Read berom Yɔshuwa 13 Bible Online

Yɔshuwa 13 - berom bible

Yɔshuwa 13

¹Neshey pyak na ga kwey, ko Yɔshuwa a ga kwop, a ga tɛ́ ɛ kpushuk, ko Dagwi Darwey a yang ɛ, “Di, hwà ga kwop kpushuk, ko di bwâng vwel o ha rɔngɔl pyak de yin ê re,

²gwɛ à mwa neyɛnɛ̂ vwêl BeFilisti na bapomo mɛn vane batungun vɛ à Gaza, na Ashdot, na Ashkɛlɔn, na Gat tanga Ɛkrɔn. Tik na yin to re mwa vwêl BeGeshur e rwa rak wo Misra, na vwêl BeAvi e rwa batin, na yɛnɛ̂ vwel yi e Rɔt Shihor hemo de ha sé e yɛnɛ̂ vwêl Misra, na pere vɔk e repomô Ɛkrɔn. Ko yin to re mwa vwêl BeKanaan yi e Meyara wo BeSidɔn vɔk e Afɛk e yɛnɛ̂ vwêl BeAmɔr,

⁵na vwêl BeGebal, mwa na nɛk Lɛbanɔn yi e bak Baal-Gat e nɛ̂n raku Hɛrmɔn vɔk e yɛnɛ̂ vwêl Lebo-Hamat e rwa rak,

⁶na mwa BeSidɔn de ba sangal e vwêl beraku yi e nɛk Lɛbanɔn vɔk e Misrefot-Mayim. Jeng de BeIsrayɛl ba sé gwɛ̌ sek wɔ e ji mo, me pyɛ hom ma rɔda ro yerê bemat vane mo. Ko hwo hwà rɔda gas a BeIsrayɛl bavwel o yi na masâ sesek e tē mɛn, sede remo de ma nɔng o nu.

⁷Ko a remo, gas yɛnɛ̂ vwel o e nû bwâng yére shatyat o, tanga rebit yerê Manase, na he se mɛn.”

⁸Ko di, yerê Rubɛn, na ye Gat, tanga rebit yerê Manase hak ya ga kana sey numo mɛn de Mose, mwât fwôm Dagwi Darwey a ga kana nɔng ɛn e rwa rak e gurâ Rɔt Yɔrdan.

⁹Yɛnɛ̂ vwel mɛn o ha wɔ wul Arower e ra vwak Arnɔn, tanga repomo de ra sé e tê nɛk o, ko ha wuna ɛ mwa rà tas vwêl Medeba pere wɔ e Dibɔn.

¹⁰Ha to wuna mwa bapomo de Sihɔn, gbɔng gwɔ̀m BeAmɔr, a kana re ɛ negwɔm yi e Hɛshbɔn, ko ha wɔ wul yɛnɛ̂ vwêl BeAmɔn.

¹¹Ha wuna na vwêl Gileyat, na yɛnɛ̂ vwêl BeGeshur na BeMaakat mwa na raku Hɛrmɔn, na mwa vwêl Bashan, pere wɔ e Salka.

¹²Ha to wuna ɛ yɛnɛ̂ segwɔm Ɔk de a kana re negwɔm Ashtarɔt tanga Ɛdirɛi. Yɛ á sè wo tala e ji BeRɛfa. E yɛn vɛ de Mose a kana re ɛn, ko a ro bemat o yi e hwomo.

¹³Ko BeIsrayɛl ba ka tɔk ro BeGeshur na BeMaakat yi e tē mɛn wɛt, yaga ano, ba nàra e tê Israyɛl vey e yunung.

¹⁴Ko Mose a ka nɔ̂ng yerê Levi vwel de hê se mɛn wɛt. Dagwi Darwey a ga kana ha wɔgɔ, yɛn a rɔda sɛ̀ numo mɛn yi e ji nenɔrɔ pyɛ́ de BeIsrayɛl bê nása vɔk na yɛ.

¹⁵Mose a ga kana nɔ̂ng Rubɛn bak vwel mɛn.

¹⁶Wà wɔ̀ wul Arower e ra vwak Arnɔn tanga repomo de ra sé e tê nɛk o, ko wa wuna ɛ mwa rà tas vwêl Medeba,

¹⁷tanga Hɛshbɔn, na mwa bapomo de ba sé e ra tas vwel o, vɛ a Dibɔn, na Bamot Baal, na Bet-Baal-Mɛyɔn,

¹⁸na Yahas, na Kɛdɛmɔt, na Mefat, na

¹⁹Kiriyatayim, na Sibma tanga Zɛrɛt-Shahar e ra rahwôl nɛk o,

²⁰tanga Bet-Pɛyɔr, na sɛndɛng raku Piska tanga Bet-Yɛshimɔt.

²¹Wà wuna ɛ mwa bapomô rà tas vwel o, na mwa segwɔm Sihɔn, gbɔng gwɔ̀m BeAmɔr de a kana re negwɔm yi e Hɛshbɔn. Mose a ga kana re ɛ na como mwa na begwɔ̀m Midyan, vɛ à Ɛvi, na Rɛkɛm, na Zur, na Hur, tanga Rɛba. Mwa yɛn á kana sè bedagwɔm bapomô gbɔng gwɔ̀m Sihɔn.

²²E ji bemat de BeIsrayɛl ba mɔbɔs o ba wuna na Balaam Bɛyɔr womo de á sè vwoshon.

²³Rɔt Yɔrdan ha sé yɛnɛ̂ vwêl BeRubɛn e rwa ta. Mwa bapomo vane na nebapomo mɛn ba nɔ̂ng rùhup yerê Rubɛn vɛ.

²⁴Mose a ga kana to nɔ̂ng rùhup yerê Gat bak vwel mɛn.

²⁵Wa wuna ɛ̀ repomô Yazɛr, na mwa bapomô bak Gileyat, na rebît vwêl Amɔn pere wɔ̀ sɛ̀ mɛ repomô Arower de ra sé e rwa rak wo Raba.

²⁶Wà wɔ̀ wul Hɛshbɔn vɔk e Ramat-Mizpe na Bɛtɔnim, yi e Mahanayim vɔk e yɛnɛ̂ vwêl Lɔ-Dɛbar.

²⁷E ji nɛk Yɔrdan wa wuna Bet-Haram, na Bet-Nimra, na Sukɔt tanga Safɔn, vɛ a bwâng segwɔm Sihɔn, gbɔng gwɔ̀m Hɛshbɔn. Rɔt Yɔrdan ha sé yɛnɛ̂ vwêl BeGat o e rwa ta pere wɔ mɛ e Gworep Galili e rwa bato.

²⁸Mwa bapomo vane na nebapomo mɛn ba nɔ̂ng rùhup yerê Gat vɛ.

²⁹Mose kwong a ga kana to nɔng rùhup rebît yerê Manase bak vwel mɛn.

³⁰Yi e Mahanayim wa wɔ wul rwa bato. Wa wuna ɛ mwa vwêl Bashan, tanga bapomo kuru batyiimin vemo de Yayir a kana re na como. Gbɔng gwɔ̀m Bashan, Ɔk, a kana re ɛ negwɔm mwa.

³¹Ha to wuna ɛ rebît vwêl Gileyat, mwa na Ashtarɔt tanga Ɛdirɛi, bapomô segwɔm Ɔk, e Bashan. Mwa vwel hemo ba nɔ̂ng rebît rùhup Makir Manase.

³²Gwong a gwomo de Mose a gas ɛ sevwel de sa sé e gurâ Rɔt Yɔrdan e rwa rak na Yeriko, jeng de á sè e cwɛ̂l Mowap.

³³Ko a ba nɔ̂ng yerê Levi vwel de hê se mɛn wɛt, a yang ɛn, Dagwi Darwey, Dagwi BeIsrayɛl, a rɔda nɔng ɛn numo mɛn yi e ji nenɔrɔ pyɛ́ de bê nása vɔk na yɛ.