Read berom Yɔshuwa 10 Bible Online

Yɔshuwa 10 - berom bible

Yɔshuwa 10

¹E jeng yane Adoni-Zɛdɛk á sè gwɔ̀m Yɛrusalɛm. A wok, Yɔshuwa a ga re Ai, a wey na bemat o hywiri, ko a mɔrɔ gwɔ̀m mɛn, tyɛng sede remo de à wey na repomô Yeriko mwa na gwɔ̀m rɛ. Ko a to wok, bemât Gibɛyɔn ba ga wuna nesa na BeIsrayɛl, ko ba simo a yɛn, be sangal e vwɔ mɛn.

²Bemât Yɛrusalɛm ba vo bengyip sizɔng. Yaga repomô Gibɛyɔn ra sé gbɔng o sede hak e ji bapomô begbɔng begwɔ̀m, mwin, ra dal Ai na nerey, ko mwa berâs Gibɛyɔn o ba sé besugâ como.

³Yaga ano, Adoni-Zɛdɛk a tomo na ha hemo vɔk na gwɔ̀m Hɛbrɔn, Hoham, na gwɔ̀m Yarmut, Piram, na gwɔ̀m Lakish, Yafiya, tanga gwɔ̀m Ɛglɔn, Debir arɔng, a ye,

⁴“Vey in, na yin sɛlɛ me, na wot tó como na BeGibɛyɔn, yaga yɛn a ga wuna nesa na Yɔshuwa na BeIsrayɛl.”

⁵Ano kwong, begwɔ̀m BeAmɔr vane betungun, ba wuna bemât como mɛn mwa, ba wɔ̀ rɔnɔ mɛ repomô Gibɛyɔn, ko ba hwo e ra rɛ na como.

⁶BeGibɛyɔn kwong ba hwo tomo a Yɔshuwa e kwɔ̂n ye ngyɔk e Gilgal, ba ye, “À da, begwɔ̀m BeAmɔr mwa ba ga wuna hɛn yi e bapomô berahwol e ra wot. Vey ziri, na hwo ba sey ot! Hwo ye waa à wot wɛt!”

⁷Yɔshuwa kwong a sogo yi e Gilgal na bekàan tô como mwa tanga mwa bemât como mɛ arɔng.

⁸Ko Dagwi Darwey a yang ɛ, “Hwo vo bengyip wɛt, yaga ma ga nára hɛn e ji vwɔ mō. Vit a hwak e ji mɛn de ê kyɛm, a ra retek na hwo.”

⁹Yɔshuwa tanga bemât como mɛ ba kyè e ji turuk, ba wɔ̀ hwo e ra yɛn gobok sana tɔk.

¹⁰Ko Dagwi Darwey a tɛ̀ a yɛn bengyip, yɛn a kyě tele kpɛɛ ba waram hɛn e nuyêl BeIsrayɛl. Yɔshuwa kwong na bemât como mɛ ba re ɛn na como e Gibɛyɔn, ko ba ró ɛn, ba mɔbɔs hɛn, ba raa hɛn wɔ tut e raku e bak Bet-Hɔrɔn, ba raa hɛn pere wɔ e Azeka na Makeda.

¹¹Jeng de BeAmɔr o bá sé tele wɔ̀ gyirik yi e Bet-Hɔrɔn, ko Dagwi Darwey a vɛ̌ tɛ̀ rwak wa hwo rop na bècung fwala pere vɔk e Azeka, ko sefwala mo sa mɔbɔs hɛn tyɔng wɛt. Bemat de bècung fwala mo ba mɔbɔs ba dal vemo de bemât comô Israyɛl ba wey mɛ na pyɛ̂ como mɛn na nepyak.

¹²Tuk hane, jeng de Dagwi Darwey a nɔ́ng BeAmɔr e vwɔ̂ BeIsrayɛl, ko Yɔshuwa a ha na Dagwi Darwey, a ye, e nuyel BeIsrayɛl: “À hwo gwi, tumal ting e ra Gibɛyɔn, à hwo pwɛl, tumal e nɛk Ayalɔn!”

¹³Ko sede remo de ba jɛk e ji Bwok-basâ Yashar, gwi gwa tumal ting, pwɛl arɔng gwa ka kyè wɛt, sɛ̌ BeIsrayɛl ba tala vê repugu mɛn pyow. Ko gwi gwa tumal ting e tê lagwi, gwa gaba ziri wɛt sede wosho hining.

¹⁴Ba ga sang di tuhak yerê hane gyam jeng o kɛ yimo jeng o de Dagwi Darwey a wok hâ mwasi e gwong yere gwane wɛt. A ra ano, yaga a to como yaga BeIsrayɛl.

¹⁵E bamâ wɛng hane, Yɔshuwa tanga mwa BeIsrayɛl ba to ɛn e kwɔ̂n ye ngyɔk mɛn e Gilgal.

¹⁶Ko begwɔ̀m BeAmɔr vane betungun ba tele, ba wɔ̀ lɛrɛ hɛn e fwara e Makeda.

¹⁷Bemat ba wɔ̀ sɛ̀ ɛn, ko ba wɔ̀ ha a Yɔshuwa.

¹⁸Ko Yɔshuwa a ye, “Bíring hin bègbɔng beta, na yin dul mɛ rwi fwara mo, ko tɛ̀ in bemat, be wɔ̀ bɛɛ nekanang e kwɔn o.

¹⁹Ko yin bwang o, yin tumal e hwomo wɛt! Re in nuyel e de rô bemât repugu min, hwo in hɛn yi e bama, ko dul in hɛn, yɛn a kwon yel e bapomo mɛn wɛt, yaga Dagwi Darwey, Dagwi min, a ga nára hɛn e vɔ min.”

²⁰Yɔshuwa tanga BeIsrayɛl ba ga yɛnɛ wey na bwarwey bemat, ba tala na yɛn mwa sɛ̌ bemat tyɔng zɔng de ba tele, ba wɔ̀ dalas e bapomo de ba gwɔrɔ vɛ na jwâ-pomo.

²¹Mwa bemât comô Yɔshuwa ba toyo vɔk na yɛ e kwarâ como e Makeda tyang, ko vit a mwat de a tɔk ha ha ves e ra BeIsrayɛl.

²²Ano kwong, Yɔshuwa a nɔng nu, be wunta nû fwara mo, na be nusu a yɛ na begwɔ̀m vane betungun.

²³Yɛn a ra ano, ko yɛn a nusu na begwɔ̀m vane betungun yi e fwara mo, yɛn à gwɔ̀m Yɛrusalɛm, na wo Hɛbrɔn, na wo Yarmut, na wo Lakish tanga wo Ɛglɔn.

²⁴Jeng de ba ga vey na vɛ na Yɔshuwa, ko Yɔshuwa a yishi BeIsrayɛl mwa vey na yɛ, yɛn a vey, ko a yâng begbɔng bemât como de bá ga sè tanga yɛ, “Vey in bagat, na yin bɔrɔs tɔ̀ begwɔ̀m vemo mo.” Yɛn a vey bagat, ko ba ra ano.

²⁵Yɔshuwa kwong a yang begbɔng o vê como mɛ, “Yin tɛ̀ bengyip, kɛ a sè a yin zii wɛt! Vɔk in yey ting, na yin sǎ gak, yaga a sé ano de Dagwi Darwey a rɔda ra a bemât repugu min mwa de yin a rɔda tó como na yɛn.”

²⁶Ko a mɔbɔs begwɔ̀m o, a ló bavin o e ra sesêk cɔ́gɔt tungun, ko ba wosho e hwomo vɔk e nahywegelek.

²⁷Jeng de gwi gwa sé kyè wɔ̀ yél ɛ, Yɔshuwa a nɔng nu, be gyirik bavîn begwɔ̀m o yi e ra cɔ́gɔt o, ko ba wɔ̀ bomos vɛ e fwara de yɛn a kana lɛrɛ hɛn ɛ. Ba bang nû fwara mo na bègbɔng beta, ko bà sé ɛ̀ e hwomo vey e yunung.

²⁸E tuk hane mo, Yɔshuwa a vo Makeda, ko a re rɛ na como. A wey na bemat o mwa na gwɔ̀m mɛn hywiri, ko a ka tɛt ɛ̀ mwat gwining de a hywit ɛ na neken wɛt. A teshe na gwɔ̀m Makeda sede remo de a teshe na gwɔ̀m Yeriko.

²⁹Yi e Makeda, Yɔshuwa tanga mwa bemât como mɛ ba kwey vɔk e Libna, ko ba hwo e ra repomo mo.

³⁰Dagwi Darwey kwong a nára repomo mo tanga gwɔ̀m rɛ e ji vɔ BeIsrayɛl, yɛn a mɔbɔs hɛn na bewal, ko ba ka tɛt ɛ mwat gwining de a hywit ɛ na neken wɛt. Yɔshuwa a teshe na gwɔ̀m o, sede remo de a teshe na wo Yeriko.

³¹Yi e Libna, Yɔshuwa tanga bemât como mɛ ba kwey vɔk e Lakish. Yɛn a gwɔrɔ repomo mo, ko yɛn a hwo e ra rɛ.

³²Nusû hwol, Dagwi Darwey a to nára repomô Lakish o e ji vɔ BeIsrayɛl. Yɛn a re rɛ, ko yɛn a mɔbɔs bemat o, tyɛng na pyɛ de ba ra a Libna.

³³Gwɔ̀m Horam wo Gɛzɛr a vey tanga bemât como mɛ, na be ba sɛlɛ Lakish. Ko Yɔshuwa a re ɛ na como, yɛ tanga bemat mɛ, a mɔbɔs hɛn mwa, a ka tɛt ɛ mwat gwining de a hywit ɛ na neken wɛt.

³⁴Yi e Lakish, Yɔshuwa tanga bemât como mɛ ba kwey vɔk e Ɛglɔn, yɛn a gwɔrɔ rɛ, ko ba hwo e ra rɛ na como.

³⁵Yɛn a to re rɛ e tuk hane mo, ko yɛn a wey na bemat o hywiri, sede remo de ba ra e Lakish.

³⁶Yi e Ɛglɔn, Yɔshuwa tanga bemât como mɛ ba kwey, ba tút vɔk e Hɛbrɔn, ko yɛn a wɔ̀ hwo e ra rɛ.

³⁷Yɛn a re repomo mo, mwa na gwɔ̀m mɛn tanga nebapomo mɛn, na mwa bemat de ba sé e ji mo, ba mɔbɔs vɛ. A tik mwat hwak a hywit ɛ wɛt, a wey na rɛ na mwa bemat de ba sé e ji rɛ hywiri, tyɛng sede remo de a ra a Ɛglɔn.

³⁸Yɔshuwa tanga bemât como mɛ ba to doyo vɔk e repomô Debir, ko ba hwo e ra rɛ.

³⁹Ba re rɛ mwa na nebapomo mɛn tanga gwɔ̀m o arɔng. Ba wey na bemat de ba sé e ji rɛ mwa hywiri. Ba ka tɛt ɛ mwat gwining de a hywit ɛ na neken wɛt. Tyɛng sede remo de Yɔshuwa a ra a Hɛbrɔn, kɛ sede remo de a ra a Libna tanga gwɔ̀m mɛ, ano arɔng de a to ra a Debir tanga gwɔ̀m mɛ.

⁴⁰Yɔshuwa a re vwel o mwa, hɛ a vwêl beraku na bak hêy gbingiring e rwa batin, na bak vwêl beraku e rwa ta, tanga sɛndɛng beraku e rwa rak. A re begwɔ̀m mɛn o mwa, a mɔbɔs kayɛ pyɛ mwa pyɛt, a tik mwat hwak a hywit ɛ wɛt. Pyɛ ma yemo de Dagwi Darwey, Dagwî BeIsrayɛl, a kana nɔng nu.

⁴¹Yɔshuwa a re bavwel o yi e Kadɛsh-Barneya e bak batin vɔk e Gaza bagat na rekwogom gworep, na mwa bak vwêl Gɔshɛn[5] wɔ̀ tut e rwa batô Gibɛyɔn.

⁴²Mwa begwɔ̀m vane na bavwel mɛn, Yɔshuwa a re vɛ e nusu hining hane zɔng, yaga Dagwi Darwey, Dagwî BeIsrayɛl, a tó como yaga yɛn.

⁴³E yɛnɛ mo, Yɔshuwa tanga mwa bemât como mɛ ba toyo vɔk e kwɔ̂n ye ngyɔk mɛn e Gilgal.