Read berom Yɔshuwa 18 Bible Online

Yɔshuwa 18 - berom bible

Yɔshuwa 18

¹Mwa bemât Israyɛl ba tula hɛn e Shilo, ko ba tɛ̀ bûk sangâl Dagwi e hwomo. Vwel o ha ga tɛ́ ɛ́ e vɔ mɛn,

²ko mwa ano, bwâng yére BeIsrayɛl tyaama ya rɔngɔl nà sɛ̀ bebak vwel o bemɛn.

³Ano kwong, Yɔshuwa a yâng BeIsrayɛl o, “Yin ê sangal bɛs ano vɔk e yɛ̌ jeng nà sogo, na yin wɔ̀ sey ɛ̀ bwâng vwel hemo de Dagwi Darwey, Dagwî bedabeda min, a ga nɔng in ɛ?

⁴Ba ga kana nɔ̂ng yerê Yuda bak vwel o mwɛn e rwa batin na yére Yɔsɛf mwɛn a bak o e rwa bato. A remo, kasa hin bemat tibetat yi e kayɛ yere, na be vey na me. Ma rɔda tomo hɛn, na yɛn wɔ̀ kyě kyè be bɛrɛng vwel o, na be jɛk, yaga na be di begwông gâs hɛ. E bama mo, yɛn a rɔda gas hɛ bebak betaama, ko bê vey mɛ e ngamo na me. Ko me ma rɔda masa sesek, na be di bak de Dagwi Darwey, Dagwi mot, a rɔda nɔ̂ng kayɛ yere.

⁷Ko BeLevi ba rɔda vɔk numo mɛn e tē min wɛt, yaga fwôm piris Darwey gwa sé bak o mwɛn à wane. Ko yére Gat, na Rubɛn tanga rebit yerê Manase ya ga kana sɛ̀ bebak o bemɛn, vemo de Mose, mwât fwôm Dagwi Darwey, a ga kana nɔng ɛn e gurâ rak gwô Rɔt Yɔrdan.”

⁸Ano kwong, Yɔshuwa a nɔ̂ng bemat de ba kasa mo nu, a yang ɛn, “Kyè in, bɛrɛng hin vwel o, na yin jɛk, ko yin toyo vey mɛ na me. Ko me ma rɔda gas a yin hɛ na masâ sesek e ngamo e Shilo e nuyêl Dagwi Darwey.” Ano, bemat o ba kaba gwong, ba wɔ̀ kyě bɛrɛng vwel o, yɛn a misang hɛ e jɛk, repomo na repomo, ba gas hɛ bebak o betaama. E bama mo, yɛn a toyo vey na Yɔshuwa e kwɔ̂n ye ngyɔk e Shilo.

¹⁰Yɔshuwa arɔng a masa sesek, na be di bak de Dagwi Darwey a nɔ̂ng kayɛ yere. Ano de Yɔshuwa a gas vwel o e tê BeIsrayɛl.

¹¹Bak vwel o wo mɛsɛng o de wa nusu ba nɔ̂ng yerê Bɛnyamin na rùhup yɛ. Bak vwel o wa sé e tê yére Yuda na Yɔsɛf.

¹²Yɛnɛ mo e bak bato ha yi e Rɔt Yɔrdan, ha tút e hagât Yeriko rwa bato, ha to tút vɔk e bak ta, ha kwey vwêl beraku pere wɔ e hêy Bet-Avɛn.

¹³Yi e hwomo, ha kwey wɔ̀ ta e bak batin wo hagât Lus wɔgɔ, Bet-Ɛl, ko ha to gyirik vɔk e Atarɔt-Adar, ha kwey rahwol e rwa batin na Bet-Hɔrɔn wo vwel o.

¹⁴Yɛnɛ mo ha to doyo kwɔɔl vɔk e rwa batin, ko ha wɔ̀ yɛnɛ hɛ e Kiriyat-Baal wɔgɔ, Kiriyat-Yɛyarim, rɛ a repomô BeYuda. Yɛnɛ mo hê bak ta à hane.

¹⁵Yɛnɛ bak vwel o hê rwa batin ha yi bagat na Kiriyat-Yɛyarim, ha to nára hɛ, ha kwey vɔk e lwêl nshî Neftowa.

¹⁶Ha to gyirik vɔk e nɛ̂n raku de wó bɛrɛng nɛk Hinɔm e talâ nɛk BeRɛfa e bato. Ha to gyirik ha kwey nɛk Hinɔm e rwa batin e kwɔ̂ng rakû BeYebus wɔ̀ sɛ̀ Ɛn-Rɔgɛl.

¹⁷Ha kyè kwɔɔl vɔk e rwa bato wɔ̀ sɛ̀ Ɛn-Shɛmɛsh pere wɔ̀ wul mɛ̀ Gɛlilɔt, wɔ̀ bɛrɛng mɛ̀ turus vɔk e Adumim. Yi e hwomo, yɛnɛ mo ha to wɔ̀ gyirik vɔk e gwofwa Bohan, Bohan a sè hwêy Rubɛn,

¹⁸ha re nuyel e rwa bato e kwɔ̂ng raku de wó bɛrɛng nɛk Yɔrdan, ko ha gyirik vɔk e ji nɛk o.

¹⁹Ha to kwey e rwa bato wo kwɔ̂ng rakû Bet-Hɔgla, ko ha wɔ̀ yɛnɛ hɛ e nû Gworep Nevwashe hê bak bato, kwɔn de nshî Yɔrdan ne gabsa ɛ. Yɛnɛ mo hê bak batin à hane.

²⁰E rwa rak, yɛnɛ̂ vwel o ha sé e Rɔt Yɔrdan. Yɛnɛ̂ bak vwel de ba nɔ̂ng rùhup BeBɛnyamin a hane.

²¹Bapomo de ba nɔ̂ng rùhup BeBɛnyamin a vet ngan: Yeriko, na Bet-Hɔgla, na Ɛmɛk-Kezis;

²²na Bet-Arba, na Zemarayim, na Bet-Ɛl,

²³na Avim, na Para, na Ofra,

²⁴na Kefar-Amɔni, na Ofni tanga Geba. Mwa bapomo mo ba sé kuru na vɛ beba tanga nebapomo mɛn.

²⁵Ba to wuna na Gibɛyɔn, na Rama, na Bɛɛrɔt,

²⁶na Mizpa, na Kefira, na Moza,

²⁷na Rɛkɛm, na Irpeel, na Tarala,

²⁸na Zela, na Ɛlɛf tanga Yebus wɔgɔ, Yɛrusalɛm, Gibeya tanga Kiriyat-Yɛyarim. Mwa bapomo mo ba sé kuru na vɛ banaas na nebapomo mɛn. Bak vwel o ba nɔ̂ng rùhup BeBɛnyamin wɛ, na wo sè mwɛn.