Read berom 1 Tesalonika 5 Bible Online

1 Tesalonika 5 - berom bible

1 Tesalonika 5

¹À begwa, pyɛ cak ya sɛ́ wɛt de yê tɛ̀, wot a jɛk a yin e ra jeng tanga tuk de pyɛ́ yemo ya rɔda ba té.

²Yaga yin pyɛ min, yin a tɔk tsɛng-tsɛng, Darwey e ba vey sana tɔ̂k bemat sede gbik de e vey naturuk.

³Jeng de bemat bê sè tē, “Kayɛ pyɛ ya sé yaang, ko ya sé gyat”, ko gòbok, gawey hê hwo e ra yɛn! Hā rɔda hwo sede rûs tɔ́ de ha kaba hwā de e kyè wɔ̀ tɔ hwey. Vit a mwat de a rɔda hywit ɛ.

⁴Ko di in, à begwa, yin a sé sangal e ji lwīl wɛt. Yaga ano, ba rɔda ba vo in pút wɛt e jeng de Darwey e ba vey, sede remo de gbik e vo bemat pút.

⁵Mwa hin, yin a sé vê negbey, yin a to sé vê nagwi. Pyɛ mot cak ya sé na naturuk kɛ na lwīl wɛt.

⁶Yaga ano, wot a sè e de nevwa sede bwang bemat wɛt; ko tik na wot a sè ywey, na wot a yɛklɛ hot.

⁷Yaga vemo de be kyese nevwa be kyese nɛ naturuk, ko vemo de be feng siring be feng wɛ naturuk arɔng.

⁸Ko wot à, sede remo de wot a sé vê nagwi, tik na wot a yɛklɛ hot. Tik na wot a re nuyel na sêy tsak o na Dagwi, na wot a to tɛ̀ yey mot na bemat arɔng. Ka sede wot a ra ano, ko a sé sede wot a tɛ̀ bepamâ dyam, na wot a bang mɛ̀ beragey mot. Tik na wot a to sɛt yey mot e ra Dagwi de a rɔda sey neken mot. Ka sede wot a ra ano, ko a sé sede wot a tɛ̀ bong dyam, na wot a dul mɛ̀ bato mot.

⁹Yaga Dagwi a ga kana yong ɛ̀ na wot a sɔ reyɔm na shom mɛ wɛt, ko yaga na wot a sey neken yi na Darwey mot Yɛsu Kristi.

¹⁰Yɛ a ku, yaga na a sɛlɛ hot, yaga na wot a bin sangal tanga yɛ jeng de a rɔda ba toyo, kɛ wot a sé beken kɛ bavin o ayi.

¹¹Yaga ano, gwɛ̌ hin a bemin gap, na yin a to sɛlɛ bemin naka, sede remo de yin a sé ra a remo.

¹²À begwa, wot e ra won na yin, na yin a nɔ̂ng vemo de be pɛngɛ hɛn e de râ fwom e tē min nerey. E yɛn de Darwey a tɛ̀ na be sè bemât nuyel min, na be to basa a yin pyɛ́ de ya sé tyɛng.

¹³Nɔng in hɛn nerey de na dal mwa, na yin a tɛ̀ yey min na yɛn yaga fwom de be ra yaga yin. Sangal hin tyang na bemin.

¹⁴À begwa, wot e shonong e ra yin wɔgɔ, tusa hin beriri; gwɛ̌ hin a vemo de ba vɔk bengyip gap; sɛlɛ hin vemo de ba vɔk gâp rebek wɛt; niri hin na kawɛ mwat.

¹⁵Di in, mwat hwak a talâ mumwɛ pyɛ vyes na neves wɛt; ko yē in ngyɛ́k kayɛ jeng na yin a ra a bemín tanga kawɛ mwat arɔng pyɛ́ ryat.

¹⁶Vɔk in yey pyɛng jojot;

¹⁷yin tik râ won wɛt;

¹⁸feng in a Dagwi e ji kayɛ pyɛ de ya sɛ̀ in. Pyɛ ma yane de Dagwi e simo na yin a ra, yin de yin a sé sangal e ji nesa na Yɛsu Kristi.

¹⁹Yin dul fwôm Gabik Jɛrɛ wɛt;

²⁰yin kwon byɛs neha vemo de be tē, yɛn e zarap yi na Dagwi.

²¹Masa hin kayɛ pyɛ, ko vɔk in yēmo de ya sé ryat e ji yɛ̄.

²²Kyɛ́ in nà ra kayɛ pyɛ de ya sé vyes.

²³Tik na Dagwi, de e tɛ̀sɛ neyey bemat ne dyɛng, a tɛ̀ in na yin a sè jɛrɛ e kagwɛ gwong. Tik na a to gyeng in sana buru, yin mwa burang: E gabik min, na e yey min, na e rebek min, vɔk e jeng de Darwey mot Yɛsu Kristi e ba vɛ̄ hɛ.

²⁴Yɛ de a yila hin a rɔda ra ano, yaga yɛ e ra pyɛ́ de a ha.

²⁵À begwa, rá in won yaga wot arɔng.

²⁶Tang în mwa begwa show e gwong de gwa dura tɛ̂ yey min.

²⁷Ma sé nɔng in nu e ji rezâ Darwey wɔgɔ, bē basa a mwa begwa bwok-rwang gwomo.

²⁸Tik na Darwey mot Yɛsu Kristi a dura a yin nerat mɛ.