛ̀ bemât lɔ Da vwel BeRoma.

²³Tik na Darwey Yɛsu Kristi a tɛ̀ nerat mɛ e neyey min.