Read berom Yɔshuwa 16 Bible Online

Yɔshuwa 16 - berom bible

Yɔshuwa 16

¹Bak vwel de ba nɔ̂ng yére Yɔsɛf, yi na masâ sesek a womo ngan: Yɛnɛ mo ha yi e Rɔt Yɔrdan bagat na Yeriko, e rwa rak wo lel nshî Yeriko. Yi e hwomo ha kwey e ji hey, ha tút e vwêl beraku, pere wɔ sɛ̀ mɛ Bet-Ɛl.

²Yi e Bet-Ɛl ha nára hɛ vɔk e Lus, ha pere kwey vɔk e Atarɔt, kwɔn de BeArki ba sangal ɛ.

³Ha gyirik e bak ta na vwêl BeYaflɛt, ko ha nára hɛ pere wɔ sɛ̀ mɛ Bet-Hɔrɔn wo vwel o na Gɛzɛr, ko ha de kyè vɔk e Gworep Tē.

⁴A sé e yére Yɔsɛf, yɛ̄ à Manase na Ɛfrayim, de ya sɛ̀ bak vwel wane, na wo se mwɛn.

⁵Bak vwêl rùhup BeƐfrayim wa sé ngan: Yɛnɛ̂ bak o mwɛn wa kaba yi e Atarɔt-Adar vɔk e rwa rak vɔk e Bet-Hɔrɔn wo tɛt o,

⁶ko yi e hwomo ha raa vɔk e Gworep Tē. E bak bato yɛnɛ mo ha kwey bagat na Mikmetat, na e rwa rak o ha kwey kwɔɔl wɔ̀ sɛ̀ Taanat-Shilo, ha to kwey pere wɔ̀ sɛ mɛ Yanowa e rwa rak.

⁷Yi e Yanowa ha gyirik vɔk e Atarɔt na Naara, ha pere wɔ̀ ra Yeriko, ko ha nára hɛ pere vɔk e Rɔt Yɔrdan.

⁸E rwa ta wo Mikmetat, yɛnɛ mo ha kwey yi e Tapuwa vɔk e rɔt Kana, ko ha to pere wɔ e Gworep Tē. Womo wɛ a bak vwel wo rùhup yerê Ɛfrayim,

⁹mwa na bapomo bahak na nebapomo vɛ de ba nɔ̂ng BeƐfrayim yi e bak vwel o wo Manase.

¹⁰Ko yɛn a ró BeKanaan de ba sé sangal e Gɛzɛr wɛt. Yaga ano, BeKanaan o ba re nuyel na sangal e tê BeƐfrayim o vey e remo. Ko ba tɛ̀ ɛn gbing-gbing, be ra a yɛn fwôm retek.