Read berom Yɔshuwa 2 Bible Online

Yɔshuwa 2 - berom bible

Yɔshuwa 2

¹A vane ano, Yɔshuwa Nun a hwo tomo bemât wɛlɛ beba e lɛrɛ yi e kwɔ̂n ye ngyɔk e Shitim, na yɛn a wɔ̀ bɛrɛng a yɛn sevwêl Kanaan, a kat mɛ bak repomô Yeriko. Ano kwong, yɛn a kaba gwong, ba wɔ̀ wul repomo mo, ko ba wɔ̀ yel e lɔ devwes hwak de ba tang ɛ à Rahap, na be bin pɔl e hwomo.

²Bemat ba wɔ̀ ha a gwɔ̀m Yeriko wɔgɔ, BeIsrayɛl behak ba ga vey nawiri, na be ba wɛlɛ sevwel o.

³Yɛ kwong a tomo vɔk na Rahap, a yang ɛ, “Pat bemat de bá vey, bá yel e lɔ mō! Ba vêy bɛrɛng sevwel mot mwa e wɛlɛ!”

⁴Hwā mo a ye, “Ey mwin, bemat o bá ga vey na me, ko ma tɔk kwɔn de bá yi ɛ wɛt. Ko nawiri, jeng de ba vey bagât bang rwi repomo, bemat o ba nusu hɛn ba kyè. Ko ma tɔk bak de ba vɔk ɛ wɛt. Raa hin hɛn ziri, gyeng yin ê sɛ̀ ɛn.” Ko e ji ha mwin, Rahap a ga kana jut bemat vane mo, a tut na yɛn e ragyip duk, ko a ga wɔ̀ lɛrɛ hɛn e nɛn mapâk shwêy linen de a kana lasha wɛ e hwomo.

⁷Ano kwong, bemât gwɔ̀m o ba nusu, ba raa wɔ̀ jāma hɛn e rwa Yɔrdan, vɔk e nekwɔn de be tē ɛ̀ dɔ. Jeng de bemat ro mo ba nu ɛn, ko ba vě to bang rwi repomo mo.

⁸Gyam na bemât wɛlɛ mo be dyɛng nevwa, ko Rahap a hwo tut wɔ na yɛn e ragyip duk o.

⁹A yang ɛn, “Ma tɔk Dagwi Darwey a ga nɔng in vwel hemo. Bengyip min ba ga vos ot, ko neyey mwa bemat vwel o ne ye ywey yaga yin.

¹⁰Yaga wot a ga wok, Dagwi Darwey a tɛ̀ nshî Gbɔng Rep Sere nà hworok e nuyel min, jeng de yin a nusu yi e Misra. Wot a to wok rehâ mɔbɔs Sihɔn na Ɔk, begwɔ̀m beba vê BeAmɔr de ba sé e rwa rak na Yɔrdan, de yin a wey na yɛn hywiri.

¹¹Jeng de wot a wok reha mo, nemi nà gabsa a wot e yey, ko vit a mwat hwak de a to vɔk yey ting, na a man gey na yin. E mwin, e Dagwi Darwey, Dagwi min, de a sé Dagwi zɔng e ji lagwi e rak o tanga e ngamo e jey.

¹²Ko di a remo, sira hin a me na Dagwi Darwey, yin a rɔda dura a belɔ da hom nerat tyɛng sede remo de ma ga ra a yin pyɛ́ ryat arɔng. Nɔng me hin pyɛ dura ye mwin wɔgɔ,

¹³yin ê sey nekên da hom, na neng hom, na begwa hom bewen na behwong, tanga belɔ mɛn mwa. Tik ot beken, yin mɔbɔs hot wɛt!”

¹⁴Bemat o ba yang ɛ, “Dagwi ê wey na wot, ka sede pyɛ cak ya té na hwak e ji min! Hwo ha a mwat hwak pyɛ de wot a vey ra mo wɛt, ko wot a rɔda ra a hwo pyɛ́ ryat yê mwin, jeng de Dagwi Darwey a nɔng ot vwel hemo.”

¹⁵Bak lɔ Rahap wa sé e vwarâ repomo. Yaga ano, a tɔk gyira hɛn na rwik e repɔk duk mɛ.

¹⁶Ko a yang ɛn, “Kyè in vɔk e berahwol, yaga bemat de be jāma hin be kwon sɛ̀ in wɛt. Lɛrɛ hin e hwomo nepɔlɔ netat, sɛ̌ yɛn a toyo e ngyen, ko yin de kyè nedem min.”

¹⁷Bemat o ba yang ɛ, “Wot a rɔda gyeng sira mot de wot a ga sira a hwo.

¹⁸Di, pyɛ de hwô ra jeng de wot ê vey re vwel hemo, rɔgɔs kerik kesinang kemo e repɔk de hwô gyirik hot ɛ. Ko hwo vey na da mō, na neng mō, na begwa mō tanga bemât lɔ da mō mwa e ji lɔ mō.

¹⁹Ko ka sede mwat hwak a nusu yi e ji lɔ mō, ka ba de mɔrɔ hɛ, ko nemi mɛ na rɔda sè e ra to mɛ pyɛ mɛ; vit a nɛn e ra to mot. Ko ka sede ba mǎ mwat de a nàra e ji lɔ mō tanga hwo, ko nemi mɛ na rɔda sè e ra wot.

²⁰Ko di, ka sede hwà ha a mwat hwak pyɛ de wot a vey ra, ko wot a ga nusu hot yi e sira de wot a ga sira a hwo.”

²¹Hwā mo a ye, “Ey, a sè ano”, ko a gyira hɛn, a tɛ̀ ɛn e gwong, be kyè. E bama mo, a rɔgɔs kerik kesinang kane e repɔk duk mɛ.

²²Bemat wɛlɛ mo ba kyè vɔk e berahwol, ko ba wɔ̀ sangal e hwomo pɔlɔ tat. Bemat de be raa hɛn o ba jāma hɛn e kahɛ kwɔn, ko ba tɔk sɛ̀ ɛn wɛt, ba vɛ be toyo hɛn vɔk e lɔ.

²³Ano kwong, bemat wɛlɛ vane beba ba gyirik yi e kwɔ̂n lɛrɛ e berahwol o, ko ba ye dɔ à rɔt. Yɛn a toyo vɛ hɛn na Yɔshuwa Nun, ko ba misang a yɛ neyɛnɛ̂ pyɛ́ mwa de ya té na yɛn.

²⁴Yɛn a ha a yɛ, ba ye, “Wot a ga tɔk mwin, Dagwi Darwey a ga nɔng sevwel o mwa e vɔ mot, ko neyey bemat o mwa na ye ywey yaga bengyip mot.”