Read berom 1 Tesalonika 4 Bible Online

1 Tesalonika 4 - berom bible

1 Tesalonika 4

¹E yɛnɛ mo, à begwa, yin á kana masa yi na wot yerê sángal de he pɛngɛ a Dagwi yey. Ko mwin, yin a sé sangal ano. A remo, wot e ra won na yin, ko wot e to shonong e ra yin e ji rezâ Darwey Yɛsu, na yin a gwɛ̌ re nuyel na ra ano.

²Yin a tɔk pyɛ́ de wot á nɔng in nu e ra yɛ̄ yi e retô Darwey Yɛsu.

³Dagwi e simo na sángal min he sè jɛrɛ; ko pyɛ min cak ye sè na râ nejwang wɛt.

⁴Yɛ e simo na kawɛ e ji min a masa na a vɔk rebek mɛ naka e gwong de gwa jam a Dagwi mwa na bemat arɔng.

⁵Yin kwon vɔk cwey ra pyɛ́ vyes sede bemat beduk de ba tɔk Dagwi wɛt.

⁶Mwat hwak a ra a gwa mɛ pyɛ vyes, kɛ a mɔt ɛ e ji pyɛ́ yemo wɛt. Wot á kana ha a yin pyɛ́ yemo raane, ko wot á to tusa hin ding-ding wɔgɔ, Darwey a rɔda tabak vemo de be ra ano.

⁷Yaga Dagwi a yila hot, na wot a ra pyɛ́ de ya sé ligis wɛt, ko na negwɔn mot ne sè jɛrɛ.

⁸Yaga ano, kawɛ mwat de e kyɛ́ ɛ bása hemo a sé kyɛ́ ɛ mwasi wɛt, ko a sé kyɛ́ ɛ Dagwi, yɛ de e nɔngɔs hin Gabik Jɛrɛ mɛ.

⁹E rà rehâ tɛ̂ yey na begwa mot bemat-raa — wot a vɔk pyɛ cak de wot e to gwɛ̌ jɛk a yin wɛt. Dagwi pyɛ mɛ a ga basa a yin, yin a tɛ̀ yey na bemin.

¹⁰E ji hâ mwin, yin e tɛ̀ yey na begwa min mwa de ba sé e kahɛ kwɔn e sevwêl Makedonya. Ko wot e shonong e ra yin, à begwa, na yin a gwɛ̌ re nuyel na ra ano.

¹¹Yē in ngyɛ́k na yin a sǎ yaang, na yin a tɛ̀ nehywɛ min e ra fwom min, ko yin kwon bɛrɛng á behak na be nɔng in pyɛ de yin e simo, tyɛng sede remo de wot á kana ha a yin.

¹²Ka sede yin e ra ano, ko vemo de ba sé bemat-raa wɛt ba rɔda nɔng in nerey. Ano arɔng, yin a rɔda ye yɛndɛng e ra mwat hwak wɛt, na a nɔng in pyɛ de yin e simo.

¹³À begwa, wot e simo na yin a sè e ji dunus wɛt e ra pyɛ́ de yê té na bemat de ba ga kushu. Wot e simo na yin a tɔk ano, yaga na yin a kwon lashe yey min wɛt, sede bemat de be sɛt yey mɛn e ra sensa yi e reku wɛt.

¹⁴Wot a sey tsak o, Yɛsu a ku, ko a to sene na neken. A rɔda sè ano arɔng na vemo de bá kana tɛ̀ gap mɛn e ra yɛ jeng de yɛn a kushu. Dagwi a rɔda tɛ̀ ɛn, be ba vey tanga Yɛsu vɔk na yɛ.

¹⁵A remo, wot a sé ha a yin pyɛ cak de Darwey pyɛ mɛ a ha wɔgɔ: Wot vemo de wot e ba rɔngɔl beken e jeng de Darwey a rɔda ba toyo, wot a rɔda ba sey ɛ̀ nuyêl vemo de ba ga kana kushu wɛt.

¹⁶Dagwi ê ba mokla, gbɔng tom-lagwi ê ba hanat, ko bemat bê ba wok fwɔ̂ durûm Dagwi. E jeng o, Darwey pyɛ mɛ ê ba gyirik yi e lagwi, ko mwa vemo de bá kana tɛ̀ gap mɛn e ra Kristi e jeng de yɛn á kushu bê ba tānga sene na neken.

¹⁷E bama mo, Dagwi a rɔda ba tula hot de wot a rɔngɔl beken tanga yɛn e ji bale, na wot a man na Darwey e larwak. Ko ano de wot a rɔda sè tanga Darwey nesheneshey.

¹⁸Yaga ano, gwɛ̌ hin a bemin gap na neha nemo.