Read berom Yɔshuwa 1 Bible Online

Yɔshuwa 1 - berom bible

Yɔshuwa 1

¹Mose, mwât fwôm Dagwi Darwey a ga ku. Ko Dagwi Darwey a yâng Yɔshuwa Nun, mwât sɛlɛ̂ Mose, a ye,

²“Mwât fwom hom Mose a ga ku. A remo, yong o, hwo tanga mwa BeIsrayɛl, na yin ye dɔ a Rɔt Yɔrdan, vɔk e ji sevwel de ma sé nɔng in.

³Sede remo de ma kana ha a Mose, ma ga nɔng in kahɛ kwɔn de bol min ba bɔ́rɔ.

⁴Yɛnɛ̂ vwel min ha rɔda sè yi e hey e rwa batin vɔk e berakû Lɛbanɔn e rwa bato; yi e Gwɔrɔt Ɛifaratɛs e rwa rak pere wɔ e vwêl BeHiti vɔk e Gworep Tē e rwa ta.

⁵Vit a mwat de ê kyɛm a ra retek na hwo mwa jeng de hwà rɔngɔl kwen. Ma rɔda sè tanga hwo, sede remo de má gā sè tanga Mose. Ma rɔda hàla hwo nju mō kɛ mê ye waa à hwo wɛt.

⁶“Sǎ gak, ko hwo vɔk yey ting, yaga e hwo de hwà rɔda kyè e nuyêl bemat vemo, na be re sevwel semo de ma kana sira a beda mɛn, mê nɔng ɛn sɛ.

⁷Ko tik na hwo sǎ gak, na hwo vɔk yey ting sizɔng! Gyeng mwa badu hom de mwât fwom hom Mose á kana nɔng o nu e ra vɛ. Hwo ye rɛng a vɛ wɛt, na hwo bin di wɛng e kahɛ kwɔn de hwà rɔda wɔ ɛ.

⁸Hwo gas o na bwok-basa Badu gwomo wɛt, ko hwà rɔda basa a bemat gwɛ, hwo tɔrɔng e ra gwɛ nagwi na naturuk, yaga na hwo gyeng kayɛ pyɛ de ba jɛk e ji mo. Ano kwong, hwà rɔda vɔk nerat e ji kayɛ pyɛ de hwô ra, ko hwà rɔda di wɛng.

⁹Ma to sé ha a hwo, sǎ gak, ko hwo vɔk yey ting! Hwo ye lot kɛ hwo ye waa wɛt, yaga me, Dagwi Darwey, Dagwi mō, ma sé tanga hwo kahɛ kwɔn de hwô kyè vɔk ɛ!”

¹⁰Ano kwong, Yɔshuwa a nɔ̂ng bemât nuyel nu wɔgɔ,

¹¹yɛn a gwɔrɔ e ji kwɔ̂n ye ngyɔk, na be nɔ̂ng bemat nu, be yang ɛn, “Yong in pyɛ̂ re, yaga e tuk hê tat, wot a rɔda ye dɔ a Rɔt Yɔrdan, na wot yel, na wot re vwel de Dagwi Darwey, Dagwi mot, a sé nɔng ot hɛ.”

¹²Yɔshuwa kwong a yâng yerê Rubɛn, na ye Gat, tanga rebit yerê Manase,

¹³“Bare hin na ha de Mose, mwât fwôm Dagwi Darwey, a kana ha a yin wɔgɔ, Dagwi Darwey, Dagwi min, ê nɔng in vwel hemo e ngamo e rwa rak Yɔrdan, na he sè he min. Tik in beha na nèy min tanga yas min ye sangal e ngamo e gurâ Yɔrdan gwomo. Ko mwa bemât como min ba rɔda ye dɔ na pyɛ̂ como mɛn e yêl bwâng begwa min yére Israyɛl. Ko yin a rɔda sɛlɛ hɛn,

¹⁵sɛ̌ yɛn a vo mɛn a vwel o e rwa tâ Yɔrdan hemo de Dagwi Darwey, Dagwi min, a nɔng ɛn. Jeng de a ga nɔ̂ng BeIsrayɛl mwa pɔngɔ, ko yin ê de toyo hin vey sangal e vwel min e rwa rak na Yɔrdan, hemo de Mose, mwât fwôm Dagwi Darwey, a kana nɔng in.”

¹⁶Yɛn a simo a Yɔshuwa, ba ye, “Wot ê ra kayɛ pyɛ de hwà ha a wot, ko wot ê wɔ e kahɛ kwɔn de hwà tomo hot ɛ.

¹⁷Wot ê raa ha mō tyɛng sede remo de wot á kana raa hâ Mose. Ko tik na Dagwi Darwey, Dagwi mō, a sè tanga hwo sede remo de á kana sè tanga Mose!

¹⁸Kawɛ de a kyɛ́ ɛ wôk ha mō, na a kyɛ́ ɛ nà raa kahɛ nu de hwà nɔng ɛ, ko ba rɔda mɔrɔ hɛ. Tik na hwo sǎ gak, na hwo vɔk yey ting à hwo!”