Read berom 1 Tesalonika 3 Bible Online

1 Tesalonika 3 - berom bible

1 Tesalonika 3

¹E yɛnɛ mo, jeng de wot á tɔk niri wɛt, wot á yong ɛ̀, wot a rɔda nàra nju mot e Atena,

²ko wot á tomo na gwa mot Timotawus vey na yin. Yɛ a sé ra a Dagwi fwom tanga wot e de sharâ Yɛgɛt Yat e ra Kristi. Wot á tomo hɛ, yaga na a ba gwɛ̌ a yin gap, na a tɛ̀, yin a tumal gak e ji gwông raa.

³Wot á simo a ra ano, yaga na reyɔm remo detidetu re tɛ̀ hwak e ji min a hàla gwong o wɛt. Yin pyɛ min, yin a tɔk, reyɔm ra sé pyɛ de Dagwi, yimo gyam, a simo na ye té na wot.

⁴Jeng de wot á kana sè na yin, wot á ha a yin gyam wɔgɔ, ba rɔda tak a wot reyɔm. Ko yin a tɔk, há hane ha ga sila tyɛng ano.

⁵Pyɛ ma yane de yá tɛ̀, ma tomo Timotawus vey na yin, yaga ma to tɔk niri na sangal sana tɔk pyɛ de ya sé té wɛt. Ma simo na me tɔk gwong de yin e re nuyel e ra gwông raa. Ma sap kɛ Shetan, mwât setɔgɔs, a ga kwɛlɛng hin, na a tɛ̀ fwom de wot á pɛngɛ hot e de râ gwɛ gwo tɛ́ ɛ yapyi.

⁶Ko Timotawus a sé vɛ̄ hɛ mwas zɔng, ko a ga vey na há rat wɔgɔ, yin e rɔɔ re nuyel na sêy tsak o na Dagwi, ko yin e tɛ̀ yey na bemin arɔng. Yɛ a ga ha a wot wɔgɔ, kayɛ jeng de yin e bare na wot, yin e vɔk yey pyɛng; ko yin e vɔk cwey di ot, sede remo de wot e vɔk cwey di in arɔng.

⁷À begwa, reha e ra gwong de yin e re nuyel e ra gwông raa ra ga gwɛ̌ a wot gap, mwa ano de wot a vɔk negbang pyak, ko ba sé tak a wot reyɔm sizɔng.

⁸A remo, wot a wok netâ sangal mot, ka sede yin e tumal gak e ji sangâl nesa min na Darwey.

⁹Feng mot ha radɛ, na wot a feng a Dagwi mot yaga yin tanga yaga yey pyɛng de wot a vɔk e nuyel mɛ yaga yin!

¹⁰Nagwi na naturuk, wot e ra won na yey mot mwa, yaga na wot a bin di bayis min, na wot a to nɔng in pyɛ́ cak de yin a bidɛ e gwông raa min.

¹¹Wot a sé ra won, yaga na Dagwi Da mot pyɛ mɛ tanga Darwey mot Yɛsu be yong gwong na wot a vey na yin.

¹²Wot a sé ra won, yaga na Darwey a tɛ̀ in, na yin a gwɛsɛ tɛ̂ yey na bemin tanga na bwang bemât mwa, na he sila byɛf. Tik na a sɛlɛ hin ano, yaga na yin a tɛ̀ yey na behak, tyɛng sede remo de wot a tɛ̀ yey na yin.

¹³E gwong gwomo, a rɔda nɔ̂ng neyey min gap. Vit a mwat de a rɔda tɔk sɛ̀ buru hak na yin, ko yin ê sè vê Dagwi e ji kayɛ pyɛ. Tik na yin a sè ano e nuyêl Dagwi Da mot jeng de Darwey mot Yɛsu e ba vɛ̄ hɛ tanga mwa vemo de ba sé bemɛ.