Read berom Yɔshuwa 14 Bible Online

Yɔshuwa 14 - berom bible

Yɔshuwa 14

¹Gwong de ba gas a BeIsrayɛl sevwêl Kanaan e rwa Rɔt Yɔrdan a gwomo: A sè e Ɛlɛyazar, piris, na Yɔshuwa Nun tanga bemât nuyêl rùhup BeIsrayɛl de ba gas hɛ.

²Yɛn a gas a yére shatyat na rebit o na masâ sesek, tyɛng sede remo de Dagwi Darwey a kana nɔ̂ng Mose nu.

³Mose a ga kana nɔ̂ng yére bya na rebit o mɛn a kwɔn o e gurâ Rɔt Yɔrdan e rwa rak. Ba ga kana gas yére Yɔsɛf ye tɛ́ ɛ yére bya, yɛ̄ à Manase na Ɛfrayim. Ko ba nɔ̂ng yerê Levi bak vwel o hak wɛt, ba nɔng ɛn bapomô sangal mɛn na nekwɔn gyeng vyēl na berɔndɔng mɛn zɔng e negya.

⁵BeIsrayɛl o kwong ba gas sevwel o, tyɛng na pyɛ de Dagwi Darwey a kana nɔ̂ng Mose nu.

⁶Tuhak, bemât Yuda behak ba vey na Yɔshuwa e Gilgal. Hwak e ji mɛn Yɛfunɛ wo ruhûp Kɛnis, a yang ɛ, “Hwà tɔk há de Dagwi Darwey a kana misang a Mose, mwât Dagwi, e Kadɛsh Barneya e ra me tanga hwo.

⁷E jeng o neshey tó hom na sè kuru banaas de Mose, mwât fwôm Dagwi Darwey, a tomo me yi e Kadɛsh Barneya mo wɔ̀ bɛrɛng vwel o e lɛrɛ, ko ma vey ha a yɛ tsak o pyɛ̂ mwa de ma di.

⁸Bemót de ba wɔ́ tanga me ba tɛ̀ nemi na gabsa a bemat e yey, ko me ma raa Dagwi Darwey, Dagwi hom, na yey hom mwa.

⁹Tuk hane kwong, Mose á sira a me mwin wɔgɔ, kwɔn de ma bɔrɔ na bwol hom hê sè nang tanga yere hom nesheneshey, yaga ma raa Dagwi Darwey, Dagwi hom, na yey hom mwa.

¹⁰Ko di, Dagwi Darwey a ga gyeng me, sede remo de a kana sira hɛ mwin. Neshey na ga wul kuru banaas na nɛ netungun yi e jeng de Dagwi Darwey á kana sira a Mose e jeng de BeIsrayɛl ba kana sè kyè e tê hey. Ko di, me à womo yunung! Ma ga wul neshey kuru rwit na nɛ netungun,

¹¹ko ma rɔngɔl na gap hom gbarak, sede jeng de Mose á kana tomo me. Ma rɔɔ vɔk gâp tô como tanga râ fwom sede raane mo.

¹²Yaga ano, nɔng me bak vwêl beraku womo, sede remo de Dagwi Darwey á kana sira tuk hane mo. Hwo, hwá kana wok arɔng e tuk hane mo wɔgɔ, BeAnak bá sè e hwomo e bagbɔng bapomo mɛn de ba gwɔrɔ vɛ na jwâ-pomo, ko ka sede Dagwi Darwey a rɔda sɛlɛ me, ma rɔda ro ɛn, sede remo de á kana sira.”

¹³Ano kwong, Yɔshuwa a tɛ̀ nerat e ra Kalɛp Yɛfunɛ, ko a nɔng ɛ repomô Hɛbrɔn, na re tɛ́ ɛ mɛ.

¹⁴Yaga ano, Hɛbrɔn a tɛ́ ɛ bak vwel o wo Kalɛp Yɛfunɛ wo ruhûp Kɛnis, sede remo de a sé ɛ vey e yunung, yaga a raa Dagwi Darwey, Dagwî BeIsrayɛl na yey mɛ mwa.

¹⁵Rezâ Hɛbrɔn ra kana sè Kiriyat-Arba, ko Arba mo á kana sè gbɔng o e ji BeAnak. Vwel o mwa ha sangal tyang yi e como.