Read berom Kɔlɔsi 1 Bible Online

Kɔlɔsi 1 - berom bible

Kɔlɔsi 1

¹Bwok-rwang gwomo yi e vwɔ hom Bulus, tom Kristi Yɛsu yi na simô Dagwi; gwa yi na me tanga gwa mot Timotawus,

²Vɔk na bemât Dagwi e Kɔlɔsi, vemo de ba sé begwa mot yi na sangâl nesa mɛn na Kristi, vemo de be raa hɛ na yey mɛn mwa: Tik na Dagwi Da a dura a yin nerat mɛ, na a tɛ̀ yey min ye dyɛng.

³Kayɛ jeng de wot e ra won yaga yin, wot e dopse feng a Dagwi, yɛ Dâ Darwey mot Yɛsu Kristi.

⁴Yaga wot á kana wok, yin a sey tsak o na Kristi Yɛsu, ko yin a tɛ̀ yey min na bemât Dagwi mwa.

⁵Yin a sé ra ano, yaga yin a sé sɛt yey min e ra pyɛ́ de Dagwi a sé tikis a yin e lagwi. Yin á kana wok há e ra pyɛ́ mo jeng de ba ha a yin Yɛgɛt Yat, e yɛ̄ à há de ha sé tsak o.

⁶Yɛgɛt Yat o ye gwɛ̌ shara hɛ e kahɛ kwɔn e jey, ko ye tɛ̀sɛ bemat be ra tomong rat. E pyɛ ma yemo de ya té e tē min arɔng yimo jeng de yin a tānga wok há e ra nerat de Dagwi e dura a bemat, ko yin a hwo tɔk, há mo ha sé tsak o.

⁷A sé e Ɛpafaras de á kana basa a yin Yɛgɛt Yat o. E yɛ à sâ fwom mot de wot a tɛ̀ yey na yɛ, ko a sé ra fwôm Kristi na yey mɛ mwa. Yɛ a sé tanga yin e to mot.

⁸A to sé e yɛ de a ga ha a wot e ra gwong de yin e tɛ̀ yey na bemat yi na retô Gabik Dagwi.

⁹Yaga ano, yimo jeng de wot á kana wok pyɛ́ yemo, wot e dopse ra won yaga yin. Wot e lolo Dagwi na a tɛ̀, yin a tɔk tsɛng-tsɛng pyɛ́ de yɛ e simo yin a ra; wot e to ra won, na yin a bin vɔk netsitsɛng de na yi na Gabik mɛ, yaga na yin a tɔk pyɛ́ mɛ mwa.

¹⁰Yi ano, yin a rɔda tɔk sangal e gwong de gwa jam yaga vemo de be raa Darwey, ko yin a rɔda pɛngɛ a yɛ yey e kagwɛ gwong. Yin a rɔda ra tomong rat detidetu, ko yin a rɔda gwɛ̌ tɔk pyɛ̂ Dagwi kayɛ jeng.

¹¹Wot e to ra won, na Dagwi a ra fwom na gbɔng reto mɛ de ra dal kayɛ pyɛ, na a tɛ̀ in na yin a tumal gak na gap. Yi ano, e ji kayɛ pyɛ yin a rɔda tɔk niri ding-ding, na yin a vɔk yey pyɛng

¹²e jeng de yin a sé feng a Dagwi Da. E yɛ de a wunta a yin gwong na yin a sɛ̀ numo min hê pyɛ́ de a sé tikis yaga bemat mɛ e kwɔn de negbey mɛ na sé ɛ̀.

¹³Yɛ a ga pat ot yi e kwɔn de lwīl gwa vɔk reto, ko a vey na wot, a tɛ̀ ot e ji kwɔn de Hwêy yey mɛ ha sé re ɛ̀ negwɔm.

¹⁴A sé e Hwey mɛ mo de ha ga viri hot, ko ha ga hàla a wot banɛn mot arɔng.

¹⁵Vit a mwat de e tɔk di Dagwi; ko Yɛsu Kristi, de bemat ba ga di ɛ, e yɛ de a ga dura a wot tyɛng mwat de Dagwi a sé. E yɛ de a sé Hwêy mɛsɛng hê Dagwi, ko a dal kayɛ pyɛ de Dagwi a yong.

¹⁶Yaga a sé yi na yɛ de Dagwi à kana yong pyɛ̂ mwa e lagwi tanga e jey, pyɛ́ de bemat be tɔk di tanga yēmo de be tɔk di wɛt, mwa na yerê begabîk mwa de ba vɔk reto, na vemo de be re negwɔm, tanga vemo de ba vɔk gap arɔng. Dagwi a yong kayɛ pyɛ yi na Hwey mɛ, yaga na ye nɔng hɛ nerey.

¹⁷Kristi mo à kana sè yimo gyam pyɛ cak ye sè, ko e yɛ de a vɔk pyɛ̂ mwa myak.

¹⁸Yɛ a sé tô rebek arɔng, ko rebek o, rɛ à ekilisiya. E yɛ de a susu kayɛ pyɛ, ko e yɛ de a sé wo mɛsɛng de a sene yi e reku, yaga na a vɔk kwɔn de ha dal mwa e ji kayɛ pyɛ.

¹⁹Yaga Dagwi pyɛ mɛ a simo na negwɔn mɛ ne sè e ji Hwey mɛ mo, na ne to sila hɛ mwa.

²⁰A to simo na a gang-nshi na pyɛ̂ mwa yi na Hwey mɛ. Yi na nemî Hwey mɛ mo, nemo de há shushu e jeng de bá kak hɛ e ra cɔ́gɔt, Dagwi á wunta a bemat gwong na be sangal tyang tanga yɛ. Yi ano, yɛ á gang-nshi na pyɛ̂ mwa de ya sé e jêy mwa na yēmo de ya sé e lagwi.

²¹Yin arɔng yin á kana sè yikyik na Dagwi a raane, yin á kana sè vê repugu mɛ yi na báre ves de yin á vɔk e neyey min tanga yi na pyɛ́ vyes de yin á kana ragas.

²²Ko a remo, Dagwi a ga gang-nshi na yin, yaga Kristi de á kana tɛ́ ɛ mwasi á ku yaga sɛlɛ min. A ra ano, yaga na a tɛ̀ in yin a sè jɛrɛ, vit a pyɛ cak vyes kɛ vit a shɔt e ra yin, yaga na a vey na yin e nuyel mɛ.

²³Ko a sé gbing-gbing na yin a re nuyel na sêy tsak o na Kristi; tumal hin gak, na yin a digis wɛt. Ré in nuyel na sɛt yey min e ra pyɛ́ de yin á kana wok yi na Yɛgɛt Yat. E yɛ̄, à Yɛgɛt Yat de ba shara a bemât mwa e jey; ko me Bulus arɔng, fwom hom, gwɛ à sharâ Yɛgɛt Yat yemo mo.

²⁴E jeng yemo de ma sé sɔ reyɔm yaga sɛlɛ min, ma vɔk yey pyɛng. Yaga, tyɛng sede Kristi á kana sɔ reyɔm, me arɔng ma sé sɔ reyɔm e rebek hom. Yi ano, ma sé sɛlɛ na be sila sɔ̂ reyɔm mɛ de a sɔ yaga rebek mɛ de ra sé ekilisiya.

²⁵Dagwi a kasa me na me ra a ekilisiya mo fwom. Fwom o de a nɔng me na me ra yaga sɛlɛ min gwa sé ngan: Me ha a bemat reha mɛ mwa.

²⁶Há mo de ma sé shara ha sé e ra pyɛ de yà kana sè e lɛrɛ yimo yi e nesheneshey, ko yaga ano, vit a mwat de à kana tɔk yɛ vey e jeng yemo. Ko a remo, Dagwi a ga dura a bemat mɛ yɛ wɛshɛrɛk.

²⁷A yong e yey mɛ na a wunta a bemat mɛ mo pyɛ neyaang o, na a dura a yɛn gwong de pyɛ mo ya vɔk gbɔng nerat de na sé shɛrɛk, ko ya vɔk sɛlɛ yaga mwa yére bemât jey. Pyɛ neyaang o de a wunta yɛ ya sé ngan: Kristi a sé sangal e neyey min. Yaga ano, yin a sé sɛt yey min, yin a rɔda sè tanga yɛ e kwɔ̂n gbɔng nerey mɛ.

²⁸Ano kwong, wot a sé shara a bemât mwa reha e ra Kristi. Wot a sé vo a yɛn redu, ko wot a sé basa a yɛn na mwa netsitsɛng de wot a vɔk. Wot a sé ra ano, yaga na wot a tɛ̀ kawɛ mwat de a sé sangal e ji nesa na Kristi a tɛ́ ɛ mwat de a ga vey naka gyat.

²⁹Pyɛ́ ma yemo de ya tɛ̀, ma sê bûm fwom, me pɛngɛ me e de râ gwɛ, ko ma sé ra fwom na gbɔng gap de Kristi e nɔngɔs me, ko e hɛ de he ra fwom e ji hom arɔng.