Read berom Yɔshuwa 11 Bible Online

Yɔshuwa 11 - berom bible

Yɔshuwa 11

¹Rehâ wɛ̂ng BeIsrayɛl ra wɔ̀ wul na Yabin, gwɔ̀m Hazor, yɛ kwong a hwo tomo a begwɔ̀m vwara mɛ, yɛ gwɔ̀m Madɔn, Yowap, na gwɔ̀m Shimrɔn, na gwɔ̀m Akshaf,

²tanga bwâng begwɔ̀m de ba sé sangal e rwa bato e vwêl beraku, na vinde ba sé e nɛk Rɔt Yɔrdan e bak batin wo Gworep Galili, na e bak vwel berahwol, na e bak tyɛl e lyoshô Gworep bagat na Dor e rwa ta.

³A to tomo a begwɔ̀m BeKanaan de ba sé e rwa rak na rwa ta wo vwêl beraku, tanga begwɔ̀m BeAmɔr, na BeHiti, na BePɛrizi tanga BeYebus de ba sé e ji bapomô beraku, tanga BeHivi de ba sangal e nɛ̂n Raku Hɛrmɔn e bak vwêl Mizpa.

⁴Begwɔ̀m vane mo mwa ba nusu na mwa bemât como mɛn, yɛn a sé pyak sizɔng sede bazɛk de ba sé e nû gworep.

⁵Ba nusu, ba wuna bemât como mɛn, ba wɔ̀ tɛ̀ regyɛng mɛn e bak rɔt Mɛrɔm, yaga na be tó mɛ̀ como na BeIsrayɛl.

⁶Ko Dagwi Darwey a yâng Yɔshuwa, “Hwo wok bengyip mɛn wɛt. Nahwol jeng ano, me, Dagwi Darwey ma rɔda tɛ̀, yin mɔbɔs hɛn mwa. Tow in berinîs bol bedwa mɛn o, ko yin to rangas bekyɛkyɛ̂ bedwa mo mwa arɔng.”

⁷Ano kwong, Yɔshuwa tanga bemât como mɛ mwa ba wɔ̀ hwo e ra yɛn pút e bak rɔt Mɛrɔm

⁸Ko Dagwi Darwey a nára hɛn e vɔ BeIsrayɛl, yɛn a re ɛn, ko ba ro ɛn yi e hwomo vɔk e Misrefot-Mayim, pere vɔk e gbɔng repomô Sidɔn e rwa rak. Ba wey na yɛn mwa, ko ba tik mwat gwining a hywit ɛ wɛt.

⁹Yɔshuwa kwong a teshe na yɛn tyɛng na redu de Dagwi Darwey a nɔng ɛ, a tow berinîs bol bedwa mɛn, ko a to rangas bekyɛkyɛ̂ bedwa mɛn mwa.

¹⁰Yɔshuwa kwong a to doyo, a re repomô Hazor. E jeng yane, Hazor ra sè gbɔng repomo e ra mwa bapomô begwɔ̀m rwa bato. A mɔrɔ gwɔ̀m o,

¹¹ko ba wey na kawɛ mwat e ji rɛ hywiri, ba ka tik pyɛ cak cen wɛt. Ko ba dak kya e repomo mo.

¹²Yɔshuwa a re repomô begwɔ̀m o mwa na begwɔ̀m mɛn. A mɔbɔs hɛn, a wey na yɛn hywiri tyɛng sede remo de Mose, mwât fwôm Dagwi Darwey, a kana nɔng nu.

¹³Mwa ano, ba ka rangas rehak e ji bapomo vane wɛt. Ba tik rɛ e ra berahwol de ba lɔk ɛ vɛ; sɛ̌ Hazor zɔng de Yɔshuwa a rangas.

¹⁴BeIsrayɛl ba hashe mwa pyɛ́ de ba re e como mo mwa na yas yi e bapomo mo. Ko ba mɔbɔs bemat o mwa ba yɛnɛ na yɛn. Ba tɛ́t ɛ̀ hwak wɛt.

¹⁵Sede remo de Dagwi Darwey a kana nɔ̂ng Mose nu, ano arɔng de Mose a nɔ̂ng Yɔshuwa nu, ko Yɔshuwa kwong a ra kayɛ pyɛ tyɛng ano. A tik nà ra pyɛ cak de Dagwi Darwey a kana nɔ̂ng Mose nu e ra yɛ wɛt.

¹⁶Yɔshuwa a re mwa sevwel semo ngan, bak vwêl beraku, na bak hêy gbingiring e rwa batin, na mwa vwêl Gɔshɛn, na vwêl berahwol e rwa bato na rwa ta, mwa na nɛk Rɔt Yɔrdan.

¹⁷Yɛnɛ̂ vwel o ha sé yi e rakû Halak e rwa batin bagat bak vwêl berakû Seyir pere vɔk e Baal-Gat e rwa bato e nɛk Lɛbanɔn e nɛ̂n Raku Hɛrmɔn: Yɔshuwa a re begwɔ̀m o mwa na como, ko a vɛ̌ mɔbɔs hɛn.

¹⁸Ko a ros e de tô como na yɛn e ngyen.

¹⁹Vit a hak e ji mwa bapomo vane de ha jama nesâ sangal tyang na BeIsrayɛl sɛ̌ repomô Gibɛyɔn zɔng, remo de BeHivi ba sangal e ji mo. Mwa bwang o ba re vɛ e como.

²⁰E Dagwi Darwey wɛ̀ de a tɛ̀ neyey mɛn kashalang, na be tó como na BeIsrayɛl, yaga na be bin wey na yɛn hywiri, vit a nemwishish. Ano de Dagwi Darwey a kana nɔ̂ng Mose nu.

²¹E jeng yane arɔng Yɔshuwa a wɔ́, ko a wey na bemât Anak de bá sè e ji bapomô Hɛbrɔn, na Debir, tanga Anap, na mwa bwang bavwêl beraku Yuda na Israyɛl. Yɔshuwa a wey na yɛn mwa hywiri na bapomo mɛn.

²²Vit a WoAnak hwak de ba tɛ́t ɛ̀ e sevwêl Israyɛl; ko mwa ano, behak ba kyě sè e bapomô Gaza, na Gat tanga Ashdot.

²³Yi ano, Yɔshuwa a re sevwel o mwa na como, tyɛng sede remo de Dagwi Darwey a kana ha a Mose. A gas a BeIsrayɛl hɛ tyɛng na yére mɛn kuru na yɛ bya na he se mɛn. BeIsrayɛl kwong ba sɛ̀ pɔngɔ yi e tô como.