Read berom Yɔshuwa 12 Bible Online

Yɔshuwa 12 - berom bible

Yɔshuwa 12

¹BeIsrayɛl ba ga kana re begwɔ̀m beba e rwa rak na Yɔrdan na como, ba sey ɛ sevwel o, ba sangal ɛ yi e bak nɛk Arnɔn pere mɛ vɔk e nɛk Rɔt Yɔrdan, vɔk e Raku Hɛrmɔn e rwa bato.

²Gwining e ji mɛn à Gbɔng Gwɔ̀m Sihɔn wo BeAmɔr, womo de á sè na sangal e Hɛshbɔn. A re negwɔm rebît vwêl Gileyat hê bak batin yi e Arower e ra vwak Arnɔn, tanga repomo[6] e tê nɛk o, pere vɔk e nɛk Rɔt Yabɔk, e yɛnɛ mɛn na BeAmɔn.

³A to re negwɔm e ra bak rak wo Rɔt Yɔrdan yi e Gworep Galili e rwa bato pere wɔ mɛ e Bet-Yɛshimɔt, e bak rak wo Gbɔng Rep Nevwashe na pere wɔ wul mɛ nɛ̂n Raku Piska e rwa ta.

⁴Wo neba mo de ba ga re à Ɔk, gbɔng gwɔ̀m Bashan, de á sè gwining e ji BeRɛfa de ba tɛt ɛ. A sè sangal e Ashtarɔt kɛ Ɛdirɛi,

⁵ko yɛnɛ negwɔm mɛ na wuna na Raku Hɛrmɔn, na Salka tanga mwa vwêl Bashan, vɔk e yɛnɛ̂ BeGeshur tanga BeMaakat, mwa na rebît vwêl Gileyat hê bak bato, vɔk e yɛnɛ̂ sevwêl Sihɔn, gbɔng gwɔ̀m Hɛshbɔn.

⁶Mose tanga BeIsrayɛl ba ga kana re begwɔ̀m vane na bavwel mɛn. Mose, mwât fwôm Dagwi Darwey, à nɔ̂ng yerê Rubɛn, na ye Gat tanga rebît yê Manase sevwel sane mo, na se tɛ́ ɛ mɛn.

⁷Yɔshuwa tanga BeIsrayɛl ba re mwa begwɔ̀m e rwa ta na Yɔrdan na como yi e Baal-Gat e nɛk Lɛbanɔn vɔk e rakû Halak e rwa batin bagat bak vwêl berakû Seyir. Yɔshuwa kwong a gas a BeIsrayɛl vwel o e yére mɛn, na he tɛ́ ɛ mɛn.

⁸Sevwel o sɛ̄ à vwêl beraku, na vwêl berahwol e rwa ta, na nɛk Rɔt Yɔrdan, na sɛndɛng beraku e rwa rak, na hêy Yuda wɔ e bak hêy gbingiring e rwa batin. Vwel a hemo de BeHiti, na BeAmɔr, na BeKanaan, na BePɛrizi, na BeHivi tanga BeYebus ba sé ɛ.

⁹Begwɔ̀m de ba re mo ba sè vê bapomo vemo ngan: Yeriko, na Ai, bagat na Bet-Ɛl, na Yɛrusalɛm, na Hɛbrɔn, na Yarmut, na Lakish, na Ɛglɔn, na Gɛzɛr, na Debir, na Gɛdɛr, na Hɔrma, na Arat, na Libna, na Adulam, na Makeda, na Bet-Ɛl, na Tapuwa, na Hɛfɛr, na Afɛk, na Laasharɔn, na Madɔn, na Hazor, na Shimrɔn-Mɛrɔn, na Akshaf, na Taanak, na Megido, na Kɛdɛsh, na Yɔknɛyam e Karmɛl, Dor e rekwogôm Gworep Tē, na Goyim e Galili,[7] tanga Tirza. Begwɔ̀m o mwa ba sé kuru batat na wɛ gwining (31).