Read berom Yɔshuwa 24 Bible Online

Yɔshuwa 24 - berom bible

Yɔshuwa 24

¹Yɔshuwa a rini yére Israyɛl mwa, be tula hɛn e Shɛkɛm. A rini bemakuk na bemât nuyel, na bemât shɔt tanga bedâ tom, ko yɛn a vey dura bato mɛn e nuyêl bûk sangâl Dagwi.

²A hwo yâng bemat o mwa, “Dagwi Darwey, Dagwî BeIsrayɛl, a ye ngan: ‘Yimo raane bedabeda min ba sangal e gurâ Gwɔrɔt Ɛifaratɛs, ko ba re a bedagwi behak fongol. Hane há re nuyel vɔk e jeng Tɛra dâ Abraham na Nahor.

³Ko ma jut da min Abraham yi e sevwel o e gurâ Ɛifaratɛs o, ma kyè na yɛ̀, a kwey mwa vwêl Kanaan, ko ma gwɛ̌ nepyak yere mɛ. Ma nɔng ɛ hwey wen, Yishak,

⁴ko ma to nɔ̂ng Yishak nèy neba — Yakɔp tanga Esau. Ma nɔ̂ng Esau bak vwêl berakû Seyir, na a se mwɛ, ko e bamâ jeng cak Yakɔp tanga nèy mɛ ba kyè vɔk e Misra.

⁵“ ‘E bamâ jeng cak arɔng, ma tomo Mose na Aharon vɔk na yére mɛn, ko ma tak a BeMisra reyɔm na betumbang detidetu. E bama mo, ma nusu na bedabeda min yi e hwomo, ko ma vey na yɛn vɔk e Gbɔng Rep Sere. Jeng de BeMisra kwong ba raa hɛn e bekyɛkyɛ̂ bedwa na besuga mɛn,

⁷yɛn a tosho a me, na me sɛlɛ hɛn, ko ma tɛ̀ lwīl gwa gas ɛn na BeMisra. Ma tɛ̀ nshî gworep na ye mulang e ra yɛn, ko gwà bang ɛn mwa hywiri. Yin a tɔk pyɛ de ma ra a BeMisra. “ ‘E bama mo, yin a sangal e hey neshey pyak,

⁸sɛ̌ ma vey na yin e ji vwêl BeAmɔr, vemo de ba sangal e rwa rak wo Yɔrdan. Yɛn a tó como na yin, ko ma nɔng ɛn e ji vɔ min. Ma wey a yin na yɛn, ko yin a sey ɛ̀ vwel mɛn, ha tɛ́ ɛ min.

⁹E bama mo, gbɔng gwɔ̀m Mowap, Balak Zipor, a yong ɛ́, na a tó como na yin. A hwo tomo a Balaam na a vey mok a yin gawey.

¹⁰Ko ma kyɛ́ me nà wok ha mɛ, ko a vɛ̌ tɛ̀sɛ a yin nerat e negya. Yi ano, ma sey in yi e vwɔ̂ Balak.

¹¹Ano arɔng, yin a ye dɔ a Rɔt Yɔrdan, ko yin a vey wul Yeriko. Yin a tó como na bemât Yeriko, ko ma sɛlɛ hin, yin a re ɛn na como, tyɛng sede bwang bemât vwel o, vɛ a BeAmɔr, na BePɛrizi, na BeKanaan, na BeHiti, na BeGirgash, na BeHivi tanga BeYebus.

¹²Sede remo de yin a re nuyel, ma tɛ̀ bengyip ba vo ɛn, ko ma tɛ̀ ɛn be tele, tyɛng sede begwɔ̀m BeAmɔr beba vane. Yin a ró ɛn na wal kɛ gbang min wɛt.

¹³Ma ga nɔng in vwel de yin a ka how cāp hɛ wɛt, na bapomo de yin a ka lɔk wɛt. A remo, yin a sé sangal e ji vɛ, ko yin a sé wok netâ nèy anap tanga pat yi e batîn cɔ́gɔt de yin a tus wɛt!’ ”

¹⁴Yɔshuwa a re nuyel na ha, a ye, “Wok in bengyip Dagwi Darwey, na yin sap ɛ, na yin raa hɛ na yey rining. Páa in pyɛ̂ sekwit de bedabeda min bá tâng yɛ a bedagwi mɛn, bá raa hɛn jeng de bá sè e bavwêl Mɛsɔpɔtamya na Misra, ko raa hin Dagwi Darwey nju mɛ.

¹⁵Ka sede yin a simo, yin raa hɛ wɛt, ko kasa hin yunung, winde yin ê raa: bedagwi de bedabeda min bá raa e Mɛsɔpɔtamya kɛ vê BeAmɔr de yin a sé na sangal e vwel mɛn. Ko me tanga belɔ hom wot a rɔda raa Dagwi Darwey.”

¹⁶Ko bemat o ba toyo na há, ba ye, “Àa! Hwó tē kɛ gyeng, wot ê ye waa à Dagwi Darwey, na wot a raa bedagwi behak a?

¹⁷Yaga á sè e Dagwi Darwey, Dagwi mot, de á nusu na beda mot tanga wot yi e ji sesam e sevwel Misra, ko wot á di gbɔng pyɛ̂ bes de á ra. Á to gyenges hot e kagwɛ gwong de wot a kweres ɛ̀ e ji bavwêl bemat beduk.

¹⁸E yɛ de á ro a wot mwa bemat o tanga BeAmɔr de bá sè e vwel hemo arɔng. Yaga ano, wot arɔng wot ê raa Dagwi Darwey, yaga e yɛ̀ wɛ̀ a Dagwi mot.”

¹⁹Yɔshuwa kwong a yâng bemat o, “A sé negbang, na yin raa Dagwi Darwey, yaga yɛ̀ a sé Dagwi detu, yɛ a simo, be tyɛngrɛ hɛ na hwak wɛt, ko yɛ a rɔda hàla a yin negbarak na banɛn min wɛt.

²⁰Ka sede yin a ye waa a hɛ, na yin a raa bedagwi beduk, yɛ̀ a rɔda doyo e ra yin, ê teshe na yin na neves, ko ê wey na yin mwa vit, mwa ano de a ga kana dura a yin nerat mɛ.”

²¹Ko bemat o ba toyo a Yɔshuwa, ba ye, “Kɛ́ɛ wey! Wot ê raa Dagwi Darwey!”

²²Yɔshuwa kwong a yang ɛn, “Yin a sé bemât nuha bato min, yaga yin pyɛ min yin a ga kasa, na yin a raa Dagwi Darwey.” Ko yɛn a toyo na ha, ba ye, “Ey, wot a sé vê nuha.”

²³Yɔshuwa a yang ɛn, “Ano kwong, páa in pyɛ̂ sekwit de yin e tang yɛ a bedagwi vemo de yin a vɔk e tē min, ko nɔng in a Dagwi Darwey, Dagwî BeIsrayɛl neyey min.”

²⁴Ko bemat o ba ye, “Wot a rɔda raa Dagwi Darwey, Dagwi mot zɔng, ko e yɛ̀ wɛ̀ nju mɛ de wot ê gyeng ha mɛ.”

²⁵E tuk hane, e Shɛkɛm, Yɔshuwa a wuna bemat o na sira tanga Dagwi, ko a nɔng ɛn badu de bê raa.

²⁶A jɛk pyɛ́ yane e Bwok-basa Badu Dagwi. E bama mo, a jut gwogbɔng gwofwa, a tɛ̀ gwɛ̀ cik e hwomo e retîn cɔgɔ̂t ouk e kwɔ̂n re a Dagwi Darwey fongol.

²⁷Ko a yâng mwâ bemat o, “Di in, gwofwa gwomo! Gwa rɔda sè nuha mot, yaga gwà ga wok neha mwa de Dagwi Darwey a ga ha a wot. Gwà rɔda bare a yin, yaga yin ê kwon kyɛ́ in na raa Dagwi.”

²⁸Ano, Yɔshuwa a tɛ̀ bemat o e gwong, ko kawɛ a toyo vɔk e bak vwel mɛ.

²⁹E bamâ pyɛ́ yane, Yɔshuwa Nun, mwât fwôm Dagwi Darwey a ku, yɛ̀ na neshey naga gwining na nɛ kuru rining (110).

³⁰Ba lɛrɛ hɛ e kwɔn nedanelɔ mɛ e Timnat-Sɛrak e bak vwêl berahwôl Ɛfrayim, e rwa bato na rakû Gaash.

³¹BeIsrayɛl ba raa Dagwi Darwey mwa jeng de Yɔshuwa á sè kwen, ko e bamâ reku mɛ, ba re nuyel e ji raa mo, sɛ̌ bemakuk de ba sè, de ba bɛrɛng pyɛ̂ mwa de Dagwi Darwey a ra a BeIsrayɛl ba kushu arɔng.

³²Ko ba lɛrɛ bekup Yɔsɛf, vemo de BeIsrayɛl ba vɔk yi e Misra, e Shɛkɛm, e ji bak vwel de Yakɔp á kana sey e nû dyām shinang naga yi na nèy Hamor, dâ Shɛkɛm, kwɔn o ha tɛ́ ɛ he belɔ Yɔsɛf.

³³Ɛlɛyazar Aharon arɔng a ku, ko ba lɛrɛ hɛ e Gibeya, e bak vwêl berahwôl Ɛfrayim, repomo de ba kana nɔ̂ng hwey mɛ Pinehas.