Read berom 1 Tesalonika 1 Bible Online

1 Tesalonika 1 - berom bible

1 Tesalonika 1

¹Bwok-rwang gwomo yi e vɔ Bulus, na Silvanus, tanga Timotawus, Vɔk na bemât ekilisiya e Tesalonika, vemo de ba sé vê Dagwi Da tanga Darwey Yɛsu Kristi: Tik na Dagwi a dura a yin nerat mɛ, na a tɛ̀ yey min ye dyɛng.

²Kayɛ jeng de wot e ra won, wot e bare na yin, ko wot e feng a Dagwi yaga yin mwa jojot.

³E nuyêl Dagwi Da mot, wot e dopse bare na tomong min de yin a ra, yaga yin a sey tsak o na Yɛsu Kristi. Wot e to bare na fwom de yin a pɛngɛ hin e de râ gwɛ, yaga yin a tɛ̀ yey min na yɛ. Ko wot e bare na gwong de yin e sɛt yey min e ra Darwey Yɛsu Kristi, vit a tô yey.

⁴À begwa, wot a tɔk, Dagwi a tɛ̀ yey mɛ na yin, ko e yɛ de a ga kasa hin na yin a sè bemɛ.

⁵Yaga jeng de wot á shara a yin Yɛgɛt Yat, wot á ra ano na neha nu zɔng wɛt ko yi na reto tanga yi na Gabik Jɛrɛ arɔng, ko wot a tɔk tsɛng-tsɛng e ji neyey mot, Yɛgɛt Yat o ya sé tsak o. Yin á tɔk yerê sángal mot e jeng de wot á sè tanga yin. Wot á sǎ ano, yaga na yin a bin di yi e hɛ pyɛ de ya rɔda sɛlɛ hin.

⁶Yin á masa hot tanga Darwey arɔng. Mwa ano de yin á di reyɔm ding-ding, ko yin á sey reha mo na yey pyɛng de ye yi na Gabik Jɛrɛ.

⁷Yi ano, yin á tɛ́ in vemo de bemat-raà mwa e bavwêl Makedonya tanga Akaya be tɔk bɛrɛng bol min.

⁸A sé e yin de yin á tɛ̀ bemât Makedonya tanga vê Akaya ba wok reha e ra Darwey. Ko hane zɔng wɛt, ko bemât kahɛ kwɔn arɔng bá wok, yin a sey tsak o na Dagwi. Yaga ano, wot e to simo na wot a ha a bemat pyɛ cak e ra yɛ.

⁹Mwa bemat o be ha e ra gwong de yin á sey ot e jeng de wot á vey di in. Yɛn e ha arɔng e ra gwong de yin á hàla raà sekwit, yaga na yin a raa Dagwi, na yin a ra a yɛ fwom. E yɛ à Dagwi wo tsak o de a vɔk neken arɔng.

¹⁰Yɛn e to ha e ra gwong de yin a sé gyeng Hwey mɛ, na he vɛ̄ hɛ yi e lagwi, hɛ à Hwey mɛ Yɛsu. Dagwi á sene hɛ yi e reku, ko e hɛ de he ba sey ot yi e shôm Dagwi e jeng de e kyè vey na a ba ra a bemat shɔt.