Read berom Yɔshuwa 21 Bible Online

Yɔshuwa 21 - berom bible

Yɔshuwa 21

¹Bedanelɔ rùhup BeLevi ba wɔ́ na Ɛlɛyazar, piris, na Yɔshuwa Nun tanga bedanelɔ rùhup mwa yére Israyɛl e Shilo, e ji sevwêl Kanaan. Ba ha na yɛn ba yang ɛn ngan, “Dagwi Darwey a kana nɔng nu yi na Mose wɔgɔ, be nɔng ot bapomô sangal mwa na nekwɔn gyêng yas mot arɔng.”

³Yaga ano, BeIsrayɛl ba ra tyɛng na redu Dagwi Darwey, ko ba hwo vɛ́sɛ a BeLevi bapomo bahak na nekwɔn gyêng yas o yi e ji bebak vwel o bemɛn.

⁴Gas hê mɛsɛng o e tê yerê Levi na masâ sesek ha gaba e vwɔ̂ ruhûp Kohat. Lɔ Aharon hê ruhup o yɛ piris, ha sɛ̀ bapomo kuru na vɛ batat yi e bak vwêl yerê Yuda, na wo Simɛyɔn tanga wo Bɛnyamin.

⁵Ko bwâng nelɔ Kohat na sɛ̀ bapomo kuru yi e bak vwêl yerê Ɛfrayim, na wo Dan tanga wo rebît yerê Manase ye rwa ta.

⁶Rùhup Gɛrshɔn ba sɛ̀ bapomo kuru na vɛ batat yi e bak vwêl yerê Isakar, na wo Ashɛr, na wo Naftali tanga wo rebît yerê Manase e rwa rak.

⁷Rùhup Mɛrari ba sɛ̀ bapomo kuru na vɛ baba yi e bak vwêl yerê Rubɛn, na wo Gat tanga wo Zɛbulun.

⁸BeIsrayɛl ba nɔ̂ng BeLevi bapomo vane tanga nekwɔn gyêng yas vɛ yi e masâ sesek tyɛng na redu de Dagwi Darwey a nɔ̂ng Mose.

⁹Swesek o gwo mɛsɛng gwa gaba e vwɔ̂ lɔ Aharon hê ruhup Kohat, yerê Levi. Ha sɛ̀ yi e bak vwêl yerê Yuda tanga wo Simɛyɔn bapomo vemo ngan de bê ngyɛrɛ bazâ vɛ.

¹¹Kiriyat-Arba wɔgɔ, Hɛbrɔn mwa na kwɔ̂n gyêng yas de ha gwɔrɔ hɛ e bak berahwôl Yuda. Arba á kana sè dâ BeAnak.

¹²Ko ba ga kana nɔ̂ng Kalɛp Yɛfunɛ cɛ̀l na nebapomo mo, ba tɛ́ ɛn numo mɛ.

¹³Ba to gwɛ a Hɛbrɔn, hak e ji bapomô dál, bapomo vemo ngan: Libna,

¹⁴na Yatir, na Ɛshtɛmɔwa,

¹⁵na Hɔlɔn, na Debir,

¹⁶na Ayim, na Yuta tanga Bet-Shɛmɛsh mwa na nekwɔn gyêng yas vɛ. Mwa bapomo mo ba sé shabatat yi e bak vwêl yerê Yuda na Simɛyɔn.

¹⁷Ko yi e bak vwêl yerê Bɛnyamin, ba nɔng bapomô Gibɛyɔn, na Geba,

¹⁸na Anatot tanga Almɔn mwa na nekwɔn gyêng yas mɛn. Bapomo mo ba sé banaas.

¹⁹Mwa bapomô lɔ Aharon, piris, ba sé kuru na vɛ batat, mwa tanga nekwɔn gyêng yas vɛ.

²⁰Ba nɔ̂ng bwâng belɔ Kohat bapomo vemo ngan yi e bak vwêl yere Ɛfrayim: Shɛkɛm, rehak e ji bapomô dál e bak berahwol, tanga Gɛzɛr, na Kibzaim tanga Bet-Hɔrɔn, mwa na nekwɔn gyeng yas vɛ, bapomo banaas a vane.

²³Ko yi e bak vwêl yerê Dan ba nɔng ɛn bapomo vemo ngan: Ɛltɛkɛ, na Gibɛtɔn, na Ayalɔn tanga Gat-Rimɔn mwa na nekwɔn gyêng yas vɛ, bapomo banaas a vane.

²⁵Ko yi e bak vwêl rebît yerê Manase ye rwa ta ba nɔng ɛn bapomo baba, vɛ à Taanak tanga Gat-Rimɔn tanga nekwɔn gyêng yas vɛ.

²⁶Mwa bapomo na nekwɔn gyêng yas de ba nɔ̂ng bwang BeKohat bá sè kuru jìp.

²⁷Ba to nɔ̂ng BeGɛrshɔn, ruhup hwak e ji vɛ Levi, bapomo baba yi e bak vwêl rebît yerê Manase ye rwa rak, vɛ à Golan de ha sé e Bashan, hak e ji bapomô dál tanga Beshtera tanga nekwɔn gyêng yas vɛ.

²⁸Ko yi e bak vwêl yerê Isakar, ba nɔng ɛn bapomo vemo ngan: Kishiyɔn, na Dabɛrat,

²⁹na Yarmut tanga Ɛn-Ganim mwa na nekwɔn gyeng yas vɛ; bapomo banaas a vane.

³⁰Yi e bak vwêl yerê Ashɛr, ba nɔng ɛn bapomo vemo ngan: Mishal, na Abdɔn,

³¹na Hɛlkat tanga Rehep mwa na nekwɔn gyêng yas vɛ, bapomo banaas a vane.

³²Yi e bak vwêl yerê Naftali, ba nɔng ɛn bapomo batat vemo ngan: Kɛdɛsh e Galili, rehak e ji bapomô dál, na Hamɔt-Dor tanga Kartan na mwa nekwɔn gyêng yas vɛ.

³³Mwa bapomo de ba nɔ̂ng ruhup Gɛrshɔn o ba sé kuru na vɛ batat mwa na nekwɔn gyêng yas vɛ.

³⁴Ko ba nɔ̂ng bwâng BeLevi e ruhup Mɛrari bapomo yi e bak vwêl yerê Zɛbulun, vɛ a Yɔknɛyam, na Karta,

³⁵na Dimna tanga Nahalal mwa na nekwɔn gyêng yas vɛ, bapomo banaas a vane.

³⁶Ba to nɔng ɛn bapomo banaas yi e bak vwêl yerê Rubɛn, vɛ à Bɛzɛr, na Yahas,

³⁷na Kɛdɛmɔt tanga Mefat mwa na nekwɔn gyêng yas vɛ.

³⁸Yi e bak vwêl yerê Gat, ba to nɔng ɛn bapomo banaas, vɛ a Ramɔt wò Galeyat, rehak e ji bapomô dál, na Mahanayim, na

³⁹Hɛshbɔn tanga Yazɛr na mwa nekwɔn gyeng yas vɛ.

⁴⁰Mwa bapomo de ba nɔ̂ng ruhup Mɛrari wo yerê Levi ba sè kuru na vɛ baba.

⁴¹Nepyak bapomo de BeIsrayɛl ba nɔ̂ng yerê Levi ba sé kuru banaas na vɛ rwit.

⁴²Karɛ repomo ra vɔk ɛ̀ kwɔ̂n gyêng yas rɛ.

⁴³Ano kwong, Dagwi Darwey a nɔ̂ng BeIsrayɛl mwa vwel de a kana sira a bedabeda mɛn, a rɔda nɔng ɛn. Yɛn a re hɛ, ha tɛ́ ɛ mɛn ko yɛn a sangal ɛ̀.

⁴⁴Dagwi Darwey a nɔng ɛn pɔngɔ e kawɛ bak, sede remo de a kana sira a bedabeda mɛn. Vit a hwak e ji bemât repugu mɛn de a tɔk ra retek na yɛn, yaga Dagwi Darwey a nɔng ɛn bemât repugu mɛn mwa e ji vwɔ mɛn.

⁴⁵Vit a ha hak de Dagwi Darwey a kana sira a BeIsrayɛl de ha tik nà sila hɛ.