Read berom Yɔshuwa 23 Bible Online

Yɔshuwa 23 - berom bible

Yɔshuwa 23

¹Jeng pyak ya ga kwey e bama de Dagwi Darwey a nɔ̂ng BeIsrayɛl pɔngɔ yi e bemât repugu de ba gwɔrɔ hɛn, ko Yɔshuwa arɔng a ga kwop kpushuk.

²Yaga ano, a hwo rini BeIsrayɛl mwa, bemakuk na bemât nuyel, bemât shɔt na bedâ tom mɛn, ko a yang ɛn, “Di in, ma ga kwop kpushuk.

³Yin pyɛ min yin a ga di pyɛ̂ mwa de Dagwi Darwey, Dagwi min, a ga ra a yerê bemat vemo yaga yin, á sè e yɛ de á tó como yaga yin.

⁴Di in, ma ga gas a yin e yére min mwa sevwel yi e Yɔrdan e rwa rak vɔk e Gworep Tē e rwa ta. Ma ga nɔng in vwêl bemat de wot a ga re e como tanga mwa hemo de wot a rɔngɔl nà re arɔng.

⁵Dagwi Darwey, Dagwi min, a rɔda ro ɛn yi e nuyel min, a tik a yin vwel o he tɛ́ ɛ min, de a kana sira a yin.

⁶Ko sǎ hin gak, na yin gyeng mwin mwa pyɛ́ de ba jɛk e Bwok-basa Badu Mose, yin kwon tɛt ɛ hak wɛt.

⁷Yin wuna hin na bwâng bemât yére yemo de ya rɔngɔl e tē min wɛt. Yin nɔ̂ng bedagwi mɛn nerey, kɛ yin sira hin na bazâ vɛ arɔng wɛt. Yin sap ɛn, na yin re a yɛn fongol wɛt.

⁸Ko bana hin na Dagwi Darwey, Dagwi min e negya, sede remo de yin a ga ra vey e remo.

⁹Yɛ a ga ró a yin begbɔng yére bemât jey de ya vɔk gap yi e nuyel min, ko vit a mwat de a tɔk tumal, na a man gèy na yin vey e yunung.

¹⁰Mwat gwining e ji min a tɔk ró bemat gu, yaga Dagwi Darwey, Dagwi min, a sé tó como yaga yin, sede remo de a ga kana sira a yin.

¹¹Yaga ano, tē in naka, na yin tɛ̀ yey min na Dagwi Darwey, Dagwi min.

¹²Ko ka sede yin a doyo, na yin a wuna hin na bwâng bemat vê yére yemo de ya tɛt ɛ e tē min, na yin a wuna nesa, na yin a ra weneng na yɛn,

¹³ko tɔk in tsɛng-tsɛng, Dagwi Darwey, Dagwi min, a rɔda re nuyel na ró a yin yére bemat yemo mo wɛt. Yɛn a rɔda tɛ́ ɛn a yin sede segun kɛ sòro, ko yɛn a rɔda tɛ̀ a yin nepep, sede ba dak in na bezining, kɛ sede rɔgɔ de he ló bayis min. E yɛnɛ mo, ba rɔda wey na yin yi e vwel rat hemo de Dagwi Darwey, Dagwi min, a ga kana nɔng in hɛ.

¹⁴“A remo, ma ga vey bagât kyè wɔ̂ sɛ̀ beda hom. Yin a tɔk e ji yey min mwin, kayɛ pyɛ ryat de Dagwi Darwey, Dagwi min, a ga sira a yin, ya ga sila mwa, ko vit a cak de ya radɛ wɛt.

¹⁵Ko tyɛng sede remo de a sila kayɛ pyɛ ryat de a ga kana sira, ano arɔng, a rɔda sila hâ tabak mɛ de a ga sira hɛ. Dagwi Darwey, Dagwi min, a wuna hɛ na sira tanga yin, ko e simo, na yin a gyeng wuna-na-sira mo. Ka sede yin a doyo yi na yɛ, na yin re a bedagwi behak fongol, shom mɛ ya rɔda fus e ra yin, ko a rɔda tabak hin. Ko e ji kejeng zɔng, vit a hwak e ji min de a rɔda tɛt ɛ e ji vwel rat hemo de a ga kana nɔng in.”