Read berom Yɔshuwa 20 Bible Online

Yɔshuwa 20 - berom bible

Yɔshuwa 20

¹Bama de ba ga yɛnɛ gâs sevwel o, Dagwi Darwey a yâng Yɔshuwa,

²ha na BeIsrayɛl, yang ɛn, “Be páa ɛ̀ bapomo bahak vê dál, tyɛng na redu de ma nɔng o e nû Mose.

³Ka sede mwat a mɔrɔ mwat e gawey, na simo mɛ wɛt, a rɔda tele vɔk e rehak e ji bapomo mo, na a wɔ̀ dal ɛ yi e mwât talâ pyɔ̌n nemî mwat mɛ. A rɔda wɔ̀ dura tó mɛ e kwɔn de be ragas ɛ badu e rwi repomo mo, ko a dura pyɛ de a ga ra e nuyêl bemakuk o. Yɛn a rɔda sey ɛ́ e ji rɛ, ko bê nɔng ɛ́ kwɔn de a rɔda sangal ɛ̀.

⁵Ka sede mwât talâ pyɔ̌n nemi mo a sé ró ɛ vɔk e repomo mo, ko bemât repomo mo be kwon nɔng ɛ mwat o wɛt. Bē gyep ɛ, yaga a ra na simo mɛ wɛt, ko mwat o arɔng á kana sè mwât repugu mɛ wɛt.

⁶A rɔda sangal e ji repomo rane sɛ̌ jeng de ba wɔ́ na yɛ e nuyêl regyɛng bemât repomo, na be ra a yɛ shɔt. Sede ba sɛ̀ ɛ na nɛn wɛt, gbing-gbing, a sangal e hwomo sɛ̌ jeng de darwêy bepiris wo jeng yane mo a ku e ngyen. E bama mo kwong, mwât mɔrɔ̂ mwat o a rɔda tɔk toyo vɔk e repomô lɔ mɛ.”

⁷Yaga ano, BeIsrayɛl ba tik bapomô dál vemo ngan e rwa ta wo Yɔrdan: Kɛdɛsh e Galili e bak berahwôl Naftali, na Shɛkɛm e bak berahwôl Ɛfrayim, tanga Kiriyat-Arba wɔgɔ, Hɛbrɔn, e bak berakû Yuda.

⁸Ko e gurâ Rɔt Yɔrdan, e rwa rak na Yeriko, ba to tik Bɛzɛr e ji hey hê tàs e ji bak vwêl yerê Rubɛn, na Ramot e ji Gileyat e bak vwêl yerê Gat, tanga Golen e Bashan e bak vwêl yerê Manase.

⁹Vane vɛ à bapomô dál de ba tik yaga BeIsrayɛl, mwa na bemat beduk de ba sangal e tē mɛn. Kawɛ mwat de a mɔrɔ mwat e gawey a tɔk tele, na a wɔ̀ dal ɛ̀, de a ku e vwɔ̂ mwât talâ pyɔ̌n nemi gyam na regyɛng bemât repomo be ra a yɛ̀ shɔt wɛt.