Read berom 1 Tesalonika 2 Bible Online

1 Tesalonika 2 - berom bible

1 Tesalonika 2

¹À begwa, yin pyɛ min yin a tɔk, jeng de wot á vey na yin, véy o há sè yapyi wɛt.

²Yin a to tɔk, gyam na wot a vey na yin, wot á kana di reyɔm e repomô Filipi, ko bá ha há ves e ra wot arɔng. Ko Dagwi mot á nɔng ot yey ting, na wot a ha a yin Yɛgɛt Yat de ye yi na yɛ, mwa ano de bá ra repugu na wot tyɔng wɛt.

³Há de wot a sé shonong hin e ra hɛ ha yi e buru hak wɛt kɛ yi na báre hak de ha sé ligis, ko wot e ra ano na wot a bin kwɛlɛng mwat hwak arɔng wɛt.

⁴Wey, wot e ha pyɛ́ de Dagwi e simo wot a ha yɛ̄, yaga a di, wot a vey na a tik Yɛgɛt Yat mɛ e vɔ mot. A sé e bemat de wot e simo na wot a pɛngɛ a yɛn yey wɛt, ko a sé e Dagwi e negya. E yɛ de a tɔk báre mot mwa.

⁵Yin a tɔk, wot á sang dak a yin rwak-nu wɛt, kɛ wot á ha rehâ Dagwi, yaga na wot a sɛ̀ mɛ̀ pyɛ cak yi na yin arɔng wɛt. Dagwi a sé mwât nuha mot e ra pyɛ́ yemo.

⁶Wot á jāma na bemat be nɔng ot nerey wɛt, kɛ yin kɛ bemat behak gbak.

⁷E ji hâ mwin, wot á yâng tɔk jāma pyɛ́ detidetu yi na yin, yaga wot a sé betom Yɛsu Kristi. Ko mwa ano, wot á ra a yin pyɛ́ na nehywɛ sede neng de e gyeng nèy mɛ.

⁸A sé yaga wot á tɛ̀ yey na yin sizɔng de wot á simo na wot a ha a yin Yɛgɛt Yat yi na Dagwi. Ko e yɛ̄ zɔng wɛt, ko wot a to simo wot a nɔng in neken mot mwa e gùna mo, yaga wot á tɛ̀ yey na yin ding-ding!

⁹À begwa, ma tɔk, yin e bare na yerê fwom de wot á pɛngɛ hot e de râ gwɛ na gap mot mwa. Wot á ragas gwɛ nagwi na naturuk, yaga na wot a bin sè pyɛ negbang na hwak e ji min wɛt e jeng de wot á shara a yin Yɛgɛt Yat yi na Dagwi.

¹⁰Yin e tɔk nɔng nuha e ra negwɔn mot, ko Dagwi e tɔk nɔng nuha arɔng: Negwɔn mot e tē min ná sè nerat, ko ná sè tyɛng arɔng; vit a pyɛ cak vyes de bemat bá tɔk ha e ra wot. Nemo ná sè negwɔn mot vɔk na yin de yin a sey tsak o na Yɛsu Kristi.

¹¹Ko yin a tɔk, wot á tē na kawɛ e ji min tyɛng na gwong de da e teshe na nèy mɛ.

¹²Wot á gwɛsɛ a yin gap, ko wot á to wɔrɔk hin. Wot á dopse shonong e ra yin, na yin a sangal e gwong de gwa jam a Dagwi. E yɛ de e yila hin na yin a vey yel e segwɔm mɛ, na yin a wuna hin na yɛ e de sɛ̂ gbɔng nerat mɛ arɔng.

¹³Ko pyɛ cak ya sɛ́ arɔng yemo de wot e dopse feng a Dagwi yaga yɛ. Ya sé ngan: Jeng de wot á ha a yin rehâ Dagwi, yin á wok rɛ. Yin á sey rɛ sede rehâ mwasi zɔng wɛt, ko sede reha de ra yi na Dagwi — ko ra sé rehâ Dagwi mwin. A sé e rɛ de re ra fwom e neyey min de yin a sey tsak o.

¹⁴À begwa, pyɛ jining yá té na yin na yemo de yá té na bemat-raa e be-ekilisiyâ Dagwi de ba sé e sevwêl Yudiya, vemo de ba sé vê Kristi Yɛsu. Yin á sɔ reyɔm yerê mɛ́n yi na bemât sevwel min, sede remo de yɛn á sɔ yi na BeYuda.

¹⁵E BeYuda mo de bá kana mɔrɔ Darwey Yɛsu tanga bezarap mɛ, ko yɛn á ro ot e jey arɔng. Yɛn e pɛngɛ a Dagwi yey wɛt, ko yɛn a to sé vê repugû bemât mwa!

¹⁶Yɛn e simo be dul ot nà ha a vemo de ba sé BeYuda wɛt rehâ gwong de ba rɔda tɔk sey neken mɛn. Hemo ha sé hê yɛnɛ mo de ha sila nepyak banɛn de yɛn a dopse ra. Ko shôm Dagwi ya ga pom e ra yɛn e yɛnɛ mo!

¹⁷À begwa, wot á ros na gas ot na yin yaga kejeng tyɔng. Ko mwa ano de wot á tɔk bɛrɛng hin na bayis wɛt, wot á bare na yin jojot. Ko cwey dî bayis min ya ga kaba hot tyɔng wɛt; yaga ano, wot á tē ngyɛ́k sizɔng na wot a to vey di in.

¹⁸Wot á simo na wot a toyo vey na yin. Me, Bulus, ma ga simo véy o ha dal zang hining, ko Shetan á dul gwong o.

¹⁹A sé e yin de yin e tɛ̀sɛ hot na wot a sɛt yey mot e ra vêy Yɛsu Kristi, ko yin e tɛ̀sɛ hot, na wot a vɔk yey pyɛng arɔng. E yin vɛ de yin e tɛ̀ ot na wot a tɔk ra kaa e nuyêl Darwey mot Yɛsu e ra pyɛ́ de wot á ra naka, e jeng de e ba vɛ̄ hɛ. Vit a bemat behak de ba dal in na ra ano.

²⁰Ey, a sé e yin vɛ de yin e tɛ̀ ot, na wot a tɔk ra kaa e ra yin, na wot a to vɔk yey pyɛng arɔng!