Read berom Kɔlɔsi 2 Bible Online

Kɔlɔsi 2 - berom bible

Kɔlɔsi 2

¹Me simo na yin a tɔk gwong de ma pɛngɛ me e de râ fwom, yaga na me sɛlɛ hin, tanga bemât Lawɔdikya, tanga mwa vemo de ba ga di me e ngyen wɛt.

²Ma sé ra fwom o, yaga na yɛn a bin vɔk yey ting, na yɛn a to tɛ̀ yey mɛn na bemɛn, yaga na yɛn a wuna hɛn na bemɛn. Yi ano, yɛn a rɔda tɔk pyɛ̂ mwa tsɛng-tsɛng. Yerê tɔ́k o ha sé a yɛn gbɔng pyɛ̂ nedanerey. Yi e gwong gwomo, yɛn a rɔda tɔk pyɛ de yà kana sè e lɛrɛ, yemo de Dagwi a wunta a wot yɛ. Pyɛ neyaang o ya sé Kristi pyɛ mɛ.

³A sé e yɛ de a nɔng ot yerê netsitsɛng de na sé tsak o, na yerê tɔ́k de ha sé tsak o arɔng. Pyɛ́ mo ya sé nedanerey de Dagwi a nɔng ot.

⁴Ma sé ha a yin ano, yaga na mwat hwak a kwɛlɛng hin na rwak-nu wɛt.

⁵Mwa ano de ma sé na yin e rebek wɛt, ko yey hom ya sé tanga yin e hane. Ma vɔk yey pyɛng jeng de me wok, yin a sé ra pyɛ̂ mwa tyɛng naka, ko yin a tumal gak e de sêy tsak o na Kristi.

⁶Yin a ga simo na Kristi Yɛsu a sè Darwey min. Yaga ano, tik na gwông sangal min gwo jam yaga bemat de ba sé sangal e ji nesa na yɛ.

⁷Seres hin neken, sede retîn cɔgɔt re seres neken yi e berinis rɛ. Tumal hin na gap arɔng, sede lɔ de ha tumal na gap, yaga ba lɔk hɛ e ra retis rerat o. Ré in nuyel na sêy tsak o, na yin a tumal gak, sede remo de bá kana basa a yin. Ko yin dopse feng a yɛ sizɔng.

⁸Tē in naka, mwat hwak a tɛ̀ na yin a tɛ́ in besam mɛ yi na basa mɛ wɛt. Neha mɛ mo na sé yapyi zɔng, ko ne kwɛlɛng bemat. Tɔ́k yerê hemo ha yi na basâ bemat tanga yi na begabik de ba vɔk reto e jey yemo; ko ha yi na Kristi wɛt.

⁹Yaga a sé e ji Kristi, e ji rebek mɛ, de Dagwi na negwɔn mɛ mwa a sé sangal.

¹⁰Yɛ Kristi mo a dal yerê begabîk mwa de be re negwɔm na vemo de ba vɔk reto arɔng. Yi na sangâl nesa min na yɛ, yin arɔng yin a vɔk yerê neken nane mo, ko na ga sila hin.

¹¹Ko a sé yi na sangâl nesa min na yɛ de Dagwi a ga tɛ̀ a yin jɔt de ye dura a bemat, yin a sé bemɛ. Jɔt de Dagwi à kana tɛ̀ a BeYuda, e yɛ à wɔ́ e cwɛl. Ko yin à — yosom min o ha sé pyɛ de mwat a sé ra na vwɔ wɛt, ko ha sé pyɛ de Kristi a ra. A ra ano e jeng de a viri hin yi e negwɔn min ne banɛn ne raane.

¹²E jeng de ba tɛ̀ a yin batisma, á sè sede yin a ku tanga Kristi, ko ba lɛrɛ hin tanga yɛ. E jeng yane mo, Dagwi a sene hin tanga yɛ, yaga yin a sey tsak o, Dagwi de a sene Yɛsu Kristi yi e reku a vɔk reto na a sene hin arɔng.

¹³A raane, e rà pyɛ̂ Dagwi à — yin á kana sè sede bavin o, yaga yin á ra banɛn, ko yaga yin á kana sè vê Dagwi wɛt. Ko Dagwi a tɛ̀ in na yin a to sè beken tanga Kristi. A hàla a wot banɛn mot mwa.

¹⁴A raane, bá kana gang ot na shɔt, yaga wot a ga gyili badu Dagwi. Ko Dagwi a mɔrɔ banɛn de ba ga kana gang ot na vɛ, ko a pat vɛ mwa. Á sè sede a kak vɛ e ra cɔ́gɔt de ba mɔrɔ Kristi e ra yɛ̄.

¹⁵E jeng de Kristi a ku e ra cɔ́gɔt-kak o, a re como e ra mwa begabik de be re negwɔm na vemo de ba vɔk reto, ko a dura a bemat dɛdɛɛt, yɛ a dal vɛ mwa na nerey.

¹⁶Yaga ano, yin simo na mwat hwak a tɛ̀ a yin badu e ra pyɛ de yin ê re kɛ sɔ wɛt, kɛ e ra gwong de yin e gyeng negasi nehak nerey o, kɛ Nzem Pwɛl Pwas, kɛ Tuk Shábat.

¹⁷Pyɛ́ yerê yemo ya sé sede rezina zɔng rê pyɛ́ de ya sé kyè vey. Ko pyɛ de ya sé mwin, yemo de rezina mo ra sé e tô yɛ, yɛ à Kristi.

¹⁸Yin simo bemat behak be ra a yin shɔt wɛt. Bemat yerê vemo be tē, yɛn a dal bwang bemat, yaga yɛn a bɛrɛng pyɛ́ na negwi-ywey; yɛn e sǎ e de dyɛng bato mɛn e gwong de gwa sé mwin wɛt, ko yɛn e re a betom-lagwi fongol arɔng. Bemat o be tos bato mɛn, mwa ano de yɛn a sé pyɛ cak wɛt. Báre mɛn ha sé yerê hê jey yemo zɔng.

¹⁹Yɛn e simo be re nuyel na wuna na Kristi wɛt, yɛ de a sé e tô rebek. E yɛ de e tɛ̀ mwa nedem rebek ne sɛ̀ gap yi na yɛ, ko bahwɔt tanga berinis be sɛlɛ na rebek o re sè pyɛ jining, ko re ras sede remo de Dagwi e simo re ras.

²⁰Yin a ku tanga Kristi, ko begabik de ba vɔk reto e jey yemo ba to vɔk reto e ra yin wɛt. Sede remo de a sé ano, yaga sɛ́ de yin e re nuyel na gwông sangal sede yin a sé bemât jey yemo arɛt? Yaga sɛ́ de yin e gyeng pyɛ̂ nekyiri yerê yemo ngan arɛt:

²¹“Hwo kaba pyɛ yemo wɛt!” “Hwo lɛlɛ yere wɛt!” “Hwo ra yane wɛt!”

²²Pyɛ̂ nekyiri yerê yane ya sé e ra pyɛ́ de yê to vɔk nerat nehak wɛt e bama de ba ga ra fwom na yɛ̄; a sé e bemasi zɔng de be yong pyɛ̂ nekyiri, na be basa yɛ̄ arɔng.

²³E susu mo, e sè a bemat sede pyɛ̂ nekyiri yane mo ya vey na netsitsɛng, yaga ye tɛ̀ ɛn na be re a betom-lagwi fongol, na be to dyɛng bato mɛn e gwong de gwa sé mwin wɛt, na be tak a babek mɛn reyɔm. Ko e ji hâ mwin, yā sé yapyi zɔng, ya vɔk reto wɛt na ye sɛlɛ mwat e de gyêng to mɛ jeng de a wok cwey pyɛ́ vyes de rebek mɛ re simo.