Read berom Kɔlɔsi 4 Bible Online

Kɔlɔsi 4 - berom bible

Kɔlɔsi 4

¹À yin de yin a vɔk besam — vɔk in hɛn e gwong de gwa sé tyɛng, na yin a ra a yɛn pyɛ́ de ya jam yaga yɛn. Yin a tɔk, yin arɔng yin a vɔk Dalɔ e lagwi.

²Yin dopse ragas won jojot; ko jeng de yin e ra ano, bɛrɛng hin nekanang, na yin a to feng a Dagwi.

³Ko rá in won yaga wot arɔng, yaga na Dagwi a wunta a wot gwong na wot a bin shara há mɛ. Há mɛ mo ha sé e ra pyɛ de yà kana sè e lɛrɛ e ra Kristi, yemo de Dagwi a wunta a wot yɛ. Ko a sé yaga sharâ há mo de ma sé re ngyang a remo.

⁴Rá in won, na a sɛlɛ me, na me ha reha mɛ mo tɛɛrɛ, e gwong de gwa jam na me ra.

⁵Vɔk in netsitsɛng e gwong de yin e kyè na vemo de ba sé bemat-raa wɛt. Ko kayɛ jeng de yin e sɛ̀ gwông râ pyɛ ryat, rá in yɛ!

⁶Tik na neha min ne sè nerat kayɛ jeng, na ne to tɛ̀ bemat be wok nemwɛshɛ̂sh nɛ. Jāma hin na yin a sɛ̀ gwong de gwa sé rwat na yin a toyo a kawɛ mwat na pyɛ de a rangal hin yɛ.

⁷Gwà yey mot Tikikus a rɔda vey na a ha a yin pyɛ̂ mwa e ra me. Yɛ a sé ra fwom na yey mɛ mwa, ko a to sé sâ fwom mot e ji fwom de wot a sé ra a Darwey mot.

⁸Pyɛ de ya tɛ̀, ma sé tomo hɛ vey na yin ya sé ngan: Ma sé tomo hɛ, yaga na yin a bin tɔk yerê sangal mot, ko yaga na yɛ a gwɛ̌ a yin gap arɔng.

⁹Ma sé tomo hɛn, yɛn tanga Onesimus de a sé mwat min. Yɛ a sé gwa yey mot de e raa Kristi na yey mɛ mwa. Yɛn a rɔda ha a yin pyɛ̂ mwa de ye té e ngamo.

¹⁰Aristarkus de a sé e lɔ̂ ngyang tanga me e tang in show. Markus, gwa Barnabas e beda mɛn e tang in show arɔng. Ma kana jɛk a yin e ra yɛ. Jeng de a rɔda vey, séy in hɛ na yey pyɛng.

¹¹Yɛsu womo de be tang ɛ, à Yustus e tang in show arɔng. Yɛn betat vemo, e yɛn vɛ zɔng de ba sé BeYuda e ji bemat de ba wuna bato mɛn na me e de fwôm shara a bemat rehâ Segwɔm Dagwi. Yɛn a ga sɛlɛ me tyɔng wɛt.

¹²Ɛpafaras arɔng a sé tang in show. Yɛ a sé mwat min, ko a to sé sam Kristi Yɛsu. Kayɛ jeng yɛ a sé ra won yaga yin ding-ding; yɛ a sé ra a Dagwi won, na a tɛ̀, yin a tumal gak, na yin a sè bemat de ba ga vey naka gyat e kwɛngɛl min gwô raà Dagwi. A to sé ra won, na yin a tɔk pyɛ de Dagwi e simo yin a ra, na yin a gyeng há mɛ mwa arɔng.

¹³Me pyɛ hom me tɔk nɔng nuha, yɛ a pɛngɛ hɛ e de râ fwom yaga nerat min tanga yaga vemo de ba sé e Lawɔdikya tanga Hiyerapolis.

¹⁴Luka, de a sé vwoshon mot de wot a tɛ̀ yey na yɛ, tanga Dimas be tang in show.

¹⁵Tang în begwa mot bemat-raa e Lawɔdikya show; tang în Nimfa tanga bemat-raa de be manas e lɔ mɛ show arɔng.

¹⁶E bama de ba yɛnɛ basa a yin bwok-rwang gwomo, tomo hin a bemat-raa de ba sé e Lawɔdikya gwɛ, na be basa a yɛn gwɛ arɔng. Ko yin arɔng, basa hin bwok-rwang gwane de bemat-raa vê Lawɔdikya ba rɔda tomo a yin gwɛ.

¹⁷Ko tang în Arkipus, a ci na a yɛnɛ fwom de Darwey a nɔng ɛ na a ra.

¹⁸Me Bulus, ma sé jɛk hemo na vwɔ hom wɔgɔ, “Me tang in show.” Bàre hin na ngyang de ma sé re! Tik na Dagwi a dura a yin nerat mɛ.