Read berom Yɔshuwa 17 Bible Online

Yɔshuwa 17 - berom bible

Yɔshuwa 17

¹Bak vwel de ba nɔ̂ng yerê Manase yi na masâ sesek wa sè rwey o. Manase á sè hwey kinât Yɔsɛf. Ko Makir, dâ Gileyat, á sé hwey kinât Manase, á sè sugâ como, yaga ano ba nɔ́ng ɛ́ bak vwêl Gileyat na Bashan e rwa rak wo Yɔrdan.

²Ko ba gas a bwâng rùhup BeManase bebak vwel o bemɛn. Bazâ bedâ rùhup o à Abiyɛzɛr, na Hɛlɛk, na Asriyɛl, na Shɛkɛm, na Hɛfɛr tanga Shemida; yɛn vɛ à nèy bewen nè Manase, hwêy Yɔsɛf,

³Ko di, Zelofehat, hwêy Hɛfɛr Gileyat Makir Manase a tɔ̀ hwey wen wɛt, sɛ̌ nèy behwong zɔng. Bazâ behwóng mɛ mo à Magla, na Nowa, na Hɔgla, na Milka tanga Tirza.

⁴Yɛn a vey na Ɛlɛyazar, piris, na Yɔshuwa Nun tanga bemât nuyel mɛn, ko yɛn a ye, “Dagwi Darwey á kana nɔ̂ng Mose nu, na a nɔng ot bak o mwot yi e ji wò begwa mot bewen.” Ko ba nɔng ɛn numo mɛn sede begwa mɛn beras e yerê Manase, tyɛng na redu Dagwi Darwey.

⁵Pyɛ ma yemo de ya tɛ̀ yerê Manase ya sɛ̀ bebak o kuru, ko ba wuna na bavwêl Gileyat tanga Bashan de ba sé e rwa rak wo Yɔrdan wɛt. Yaga behwông Manase ba sɛ̀ numo mɛn sede begwa mɛn bewen o.

⁷E rwa bato bak vwêl yerê Manase wa man na bak vwêl Ashɛr. E bak batin yɛnɛ̂ bak vwel o ha wɔ wul Mikmetat e rwa rak wo Shɛkɛm. Ha re nuyel wo e rwa batin, ha wuna ɛ bemât Ɛn-Tapuwa.

⁸Yɛnɛ̂ sevwêl Tapuwa ha sé hê Manase, ko Tapuwa mo wà sé e vwɔ̂ BeƐfrayim.

⁹Ano kwong, yɛnɛ mo ha gyirik vɔk e rɔt Kana. Bapomo vane de ba sé e rwa batîn rɔt o ba sé vê BeƐfrayim, mwa ano de ba sé e bak vwêl Manase. Yɛnɛ̂ vwêl Manase ha kaba yi e rwa batô rɔt o ko ha pere kwey wɔ e Gworep Tē.

¹⁰Bak o de wà sé vɔk e rwa batin wa sé wo Ɛfrayim, ko womo de wà sé vɔk e rwa bato wà sé wo Manase, ko yɛnɛ mɛn yî rwa ta ha sè e Gworep Tē. Yɛnɛ mo e bato ha man na Ashɛr ko e rwa rak na Isakar.

¹¹E ji bavwêl Isakar na Ashɛr, Manase a vɔk bapomo bahak, vɛ a Bet-Sheyan na Ibleyam tanga nebapomo mɛn, mwa na Dor wɔgɔ, vwêl dagwɔm[8] tanga Ɛn-Dɔr, na Taanak na Megido, mwa na nebapomo mɛn.

¹²Ko BeManase ba tɔk ro bemât bapomo vane mo wɛt; yaga ano, BeKanaan ba re nuyel na sangal e bak vwel wane mo.

¹³Jeng de BeIsrayɛl ba gwɛ̌ tɛ̀ gap, yɛn a ka ro BeKanaan o wɛt, ko ba tɛ̀ ɛn gbing-gbing, be ra a yɛn fwôm retek.

¹⁴Yére Yɔsɛf ya ba tosho a Yɔshuwa, ya ye, “Di, wot a sé pyak sizɔng, yaga Dagwi a tɛ̀ nerat e ra wot. Ko yaga sɛ́ de hwà nɔng ot bak vwel gwining zɔng, na wo se mwot ɛ?”

¹⁵Yɔshuwa a toyo a yɛn, a yang ɛn, “Ka sede yin a sé bemat pyak ano, yin e ngyɔ hin e ji berahwôl Ɛfrayim, ko tút in vɔk e bak bahwot wo BePɛrizi na BeRɛfa, na yin wɔ̀ tow bahwot o, na yin wunta kwɔn o yaga bato min.”

¹⁶Yɛn a to yang ɛ, “Bak berahwol o wa vey a wot wɛt. Ko di, mwa BeKanaan de ba sangal e bak tyɛl o ba vɔk bekyɛkyɛ̂ bedwa vê dyam, mwa vinde ba sé e ji Bet-Sheyan na nebapomo mɛ, tanga vemo de ba sangal e tyɛ̂l Yɛzrɛɛl ano arɔng.”

¹⁷Ko Yɔshuwa a yâng BeƐfrayim na BeManase, “Ey, mwin, yin a sé pyak, ko yin a vɔk gbɔng gap. Yaga ano, yin ê tɔk sangal e bak vwel gwining zɔng wɛt.

¹⁸Vwêl bak berahwol hê to sè min arɔng. Mwin, kwɔn o ha sé rehwot bɛs, ko shɛlɛ hin hɛ, na yin vɔk hɛ vɔk e yɛnɛ̂ netês hɛ. Yin ê ro BeKanaan o, mwa ano de yɛn a vɔk bekyɛkyɛ̂ bedwa vê dyam, na mwa ano de yɛn a vɔk gap arɔng.”