Read berom Kɔlɔsi 3 Bible Online

Kɔlɔsi 3 - berom bible

Kɔlɔsi 3

¹Sede remo de yin a ga wuna hin na Kristi, Dagwi a ga sene hin na neken tanga yɛ arɔng. Yaga ano, jāma hin na yin a sɛ̀ pyɛ́ de ya sé e lagwi, e kwɔn de Kristi a sé sangal e ra gwofwa negwɔm mɛ e vwɔ yegê Dagwi.

²Ré in nuyel na bare e ra pyɛ́ de ya sé e hwomo e lagwi; yin tɛ̀ báre min e ra pyɛ̂ jey yemo wɛt.

³Yaga yin a ga ku, ko neken min na sé tanga Kristi e kwɔn de Dagwi a sé ɛ̀, yɛ de a sé gyeng nɛ yaga yin.

⁴A sé e Kristi de a sé neken min ne mwin. Jeng de ba rɔda ba di ɛ wɛshɛrɛk, ba rɔda ba di in wɛshɛrɛk tanga yɛ arɔng, ko yin a rɔda ba vɔk numo min hê gbɔng nerey mɛ.

⁵Yaga ano, tík in ragâs pyɛ́ yemo de ya yi e cwey pyɛ̂ jey de yin a vɔk e ji min, na yin a jut cwey o sede ya ga ku. Tík in ragâs nejwang tanga kayɛ pyɛ vyes de ye tɛ̀ in ligis. Yin simo na kayɛ yerê cwey pyɛ́ vyes ye vɔk reto e ra yin wɛt. Tík in gananâng pyɛ́, yaga, ka sede yin e ra ano, ko pyɛ́ mo yê tɛ́ ɛ dagwi min.

⁶A sé e yerê pyɛ́ vyes yemo mo de yê tɛ̀ shom Dagwi ya rɔda hwo e ra vemo de be gyeng há mɛ wɛt.

⁷A raane, yin á kana vɔk yerê negwɔn nane, ko cwey ragâs pyɛ́ vyes o yá vɔk reto e ra yin.

⁸Ko a remo, tík in râ pyɛ́ yemo mwa: Yin vɔk shom kɛ yey pep wɛt; yin ra a bemin pyɛ́ vyes wɛt; yin lashe bazâ bemat kɛ yin ha há e ra pyɛ́ de ya sé ligis wɛt.

⁹Yin vɛ́ a bemin bɔs wɛt, yaga yin a ga pat negwɔn min ne raane, nemo de ná tɛ̀ in na yin a ra yére pyɛ́ yane mo,

¹⁰ko yin á jut negwɔn nepas, na yin á tɛ̀ nɛ. A sé e negwɔn nepas o de Dagwi a yong nɛ, ko a to sê bûm yong nɛ arɔng, yaga na ne tɛ́ ɛn sede yɛ pyɛ mɛ, yaga na yin a gwɛ̌ tɔk ɛ.

¹¹Yaga ano, pyɛ cak ye to gas in wɛt, yin de yin a vɔk negwɔn nepas o. Kɛ mwat a sé WoYuda kɛ a sé mwat duk, kɛ ba ga wɔ́ a mwat e cwɛl kɛ ba ga wɔ́ a yɛ wɛt, kɛ mwat a vɔk tɔ́k wɛt kɛ a sé mwat hey zɔng, kɛ mwat a sé sam kɛ a sé hwêy lɔ — yɛn a sé vining o mwa. Ko Kristi a dal kayɛ pyɛ, ko a sé e ji neyey bemât mwa de ba sey tsak o na yɛ.

¹²Yin a sé vemo de Dagwi a ga kasa na yin a sè bemɛ, ko yɛ a tɛ̀ yey mɛ na yin. Yaga ano, vɔk in negwɔn de na jam yaga bemat mɛ. Wok in nemwishish; dura hin a bemat nerat; dyɛ́ng in bato min; vɔk in nehywɛ, na yin a niri arɔng.

¹³Séy in bemat sana simo yin a sege negwɔn mɛn. Hàla a bemin kayɛ jeng de hwak a vɔk pyɛ cak na mumwɛ, sede remo de Darwey mot a hàla a yin banɛn min.

¹⁴Pyɛ de ya dal pyɛ́ yemo mwa ya sé tɛ̂ yey. Yaga, ka sede yin a tɛ̀ yey na bemin, ko hemo he tɛ̀ na pyɛ̂ mwa ye wuna hɛ na ye sila gyat.

¹⁵Kristi a tɛ̀ neyey min ne dyɛng. Tík in na yêy dyɛngɛ mo ye tɛ̀ in na yin a tɔk e neyey min gwong de yin ê raa. Yaga Dagwi a yila hin na yin a sangal na bemin na yêy dyɛngɛ yerê yemo mo, sede remo de yin a sé nedem rebek rining. Ko feng in a Dagwi arɔng.

¹⁶Tík in na rehâ Kristi re sè sede nedanerey de na sé sangal e neyey min. Rá in fwom na mwa netsitsɛng de Dagwi a nɔng in, na yin a basa a bemin, na yin a to vo a yɛn redu. Rá in a Dagwi lɛlɛ, na lɛ̀lɛ-somo, tanga lɛlɛ detidetu de bà yi na Gabik Dagwi. Ko jeng de yin e ra lɛlɛ mo, feng in a Dagwi e neyey min.

¹⁷Ko kayɛ pyɛ de yin e ra na kahɛ há de yin e ha, tik na yin a ra yɛ e ji rezâ Darwey Yɛsu. Feng in a Dagwi Da mot yi na yɛ arɔng.

¹⁸À yin de yin a sé behâ weneng — dyɛ́ng in bato min na beras min. Hemo ha jam yaga bemat de be raa Darwey Yɛsu.

¹⁹À yin de yin a sé beras — tɛ̀ in neyey min na beha min. Yin shìsa hɛn wɛt.

²⁰À yin de yin a sé nèy — sede remo de yin a sé raa Darwey Yɛsu, gyeng in hâ beda na beneng min e ji kayɛ pyɛ. Ka sede yin e ra ano, ko yin e pɛngɛ a Dagwi yey.

²¹À yin de yin a sé beda — yin shɔk a nèy min jim wɛt. Ka sede yin e ra ano, ko na rɔda ye waa zɔng.

²²À yin de yin a sé besam — e ji kayɛ pyɛ, gyeng in hâ bedanelɔ min vê jey yemo. Yin ra ano e bayis mɛn zɔng wɛt, sede vemo de be ra na be simo hɛn mɛ̀. Ko gyeng in há mɛn na yey rining, yaga na yin a bin dura, yin e sap Darwey Yɛsu Kristi.

²³E ji kayɛ pyɛ de yin e ra, rá in yɛ na yey min mwa, sede yin e ra a Darwey fwom, ko sede yin e ra a bemat gwɛ zɔng wɛt.

²⁴A sé e Darwey o de a sé Dalɔ min wo mwin. Yin a tɔk, Darwey o a rɔda nɔng in pyɔlɔ min; pyɔlɔ mo ya sé e pyɛ́ mwa de a sé tik yaga bemat mɛ.

²⁵Ko vemo de ba sé ra pyɛ́ de ya sé tyɛng wɛt, Darwey a rɔda tala hɛn yaga pyɛ́ vyes o mo. Yɛ e kasa bemat behak wɛt.