Read berom Yɔshuwa 22 Bible Online

Yɔshuwa 22 - berom bible

Yɔshuwa 22

¹Yɔshuwa a yila bemât yére Rubɛn, na yê Gat tanga rebit yê Manase yê rwa rak.

²A yang ɛn, “Yin a ga gyeng kayɛ pyɛ de Mose, mwât fwôm Dagwi Darwey, a nɔng in nu e ra yɛ̀, ko yin a ga to gyeng badu hom arɔng.

³Yin a tɔk yē waa à begwa min wɛt e ji neshey nemo pyak vey e yunung, ko yin a ra mwa pyɛ de Dagwi Darwey, Dagwi min, a nɔng in nu.

⁴Di in a remo, Dagwi Darwey, Dagwi min, a ga nɔ̂ng begwa min pɔngɔ, ba ga sɛ̀ sangâl netyang, sede remo de a kana sira a yɛn. Yaga ano, doyo hin, na yin toyo vɔk e nelɔ min e vwel de ha tɛ́ ɛ min e gurâ Yɔrdan de Mose, mwât fwôm Dagwi Darwey, a kana nɔng in.

⁵Ko tē in naka, na yin bin gyeng mwa badu de Mose, mwât fwôm Dagwi Darwey, a kana nɔng in vɛ: Tɛ̀ in yey na Dagwi Darwey, Dagwi min, na yin kyè e begwong mɛ mwa naka, na yin raa badu mɛ, na yin to bana hin na yɛ, na yin ra a yɛ̀ fwom na yey rining tanga gap min mwa arɔng.”

⁶E bama mo, Yɔshuwa a tɛ̀ a yɛn nerat, ko a tɛ̀ ɛn e gwong. A to yang ɛn, “Toyo hin vɔk e nelɔ min na pyɛ̂ nedanerey sizɔng de yin a sɛ̀: Kàra yas, na dyam shinang, na dyam pyɛng, na dyam pama tanga dyam shi tanga gwakû berugu. Gas in pyɛ́ de yin a hashe yi na bemât repugu min o na begwa min.” Ko yɛn a kyè vɔk e nelɔ mɛn. Mose a ga kana nɔ̂ng rebit yerê Manase kwɔn o mɛn e rwa rak wo Yɔrdan, ko bwang mɛn Yɔshuwa a nɔng ɛn kwɔn o mɛn e rwa ta tanga bwâng begwa mɛn BeIsrayɛl.

⁹Ano kwong, bemât yerê Rubɛn, na ye Gat tanga rebit ye Manase ba hala BeIsrayɛl e Shilo, e vwêl Kanaan, ba sogo ba kaba gwong vɔk e kwɔn mɛn e vwêl Gileyat, hemo de yɛn a ga re sede remo de Dagwi Darwey a kana nɔng ɛn redu yi e nû Mose.

¹⁰Jeng de yɛn a wul Gɛlilɔt bagat na Yɔrdan, e ji sevwêl Kanaan, ko yerê Rubɛn, na ye Gat tanga rebit ye Manase yɛn a lɔk gbɔng gàgbang rangâs yas vɔk na Dagwi de wá sè garang e hwomo.

¹¹Ko bwâng BeIsrayɛl ba wok ha mo, ba yang bemɛn, “Káa! BeRubɛn, na BeGat tanga rebit yerê Manase ba ga lɔk gàgbang rangâs yas vɔk na Dagwi e yɛnɛ̂ vwêl Kanaan, e Gɛlilɔt, e gura gworo gwô BeIsrayɛl!”

¹²Ko yɛn mwa bemât Israyɛl ba hwo tula hɛn e Shilo, yaga na be wɔ tó como na yɛn.

¹³Ko yɛn a tanga tomo Pinehas Ɛlɛyazar, piris, wɔ na BeRubɛn, na BeGat tanga BeManase vê rwa rak e vwêl Gileyat.

¹⁴A vɔk ɛ bemât nuyel kuru vê yére BeIsrayɛl rwa ta, kawɛ e ji mɛn a sè dalɔ̂ ruhup e bak yere mɛn.

¹⁵Jeng de yɛn a wɔ̀ sɛ̀ yére rwa rak o e vwêl Gileyat, yɛn a hwo ha na yɛn ngan: “Wok in pyɛ de regyɛng bemât Dagwi Darwey ba ye: E yerê yiyɛ pyɛ vyes à yemo de yin a hwo ra a Dagwî BeIsrayɛl ano ɛ? Yin a sé kyɛ́ in nà raa Dagwi Darwey, ko yin a hwo lɔk a bato min gàgbang rangâs yas! Yin a ra retek yunung na Dagwi Darwey!

¹⁷Bare hin na banɛn de wot a ra e Peyor de bá vey á regyɛng bemât Dagwi Darwey na tumbang, ba ga vey a wot wɛt arɛt? Ko wot a ga ka tɛ̀ neyey mot haalal yi e vɛ pere vey e yunung wɛt.

¹⁸Ko a remo, yin a to sé doyo a Dagwi Darwey bama a? Ka sede yin a ra retek na yɛ yunung, ko nahwol a rɔda tɛ̀ shom na mwa regyɛng BeIsrayɛl.

¹⁹Ko ka sede yin e bare, bak vwel de yin a vɔk o wà pɔrɔk hɛ, de be tɔk re a Dagwi ɛ fongol wɛt, ko yē in dɔ vey e vwel de Dagwi Darwey a vɔk hɛ, e kwɔn de bûk sangal mɛ gwó sangal ɛ. Sɛ̀ in hin kwɔ̂n sangal o e tē mot! Ko yin kwon ra retek na Dagwi Darwey kɛ na wot wɛt. Yin lɔk a bato min gàgbang rangâs yas vɔk na Dagwi hwak detu na wo Dagwi Darwey, Dagwi mot wɛt.

²⁰Bare hin na jeng de Akan Zɛrak a kana kyɛ́ ɛ́ nà gyeng redu de ba nɔng e ra pyɛ́ de bê wey mɛ hywiri! Shôm Dagwi ya kana hwo e ra BeIsrayɛl mwa, ko á sè e yɛ nju mɛ zɔng de á wey yaga banɛn vane mo wɛt!”

²¹Bemât yére Rubɛn, na yê Gat tanga rebit yê Manase ba toyo a bemât nuyêl regyɛng BeIsrayɛl, ba ye,

²²“Dagwi Darwey a sé Dagwi Wo Nerey Mwa, ey, a sé wo nerey mwa! Yɛ a tɔk pyɛ de ya tɛ̀, wot a ra ano, ko tik na BeIsrayɛl mwa be tɔk arɔng. Ka sede wot a lɔk gàgbang rangas o, na wot a ra retek, na wot kyɛ́ ot nà raa Dagwi Darwey, ko yɛ a kwon tik ot na neken wɛt!

²³Ka sede wot a lɔk gàgbang rangâs yas o, na wot bin doyo yi na yɛ, ka wot a ra ano, na wot nása ɛ̀ nenɔrɔ̂ yas burang kɛ ne nemuk kɛ ne wunâ nesa, ko tik na Dagwi Darwey pyɛ mɛ a tala hot neves mot!

²⁴Áa! Wot a ra ano zɔng, yaga wot a wok bengyip wɔgɔ, yére min yê kwon ba yâng myot e jeng de ye kyè vey: ‘Sɛ́ min ya sé na Dagwi Darwey, Dagwî BeIsrayɛl arɛt?

²⁵E yɛ de a ga tɛ̀ Rɔt Yɔrdan he sè yɛnɛ̂ vwel e tē mot na yin BeRubɛn tanga BeGat. Vit à hin nà nu e ji pyɛ̂ Dagwi Darwey!’ A sé ano de yére min ya rɔda ba tɔk dul myot nà re a Dagwi Darwey fongol.

²⁶Pyɛ ma yemo de ya tɛ̀ wot a lɔk gàgbang rangâs yas womo, ko wa sé yaga na wot a nása ɛ̀ nenɔrɔ̂ yas burang kɛ pyɛ́ mo cak wɛt.

²⁷Ko di in, wot a simo, na he tɛ́ ɛ pyɛ nuha e tē mot na yin, tanga e tê zamang de he kyè vey e bama mot. Tik na he dura, wot arɔng wot ê tɔk re a Dagwi Darwey fongol e nuyêl bûk sangal mɛ yi na nása nenɔrɔ̂ yas burang, na ne nemuk, tanga ne wunâ nesa. Yi ano, yére min ye kwon ba yâng yére mot e ngamo nuyel, vit à hɛn nà nu e ji pyɛ̂ Dagwi Darwey.

²⁸Wot a bare, ka sede yére min ya ba ha ano e jeng de ye kyè vey, ko myot ya rɔda ba yang ɛn, ‘Di in, bedabeda mot bá lɔk gàgbang rangâs yas womo, tyɛng na wane de wa sé e kwɔ̂n re a Dagwi Darwey fongol. Ba lɔk wɛ, na be nása ɛ̀ nenɔrɔ̂ yas burang kɛ pyɛ́ mo cak wɛt, ko yaga na wo sè nuha e tē min na wot wɔgɔ, wot a sé e ji bemât Dagwi arɔng.’

²⁹A sé kyiri, na be ye, wot a ra retek na Dagwi Darwey, kɛ wot a kyɛ́ ot nà raa hɛ, na wot lɔk gàgbang rangas yaga nása nenɔrɔ̂ yas burang, na ne nemuk, tanga ne wunâ nesa. Wot e simo nása nenɔrɔ mot e ra gàgbang rangas de wa sé e nuyêl bûk sangâl Dagwi Darwey zɔng.”

³⁰Jeng de Pinehas, piris, na bemât nuyêl regyɛng BeIsrayɛl de bá sè tanga yɛ ba wok pyɛ́ de BeRubɛn na BeGat tanga BeManase ba misang, ko ya jam a yɛn.

³¹Ko Pinehas Ɛlɛyazar a yang ɛn, “A remo, wot a tɔk, Dagwi Darwey a sé e tē mot. Yin a ga kyɛ́ in nà raa Dagwi Darwey wɛt. Ko mwin, yin a ga sey BeIsrayɛl yi e tabâk Dagwi Darwey.”

³²E bama mo, Pinehas, tanga bemât nuyel o ba toyo yi na BeRubɛn, na BeGat yi e vwêl Gileyat vɔk na bwâng BeIsrayɛl e vwêl Kanaan, ko yɛn a misang a yɛn pyɛ de bemat o ba ha.

³³Reha mo ra jam a BeIsrayɛl, ko yɛn a somo Dagwi. Ba to ha hâ wɔ̂ tô como na bemɛn, na be wey na sevwel de BeRubɛn na BeGat ba sangal ɛ̀ wɛt.

³⁴BeRubɛn tanga BeGat ba ye, “Kwɔ̂n rangas hemo ha sé nuha e tē mot na yɛn wɔgɔ, Dagwi Darwey a sé Dagwi mot.” Ko ba vo a hɛ rezâ “Nuha.”[9]